1 Ilaen yo ay taga-Jerusalem, tan dandani din agew ay pangokoman Diyos. Sin doy ay timpo, omalin to di manamsam sin sanikwa yo et panbibingayan da sin sangoanan yo. 2 Din iyat na ay maamag et sinopen Diyos din am-in ay nasyon et gobaten da din siyodad ay Jerusalem. Abaken da et alaen da am-in ay layden da sin bebbeey ya piliten da abe din babbabai. Din kagodwan di omili yan maiey da ay maibalod sin addawi, ngem din odom pay yan mabay-an da.

3 Pag bomala si Diyos ay en mangobat sin nanasyon ay sana ay kaman met laeng din inyat na ay nakigobgobat ed idi. 4 Sin agew ay sana, pomikas sisya sin toktok di dontog ay Olivo sin bomandas belaan di agew ed Jerusalem. Magodwa din dontog et mawada di annawa ay tanap sin nan-gawaana manipod sin bandan di belaan enggana sin diposan di agew. Demenden sin amyanan din kagodwa yan sin abagatan din godwa na. 5 Lomayaw kayo ay mandan sin tanap ay sana sin nan-gawaan di dontog Diyos, tan domateng sa enggana ed Azel. Managtag kayo ay kaman din inyat di aap-o tako sin nanyegyegana sin timpon Uzzias ay ari ed Juda.*Din kanana sin LXX et: Matab-okan din tanap ay sana sin nan-gawaan di dontog enggana ed Azel ay kaman din inyat na sin nanab-okan di yegyeg sin timpon Uzzias ay ari ed Juda. Pag omali si Yahweh ay Diyos ko yan ikoyog na din nasantoan ay aanghel na.

6 Mo domteng di ay timpo, maga di teg-in ono andap. 7 Maga abe di labi, pag kaagawan, tan olay sin labi et mapat-a pay dedan. Din domtengana di ay timpo et si Diyos anggoy di makaammo. 8 Sin agew ay sana, man-oyas di danom ay mapo ed Jerusalem sin intiro ay tawen, sin pinag-oodan ya siya abe sin tiyagew. Omayos din godwa na sin baybay ay Mediterranean yan din godwa na sin lebeng ay Asin.

9 Pag man-ari si Diyos sin intiro ay lobong. Am-in ay ipogaw et dayawen das sisya ay Diyos yan es-esa di ammo da ay ngadana.

10 Masingpan to din intiro ay ili manipod ed Geba sin amyanan enggana ed Rimmon sin abagatan, ngem ed Jerusalem pay yan komakaman ay nakaykayang mo din am-in ay ili ay wada sin nanliniked. Sakopen din siyodad manipod sin Segpan Benjamin enggana sin Segpan sin Soli, ay naiamagan di sigod ay segpan, manipod abe sin pan-gowardiyaan ed Hananel enggana sin panpespesan si obas ay okan di ari. 11 Mailian to ya polos ay adi kasin madadael. Natalna abe di biyag din omili ay magay pan-egyatan da.

12 Awni et ipalak-am Diyos di kaeegyat ay sakit sin nanasyon ay nangobat ed Jerusalem. Maboyok din lamlames, mata ya dila da olay matmatago da pay laeng. 13 Sin timpo ay sana, palalo ay kibtoten Diyos daida et esa en mangamdot ya mangibaw sin ipogaw ay katakdo na. 14 Din taga-Juda abe yan makigobat da ay manalaknib ed Jerusalem. Samsamen da din sanikwan di am-in ay nasyon ay balitok, palata ya lopot ay ad-ado. 15 Wadan to abe di kaeegyat ay sakit di kabayo, dangki, kamel ya am-in ay animal sin kampon di nanasyon ay sana. 16 Mo makdeng di, am-in din makalasat sin nanasyon ay nangobat ed Jerusalem yan tinawen ay emey da ed Jerusalem ta en da mandayaw en Diyos ay bigbigen da ay Kangatoan ay Turay. Silibraren da abe din fiesta ay makwani en Ab-abong. 17  18  19  20  21