Uţup uŧeek wi Pawulu apiiŧuŋ banfiyaaruŋ
banfëţuŋ du uŧaak wi
Korinŧ
Uţup ujuni
Korinŧ dawo uloŋ ţi ŋbeeka ŋandëmnuŋ ŋi uŧaak wi Akayi unwooŋ nţa ţi uŧaak wi Greŧ. Bañaaŋ baŧum bambiiŋ afëţ ţi ubeeka mënţ babi wo bañaaŋ banwooŋ baanfiyaar Naşibaţi abot awo bado iko iwuţaan. Pawulu ado uşubal na kli paaj pa pţooran pnŧuk pi banfiyaaruŋ. Wi Pawulu apiiŧuŋ kakaarta ki, awo du Aŧiya du ubeeka wi Efeŧ. Bañaaŋ baloŋ biki pnŧuk pi banfiyaaruŋ du Korinŧ bapiiŧuluŋ kahepara uko uloŋ wi baŋaluŋ pme. Ji ikaarta bŧi yi Pawulu, ado aloŋ kë apiiŧ akuţ añooţ kakaarta du biki apiiŧuŋ ka. Kë ñaaŋ i Pawulu ayiluŋ katimul kawo Ŧoŧen. Ŧoŧen awo ñaaŋ anfiyaaruŋ Kriŧtu kë bañaaŋ başë wo baamme'a bnuura. Pawulu ado kakaarta ki apiiŧuŋ ki ifah itëb. Ţi kaŧeek ñaaŋ aji win kë banfiyaaruŋ baţup Pawulu iko iŧum inţëpuŋ ţi pnŧuk pi banfiyaaruŋ mënţ. Kë Pawulu aşë win iko iwajanţ inkaaŋ udooni : Bañaaŋ baanŧiinkar ţi pnŧuk pi banfiyaaruŋ. Aloŋ aya apiinţ na ahar aşin. Banfiyaaruŋ baji bañooţ baŧënţ baka banfiyaaruŋ du uruha wi banwooŋ baanwo bayuday. Uko mënţ ukaaŋ kë Pawulu ahepar baka me iko ikowandënaan yi akŧiinkuŋ ijoonanaari. Ţi kafah katëbanţën uţup paaj na uloŋ te du uţup iñeen na paaj Pawulu aŧeem ţi iko yi baheparuluŋ. Aţiiniyaan bniim. Aji na baka balow ŋnŧoŋ. Aţiiniyaan kak uko wi pyit pde panwooŋ paanji padëman Kriŧtu. Aji na baka bala uţen wi Uhaaş wi Naşibaţi unjaaŋ uţënk pnŧuk pi banfiyaaruŋ. Aji na baka bado kala bŋalad du uţup iñeen na ŋtëb te iñeen na ŋbaakër. Akak aţiiniyaan pnaţa ţi pkeţ. Ţi uba kakaarta, Pawulu aţup aji aŋal kaya pwin baka kayeenkna iko yi baţonkrënuŋ kaţënkna bajuuk biki Yeruŧalem.
1
1 Nji Pawulu, i Naşibaţi aduuŋ pa nwo nanjañan i Yeŧu *Kriŧtu, ţiki aŋaluŋ uko mënţ, na Ŧoŧen ayiţ nja, ŋpiiŧanaŋ. 2 Ŋpiiŧan, an banfiyaaruŋ Naşibaţi nanwooŋ du Korinŧ, nankakuŋ ayiman wi nawooŋ ţi ploolan na Yeŧu Kriŧtu, an nandu'aniiiŋ pwo biki nul. Ŋpiiŧuŋ kak bañaaŋ bŧi banjaaŋ badëman katim ki Yeŧu Kriŧtu Ajug nja, anwooŋ Ajugun akuţ awo Ajug baka, du dko di bawohaŋ. 3 Dñehan Naşibaţi Aşin nja na Yeŧu Kriŧtu Ajugun bawulan bnuura babot bajoobţënan ŋhaaş.
4 Naşibaţi awulan bnuura wi nawooŋ ţi ploolan na Yeŧu *Kriŧtu ukaaŋ kë nji kabeeba wal undoli ţi uko wi nan. 5 Ţi pwo ţi ploolan na a puŋ, nawo bayok ţi iko bŧi : Ţi uţup undoli na ţi pme bŧi. 6 Na manjoonan, namëban bnuura uko wi ŋţupanaŋ ţi Yeŧu Kriŧtu, bado kë uneej ţi an aţoo aliinŧ. 7 Hënk, naankwaaŋ nin uţen uloŋ, wi nawooŋ ţi pyoonk Yeŧu Kriŧtu Ajugun apën awinana. 8 Ul akluŋ kadolan namëban naliinŧ te ubaañşaani nahilna nawo bañaaŋ biki nin ñaaŋ awooŋ aankka uko uwuţaan uţup ţi baka ţi unuur wi akbiiŋ. 9 Naşibaţi aji do uko bŧi wi ahoŋuŋ, ul andatanaŋ nawo ţi ploolan na Abukul Yeŧu Kriŧtu Ajugun.
