Uţup utëbanţën wi
Piyeer
apiiŧuŋ
Uţup ujuni
Ulibra wi uwooŋ kakaarta katëbanţën ki Piyeer nanjañan apiiŧuŋ. Aka ppiiŧ ka banfiyaaruŋ banwooŋ ţi ubeeka uloŋ. Nin aloŋ aanţup aji apiiŧ ka biki apiiŧuŋ ţi kakaarta ki nul kaŧeek, ţiki nin ñaaŋ aamme na manjoonan me ikaarta itëb ţañ yi yi apiiŧuŋ. Aţup ţañ aji ki kawooŋ kakaarta katëbanţën ki apiiŧuŋ baka (natenan ţi 2 Piyeer 3.1) Piyeer aţup aji bañaaŋ baloŋ baya du banfiyaaruŋ Kriŧtu ajukan baka iko iloŋ impaţuŋ na Uţup Ulil Unuura wi abiiŋ aţup baka. Bawo ţi pdo uko wi baŋaluŋ aji Yeŧu aankak abi. Piyeer akak aţup aji ubida wi ñaaŋ anfiyaaruŋ Kriŧtu uwo kalil Naşibaţi. Uko mënţ wi wi Yeŧu abiiŋ ajukan bambiiŋ awo na a wi awooŋ ţi umundu wi. Kë uko mënţ wi wi bawooŋ kaţu ţi ŋşal.
Hënk di ifah yi ulibra wi iwooŋ:
1. Pwul mboş (1.1-2)
2. Hum di anfiyaaruŋ Kriŧtu awooŋ kawo? (1.3-11)
3. Namëbaan naliinŧ ţi uko wi bajukananaŋ (1.12-21)
4. Banjaaŋ bajukan uko unwooŋ uunjoonani (2.1-22)
5. Na manjoonan, Yeŧu aluŋ kabi kak (3.1-18)
1
Pwul mboş
1 Nji Ŧimoŋ Piyeer nwooŋ nalempar Yeŧu *Kriŧtu akuţ awo *nanjañan i nul dpiiŧanaŋ, an biki Yeŧu Kriŧtu Naşibaţi, Nabuuran nja adoluŋ ţi pwo naŧool pi ŧul kë nafiyaar pfiyaar panliŋuŋ na pi nun. 2 Dñehan Naşibaţi awulan bnuura banŧumuŋ abot ajoobţënan ŋhaaş bnuura, wi name'uluŋ abot ame Yeŧu Ajugun.
Pwo naţaşar Yeŧu ţi mnwo
3 Ţi mnhina mi nul, Naşibaţi aţen nja iko bŧi yi ŋnumiiŋ kakaana ubida kamëban kaliinŧ ţi a. Ŋyeenk iko mënţ bŧi wi ŋme'uluŋ, ul anţëpnuŋ ţi mndëm na bnuura bi nul adu nja. 4 Hënk, aţen nja iko inuura iweek maakan jibi ajonuŋ nhoŋ aji aluŋ kawul ya nja. Ado haŋ nahilna nabuur pŧoka pi uŋal wi iko iwuţaan injaaŋ iŧok ñaaŋ inwooŋ ţi umundu wi ujaaŋ uţij, naşë nanaam na a.
5 Ukaaŋ kë nawo kadoonaan kahoţan ţi pfiyaar pi nafiyaaruŋ mnwo mnuura, kahoţan ţi mnwo mnuura pme Naşibaţi, 6 kahoţan ţi pme Naşibaţi puŋ pmëban uleef, kahoţan ţi pmëban uleef kamiir, kahoţan ţuŋ kamiir mënţ pmëban ţi Naşibaţi kaliinŧ, 7 kahoţan ţi pmëban ţi Naşibaţi kaliinŧ puŋ bboofar, kahoţan ţi bboofar bŋalad.
8 Iko inuura mënţ yaŋ, woli nawo na ya aŧuman, kë ibot aŧuma ŧum pya, naji nawo bañaaŋ banjaaŋ badoonaan, kabot kaya kadun ţi uko wi pme Yeŧu Kriŧtu *Ajugun. 9 Kë ñaaŋ anşaaŋ awaaŋ iko inuura mënţ, aji fël këş kadoo wo wo ji nakuul : aji ţilma kë Naşibaţi apënana pekadu di abiiŋ ado ţfa.
10 An bayiţ naan ţi *Kriŧtu, natamaan maakan keeri nado kado iko inkdiimanuŋ kë Naşibaţi adu'anaŋ akuţ adatan. Woli nado haŋ, naankjot nin. 11 Hënk di di Naşibaţi akhaabëşanaŋ bnuura plëman pneeji du pşih panwooŋ paankba pi Ajugun, Nabuuranun nja Yeŧu Kriŧtu.
Uko unkaaŋ kë kakaarta ki kapiiŧanaa
12 Name iko inuura yaŋ, kë nşë do kaleşanan ya wal undoli naşë namëban naliinŧ ţi manjoonan mi nawinuŋ nţa. 13 Dşal aji wal bŧi wi nji kawooŋ ţi umundu, unuura ndo kaleşanan, nawoona bten. 14 Dme kë wal wi pkeţ wi naan uñogi, Yeŧu *Kriŧtu Ajugun ţi uleeful adolnuŋ kë mme uko mënţ. 15 Kë nşë doonaan kado woli dyaa, naduka kaleş unuur undoli iko mënţ bŧi.
Uko unkyuujuŋ kë uţup ujoonani
16 Mënţ inŧintamëş itit yi ŋpaşuŋ yi yi ŋbiiŋ aţupan wi ŋdolanaŋ kë name mnhina mi Yeŧu *Kriŧtu Ajugun akuţ ame ubi wi nul, ŋwin win na këş ki nun mndëm mi nul. 17 Naşibaţi, Aşin nja *Andëmuŋ Maakan, awula pdëm na mndëm, wi aţiiniiŋ na a aji : « Iwi iwooŋ Abuk naan, dŋalu maakan, dmaganu✡Maci 17.5.. » 18 Un ţi ŋleefun ŋŧiink pdiim pi nul panwoonuŋ baţi wi ŋwooŋ na a du pnkuŋ pyimanaan.✡Natenan ţi Maci 17.1-5; Markuŧ 9.2-7; Luk 9.28-35.
19 Hënk, uko mënţ uliinŧan bnuura pfiyaar pi nun ţi uko wi *baţupar Naşibaţi bajakuŋ. Nawo kaţaş wa bnuura : uwo ji unkaniya unjaaŋ ujeehan ţi bdëm te wal wi unuur ujinţuŋ kë unfay, ujah unjaaŋ ujeehan na nfa upën awinana ţi ŋhaaşan. 20 Nawo kame duna kë uko wi baţupar Naşibaţi baţupuŋ unwooŋ ţi *Ulibra wi nul uunwo uko wi ñaaŋ najën aşaluŋ ţi uleeful aţup. 21 Na manjoonan, nin uţup wi Naţupar Naşibaţi uumbaaŋ kapënna ţi uşal wi ñaaŋ najën, *Uhaaş wi Naşibaţi ujaaŋ uţëpna ţi bañaaŋ bajën kaţiini ţi katim ki nul.