Salmo 143
143
Kararag Di Ipogaw Ay Magay Namnama Na
1 Apo, dengngem kod nan kararag ko.
Gapo sin kinalinteg mo ya kinamatalek mo,
songbatam kod nan kararag ko.
2 Adi ka koman okomen sak-en ay baam,
tan magay ipogaw ay nalinteg sin pangilam.
3 Inmapayaw nan kalaban ko
et naabakak dadlo.
Inmibalod das nan mabolinget ay kad-ak,
kamanak din natey ay nabayag.
4 Isonga kinmapsot nan namnamak,
palalo ay madisdismayaak.
5 Manemnem ko ed bayag, Apo,
manemnem ko din inam-amag mo.
6 Itag-ay kon takkay ko ay mankararag en sik-a,
kamanak nakgang ay lota ay danom di kasapolana,
tan palalo di iliw ko en sik-a.
7 Sapay koma ta patgam ay dagos nan kararag ko,
tan nay enggay kinmapsot di nemnem ko.
Adi ka kod somigsigaan
into et mo din kad-an di natey di enak domatngan.
8 Inagsapa koma ay ipanemnem mo
din adi manbalbaliw ay layad ya seg-ang mo,
tan sik-a di pantalkak, Apo.
Sik-a anggoy di pankararagak,
itdom kod di kosto ay pandanak.
9 Sik-a di pankamangak ta somalaknib ka,
sin kalaban ko, omisalakan ka koma.
10 Itdoam kod sak-en ay mangonod sin laydem,
tan sik-a di enak daydayawen.
Managseg-ang ka et sapay koma
ta omiturong ka si biyag ay natalna.*Di esa abe ay kaiologan nina sin Hebreo et: Managseg-ang din Ispiritom et sapay koma ta omiturong si biyag ay natalna.
11 Salaknibam koma nan biyag ko
ta say maidayaw di ngadan mo.
Gapo sin kinalinteg mo,
omisalakan ka kod sin problimak, Apo.
12 Gapo sin adi manbalbaliw ay layad mo,
peslem koma amin din pomalpaligat ay kalaban ko,
tan esaak ay mansilsilbin sik-a, Apo.
*143:10 Di esa abe ay kaiologan nina sin Hebreo et: Managseg-ang din Ispiritom et sapay koma ta omiturong si biyag ay natalna.