Uţup wi Pawulu apiiŧuŋ
banfiyaaruŋ banfëţuŋ du uŧaak wi
Galaŧiya
Uţup ujuni
Kakaarta ki kawo ki Pawulu apiiŧuŋ banfiyaaruŋ biki Galaŧiya. Abi ya da ŋyaaş ŋtëb kaţup baka Uţup Ulil Unuura kë Bayuday na banwooŋ baanwo Bayuday baji baŧiinka kakak kafiyaar Yeŧu Kriŧtu. Uko wi Pawulu ajukanuŋ baka uwooŋ kë pfiyaar Yeŧu pahinan kado Naşibaţi aji bawo baŧool ţi kadunul. Wi bayaaŋ adoo jon kë Bayuday baloŋ başë ya du Galaŧiya aji bantohi biki banfiyaaruŋ biki Yeruŧalem badook baka. Baŧok uko wi Pawulu ajukanuŋ bŧi aji aanwo nanjañan na manjoonan, kë uko wi akjukanuŋ uunwo manjoonan. Baji na baka kë jibi banwooŋ baanwo Bayuday bafiyaaruŋ Yeŧu bawo kado kak uko wi bgah bi Moyiŧ bajakuŋ. Kë uko wi baţijanuŋ maakan uwo pwala kaŧëmp. Baji pwala kaŧëmp pahinanuŋ kado Naşibaţi aji bawo baŧool ţi këş ki nul.
Biki Galaŧiya bakak ado haŋ, kë Pawulu amee. Adeebaţ maakan wal mënţ ţiki mënţ pţaş bgah bi Moyiŧ pakdooŋ ñaaŋ awo naŧool ţi këş ki Naşibaţi. Uko mënţ ukaaŋ kë Pawulu apiiŧ biki Galaŧiya kadiiman baka kë Naşibaţi aanji haŋ. Pwala kaŧëmp pi bajakuŋ pawo kë uşal wi ñaaŋ uwo kawo ujinţ piş. Aţup baka aji Naşibaţi ado Abraham kë awo naŧool ţi kadunul ji abi do kawala kaŧëmp. Pfiyaar ţañ pajaaŋ pado ñaaŋ awo naŧool ţi këş ki Naşibaţi, kë pul pakaaŋ ahil kado ñaaŋ aka ubida unliluŋ Naşibaţi.
Hënk di ifah yi ulibra wi iwooŋ:
1. Pawulu awo nanjañan na manjoonan, uko wi akjukanuŋ kak ujoonani (1.1-10)
2. Naşibaţi adatuŋ Pawulu pa awo nanjañan (1.11-24)
3. We wi Uţup Ulil Unuura ujakuŋ na manjoonan (2.1-21)
4. Pfiyaar ţañ pahilanuŋ kado ñaaŋ abuur (3.1–4.31)
5. Nawulën ŋŋalad, ŋwut Uhaaş wi Naşibaţi uţëlëş nja ubida (5.1–6.10)
6. Pwul mboş pbaañşaani (6.11-18)
1
Pwul mboş
1 Nji Pawulu *nanjañan i Yeŧu kapiiŧanaŋ. Mënţ bañaaŋ badu'ënuŋ pa nwo nanjañan. Kë pwo nanjañan pi naan paanţëpën ţëpën ţi ñaaŋ aloŋ. Ţi Yeŧu Kriŧtu na Naşibaţi Aşin annaţanuluŋ ţi pkeţ i i nwoonuŋ nanjañan. 2 Nji na bayiţun ţi Kriŧtu bŧi banwooŋ na nji ŋwul banfiyaaruŋ Yeŧu biki Galaŧiya bŧi mboş. 3 Dñehan Naşibaţi Aşin nja na Yeŧu Kriŧtu Ajugun ayuuj an bnuura na mnjeeh.
4 Jibi Naşibaţi Aşin nja aŋaluŋ, Kriŧtu awul ubida wi nul kapënanaan ipekadu yi nja ŋhilna ŋbuur ţi umundu wi nţa wi, unŧumuŋ mnŋot. 5 Naşibaţi i i ŋwooŋ kadëman te mnţo. Uwo haŋ.
