Uţup utëbanţën wi
Pawulu apiiŧuŋ
Timote
Uţup ujuni
Ulibra wi uwo kakaarta katëbanţën ki Pawulu apiiŧuŋ Timote. Apiiŧ ka wi awooŋ ukalabuş du Rom. Banohul bŧi baţi wal mënţ aduka. Luk ţañ anwooŋ napiinţan awooŋ aanduka. Pawulu awin kë uko ubaa, pkeţ ţañ padukiiŋ. Uko mënţ ukaaŋ kë apiiŧ Timote kaţaŋa ţiki ajeja kë awo ji abukul na manjoonan. Kakaarta ki Pawulu apiiŧuŋ ki kawooŋ kabaañşaani ki apiiŧuŋ. Apiiŧa ţi kakaarta ki aji na a amëban ji a aliinŧ ţi pfiyaar. Akak ajaka ataman ţi pţup Uţup Ulil Unuura wi Yeŧu Kriŧtu woli badoo hajana. Aji na a alipara pjukan panwooŋ paanwo Uţup Ulil Unuura. Pawulu akak aţup ţi ka aji ul ţi uleeful agutan ugut unwooŋ unuura, kë awo kaya hënkuŋ du Ajugun Yeŧu Kriŧtu. Aţup aji ñaaŋ anfiyaaruŋ Kriŧtu andoli awo kado ji a.
Hënk di ifah yi ulibra wi iwooŋ:
1. Pwul mboş (1.1-2)
2. Pawulu aţaŋ Timote (1.3-18)
3. Hum di di ñaaŋ ajaaŋ awo nangoli nanuura i Kriŧtu (2.1-26)
4. Hum di di bañaaŋ bajën bakluŋ kawo ţi ŋnuur ŋbaañşaani (3.1-9)
5. Pmëban kaliinŧ ţi pfiyaar (3.10–4.8)
6. Pţaŋ pbaañşaani na pwul mboş (4.9-22)
1
Pwul mboş
1 Nji Pawulu, i Naşibaţi aŋaluŋ nwo nanjañan i Yeŧu *Kriŧtu, aţu'ën ndo kaţup uko wi ubida unwoonuŋ ţi Yeŧu Kriŧtu wi ahoŋuŋ, 2 dpiiŧiiŋ, iwi Timote abuk naan i nŋaluŋ. Dñehan Naşibaţi Aşin nja na Yeŧu Kriŧtu Ajugun bawulu bnuura na mñaga babot bajoobţënu uhaaş.
Pawulu atëŋţën Timote
3 Dbeeb maakan Naşibaţi i nji kadëmanuŋ jibi bateem naan babiiŋ adëmana na uşal ujinţ. Dji kaduka ţi pñehana uŧejan na pnak, kaşë leşu. 4 Dleş mnkuul mi nu✡Natenan ţi Ulemp 20.37., aji kaŋal maakan kawinu kahilna kaŧum na mnlilan. 5 Dkak aji kaleş pfiyaar pi nu panjoonanuŋ. Pfiyaar mënţ pi pi bi Lowiŧ ateemu ñaaţ na Ëniŧ naan babiiŋ awoonaan uŧeek, dfiyaar bnuura kë pawohaŋ ţi iwi. 6 Ukaaŋ kë nji kaleşanu, iţij bnuura uţen wi Naşibaţi awuliiŋ wi mpafiiŋ iñen. 7 Na manjoonan Naşibaţi aanwul nja uhaaş wi blal, aţëp ţëp awul nja uhaaş wi mntëŋ, wi bŋalad na wi pţoorandër. 8 Wutan keeri kakowa pţiiniyaan uko wi Ajugun, wutan kakowara nji nwooŋ nakalabuş pa ul ; hajan na nji pa *Uţup Ulil Unuura, mnhina mi Naşibaţi manşë mando kaţënku. 9 Naşibaţi abuuranuŋ nja abot adu nja ŋwo biki nul. Kë uko mënţ uşë wo uunwoona ţi udo wi nja, uwoona ţi mñaga mi Naşibaţi aţëpnuŋ ţi Yeŧu *Kriŧtu awul nja. Ado bi şala şal undiimaan ji abi ado kapaş umundu aji añaga nja, 10 mnñaga mënţën mampën awinana hënkuŋ ţi ubi wi Yeŧu Kriŧtu nabuuran nja. Ul awatuŋ pkeţ abot aţëpna ţi Uţup Ulil Unuura adiiman ubida wi mnţo. 11 Naşibaţi aţu'ën kë nwo nanjañan anjaaŋ aţup kabot kajukan Uţup Ulil Unuura. 12 Uko waŋ ukaaŋ kë nji kahaj hënk, aşë wo mënkkowa ţiki dme bnuura Yeŧu Kriŧtu i nfiyaaruŋ abot ame kë ahina kaţijan bnuura uko wi ahankanaanuŋ te unuur uweek wi akluŋ kabi. 13 Doon kaţaş bnuura ŋţup ŋnuura ŋi iŧiinknuŋ ţi nji, mëbaan ŋa na pfiyaar na uŋal yi ŋyeenknuŋ ţi Yeŧu Kriŧtu. 14 Ţijaan bnuura uko unuura wi ahankaniiŋ, wi *Uhaaş wi Naşibaţi unwooŋ ţi nja ukţënkiiŋ iţijan.
15 Jibi imeeŋ, bañaaŋ bŧi biki uŧaak wi Aŧiya bawutanaan, Figel na Hermogen bawo ţi bukuŋ mënţan.
16 Dñehan Ajugun añaga biki katoh ki Oneŧifor ţiki atëŋţënaan ŋyaaş ŋŧum abot awo aankowaa wi batuhnuŋ. 17 Wi abanuŋ du Rom, aţëp ţëp ataman ţi pla'ën te adoo awinën. 18 Dñehan Ajugun añagi'a ţi unuur ubaañşaani. Ime kak bnuura jibi aţënknuŋ wi ŋwooŋ du Efeŧ.