Uţup uŧeek wi
Yowan
apiiŧuŋ banfiyaaruŋ
Uţup ujuni
Ulibra wi uwooŋ kakaarta kaŧeek ki Yowan apiiŧuŋ. Yowan i abi piiŧ ulibra uloŋ uŧeek wi aţiiniyaanuŋ ubida wi Yeŧu ţi mboş: uwooŋ Uţup Ulil Unuura wi Yowan apiiŧuŋ. Akak apiiŧ ikaarta itëb inţaşuŋ ţi ki. Du unjon bañaaŋ baloŋ babi ţilan aji Yeŧu Kriŧtu ambiiŋ abi ţi umundu wi awo ñaaŋ najën aanwo Abuk Naşibaţi. Baji baji kak kë ñaaŋ ahil kado uko wi aŋaluŋ, kë Naşibaţi aankdo baka uko uloŋ. Uko mënţ ukaaŋ kë Yowan apiiŧ banfiyaaruŋ aţup baka in awooŋ Yeŧu. Aţup baka aji ubida wi mnţo uwoo, akuţ adiiman baka jibi ñaaŋ ahiluŋ kaka wa : Ñaaŋ anfiyaaruŋ Yeŧu andoli, aka ubida mënţ. Akak ahoţalëş aji bañaaŋ bawo ţi ploolan na Naşibaţi na Yeŧu Abukul, baŋal Naşibaţi na banfiyaaruŋ bandukiiŋ. Aji woli bado haŋ bame kë baka ubida wi mnţo.
Hënk di ifah yi ulibra wi iwooŋ:
1. Uţup unjaaŋ uwul ubida (1.1-4)
2. Nawulën ŋpoş ţi bjeehi (1.5–2.6)
3. Bgah bhalu (2.7-17)
4. Başoorad Kriŧtu na babuk Naşibaţi (2.18–3.10)
5. Bŋalad (3.11–4.21)
6. Ppok iko yi mboş (5.1-21)
1
Uţup unkwuluŋ ubida
1 Ŋţiiniyaan ţi nawo Uţup unkwuluŋ ubida ;
awo du ujuni,
ŋŧiinka
awina na këş ki nun,
abot atena bnuura,
akuţ abana na iñen yi nun.
2 Anwooŋ ubida apën awinana, kë ŋkţup uko wi ŋmaaruŋ. Ŋţupan uko wi anwooŋ ubida wi mnţo ambiiŋ awo du Naşibaţi Aşin nja aşë pën awinana ţi un. 3 Uko wi ŋwinuŋ akuţ aŧiink, ŋţupan wa an kak, nahilna nabi namëbandër na un, ŋnaakiir nja bŧi ţi pmëbandër pi ŋmëbandëruŋ na Naşibaţi Aşin nja na Yeŧu *Kriŧtu Abukul. 4 Ŋpiiŧ uko wi, un ţi ŋleefun, mnlilan mi nun*Mnlilan mi nun : Baloŋ bapiiŧ aji mnlilan mi nan. manhilna mandëm maakan.
Ppoş ţi bjeehi
5 Uţup wi ŋŧiinknuŋ ţi Yeŧu *Kriŧtu aşë ţupan hënkuŋ wi : Naşibaţi awo bjeehi, nin bdëm bloŋ baanwo ţi a. 6 Woli ŋji ŋmëbandër na Yeŧu aşë poş ţi bdëm, ŋwo baţilan, ŋënkdo uko unwooŋ manjoonan. 7 Aşë wo woli ŋpoş ţi bjeehi jibi Naşibaţi ţi uleeful awooŋ ţi bjeehi, ŋkeer awo baloolan nja bŧi, kë pñaak pi Yeŧu Abukul pajinţan nja ţi pekadu bŧi.
8 Woli ŋji ŋënwo na nin pekadu dloŋ, ŋguur ŋleef ŋi nja, manjoonan maanwo ţi nja. 9 Aşë woli ŋdinan aji ŋwo na pekadu, ŋhinan kahaţ Naşibaţi, awo naŧool : aluŋ kamiir nja ipekadu, kabot kajinţan nja ţi buţaan bŧi. 10 Woli ŋji ŋëndo pekadu, ŋţu Naşibaţi ŋţilan, kë uţup wi nul ubot awo uunwo ţi nja.