Ukaha Uţup Ulil Unuura uloolan ţañ
6 Dñoŋar jibi naŧaruŋ ţi pkokan Naşibaţi kafeţ. Aţëpna ţi bnuura bi Kriŧtu adu an, kë naşë wo ţi pţaş uţup umpaţi wi bajakanaŋ aji uwo Uţup Ulil Unuura. 7 Na manjoonan, uunka nin Uţup Ulil Unuura uloŋ umpaţi. Kë bañaaŋ baloŋ başë wo ţi aŧokan ŋşal, abot aŋal pţëlëş Uţup Ulil Unuura wi Kriŧtu. 8 Kë woli un ţi ŋleefun lah, këme uwanjuŧ uloŋ umpënnuŋ baţi, ŋbiiŋ aţupan uţup umpaţi na wi njukanuŋ, Naşibaţi kafëpun. 9 Ŋbi ţupan kë nkak akakalëş nţa : woli aloŋ aţupan uţup umpaţuŋ na wi nadooŋ abi yeenk, Naşibaţi kafëpa.
10 Hënkuŋ naşal aji hum ba? Dla la pdëm ţi bañaaŋ oo këme ţi Naşibaţi? Dla la pŋalana ţi bañaaŋ i? Woli dla la lah pŋalana ţi bañaaŋ te hënkuŋ, mënkwo nalempar Kriŧtu.
Kriŧtu aduuŋ Pawulu pa awo nanjañan
11 Dŋal name, an bayiţ naan, kë Uţup Ulil Unuura wi nji kaţupuŋ uumpënna ţi uşal wi ñaaŋ. 12 Nin mënţ ñaaŋ awulnuŋ wa këme ajukanaanuŋ wa, Yeŧu Kriŧtu ul ţi uleeful adiimanaanuŋ wa. 13 Naŧiink bŧi jibi nwooŋ ţfa wi nhumuŋ mëban bgah bi bayuday. Name jibi ntamanuŋ maakan ţi phajan banfiyaaruŋ Yeŧu, banwooŋ pntaali pi Naşibaţi. Dla pgar baka. 14 Dbi pel biki kawuuŋ naan baŧum ţi pţaş bgah bi bayuday, abot amëban udolade wi bateem naan maakan apel baka. 15-16 Kë Naşibaţi, ţi bnuura bi nul, aşë datën apaţëş ji mbi ndo kabuka, adu'ën aji nwo nalemparul. Kë wi uliluluŋ, adiimanaan Abukul pa ndola ameeţana ţi banwooŋ baanwo bayuday. Wal mënţ, mënwinar na nin ñaaŋ aloŋ. 17 Mëndoo ya ya Yeruŧalem du banwo'ënuŋ banjañan uŧeek, aşë baa ţëp ţëp aya ţi dko mënţ uŧaak wi Arabiya. Dul di mpënnuŋ akak ubeeka wi Damaŧ.
18 Wi ŋşubal ŋwajanţ ŋaţëpuŋ wi wi mbaaŋ aya Yeruŧalem ameer na Piyeer, aţo na a ŋnuur iñeen na kañeen. 19 Ţi banjañan, ul ţañ i i nji nwinaŋ, mënwin bandukiiŋ. Dbot awin Yakob aţa Ajugun. 20 Naşibaţi ame kë mënkţilan wi nji kapiiŧanaŋ uko wi. 21 Wi mpënnuŋ Yeruŧalem aşë ya ŋmbaŋ ŋi Ŧiri na Ŧiliŧiya. 22 Kë banfiyaaruŋ Kriŧtu biki uŧaak wi Yuda başë wo baambaaŋ kawinarën. 23 Baŧiinka ŧiink ţañ kë bakţup aji : « Ñaaŋ ambiiŋ ahajan un ţfa akak hënkuŋ ajukan bgah bi abiiŋ ado na pŧok. » 24 Kë başë wo ţi pdëman Naşibaţi ţi uko wi naan.