Uko wi bpulad ţi pŧoof pi banfiyaaruŋ
10 An bayiţ naan, dkooţan ţi katim ki Ajugun Yeŧu *Kriŧtu nawo bŧi ţi uţup uloolan, bpulad baţañ ţi pŧoofan, naţëpën ţëp naŧiinkar nawo na uşal uloolan na uţup uloolan. 11 An bayiţ naan, uko unkaaŋ kë nji kaţiini haŋ uwo kë bañaaŋ biki ufëţ wi Këlowe baţupën aji bpulad bawo ţi pŧoofan. 12 Dŋal kaji baloŋ ţi an baji baji : « Nji dwo na Pawulu, » aloŋ kaji « Nji dwo na Apoloŧ, » aloŋ kaji « Nji dwo na Kefaŧ* Kefaŧ: Katim kaloŋ ki Kefaŧ kawo Piyeer.. Aloŋ kak kaji « Nji dwo na Kriŧtu. » 13 Naşal aji Kriŧtu afaaşiiri i? Nji Pawulu i i bapaŋuŋ ţi kruŧ pa an i? Këme ţi katim ki naan ki ki nayeenknuŋ batiŧmu i? 14 Dbeeb Naşibaţi ţi uko wi nwooŋ mëmbatŧaar nin aloŋ ţi an bë mënţ Kriŧpuŧ na Gayuŧ baka, 15 hënk nin aloŋ aankhil kaji nabatŧaar ţi katim ki naan. 16 Yoow, dbaaŋ aleş, dbatŧaar kak biki katoh ki Ŧefanaŧ, aşë wo mënkak aleş me mbatŧaar aloŋ kak. 17 Kriŧtu aanyilën yil mbi pbatŧaar, ayilën yil mbi nţup *Uţup Ulil Unuura. Aanyilën pţup wa na ŋţup ŋi mntit mi ñaaŋ najën, pkeţ pi Kriŧtu ţi kruŧ pawutna kawaaŋ udooni.
Uşal unwooŋ unŧuŋa na manjoonan
18 Uţup wi pkeţ pi *Kriŧtu ţi kruŧ uwo ŋyila pa banneemuŋ aşë wo pa nja ŋmbuuruŋ mnhina mi Naşibaţi. 19 Hënk, Naşibaţi aţiini ţi *Ulibra wi nul aji : « Dluŋ kaŧok pnŧuŋa pi banwooŋ na ŋşal ŋnŧuŋa, kaŧok mntit mi bantituŋ✡ Iŧayi 29.14.. » 20 In awooŋ na uşal unŧuŋa ba? In awooŋ name? In awooŋ nalil mntum i umundu wi nţa wi? Naşibaţi adiiman kë uşal unŧuŋa wi mboş uwo ŋyila. 21 Naşibaţi na uşal unŧuŋa wi nul ado kë umundu uumme'a na uşal unŧuŋa wi wa. Ulila kë aţëpna ţi uţup wi ŋkţupuŋ abuuran banfiyaaruŋ, uţup mënţ uwo wo ji ŋyila ţi këş ki bañaaŋ bajën. 22 Bayuday baŋal kawin iko iñoŋarënaan kë banwooŋ baanwo bayuday bakla pwo na ŋşal ŋnŧuŋa, 23 kë un ŋşë ţup uko wi Kriŧtu ampaŋaniiŋ. Bayuday baji uko mënţ uwo pkar Naşibaţi, kë banwooŋ baanwo bayuday baji uwo ŋyila. 24 Kë ţi bañaaŋ biki Naşibaţi adatuŋ, bayuday na banwooŋ baanwo bayuday, Kriŧtu ajaaŋ adiiman mnhina na uşal unŧuŋa wi Naşibaţi. 25 Na manjoonan uko wi bajaaŋ bado ŋyila ŋi Naşibaţi upel ŋşal ŋnŧuŋa ŋi bañaaŋ bajën, kë pbiişna pi Naşibaţi papel mnhina mi bañaaŋ bajën.
26 An bayiţ naan, natenan jibi nabiiŋ awo wi Naşibaţi adu'anaŋ: bañaaŋ biki bajakuŋ aji bawo na ŋşal ŋnŧuŋa baanŧum ţi an, kë bañaaŋ banwooŋ na mnhina baanŧum ţi an kak, kë bañaaŋ baweek baanŧum ţi an. 27 Bañaaŋ biki bajakuŋ aji bawo bayila, Naşibaţi adat dat baka kakowandënaan banwooŋ na ŋşal ŋnŧuŋa. Bañaaŋ biki bajakuŋ aji baanwo na mnhina, Naşibaţi adat baka kakowandënaan bañaaŋ banwooŋ na ma. 28 Bañaaŋ bampoţi, bañaaŋ biki babeehuŋ, ado baka ji bañaaŋ bawaaŋ udooni, Naşibaţi adat baka kadolna uko wi umundu uşaluŋ aji uka udooni uwaaŋ udooni. 29 Hënk nin aloŋ aankhil kado kahomp ţi kadun ki Naşibaţi. 30 Ul adoluŋ kë nawo ţi ploolan na Yeŧu *Kriŧtu, kë ul Kriŧtu awooŋ ñaaŋ ankaaŋ kë ŋme uşal unŧuŋa wi Naşibaţi. Akaaŋ kë ŋwo baŧool ţi këş ki Naşibaţi, ayiman ţi kadunul, ul abuuranuŋ nja ţi pekadu. 31 Hënk di di upiiŧaniiŋ ţi *Ulibra wi Naşibaţi aji : « Woli ñaaŋ aloŋ aŋal kahomp, adoon kahompna iko yi Ajugun adoluŋ. »✡ Yeremiya 9.24.