4
Unŧaayi Uweek ula pguur Yeŧu du pndiiş
(Markuŧ 1.12-13; Luk 4.1-13)
1 Wi Yeŧu apënaŋ pën du meel kë Uhaaş wi Naşibaţi uşë ñooţa du *pndiiş, kë *Unŧaayi Uweek ukdo na pguura ado buţaan. 2 Aţo ŋnuur na ŋŧejan iñeen ŋbaakër bë aandee, wi ŋaţëpuŋ, kë ubon uşë de'a. 3 *Naguuru kë aşë ñoga aji : « Woli iwo Abuk Naşibaţi, jakan na mnlaak mi mankak ipoom. » 4 Kë aŧeema aji : « Upiiŧana aji :
“Mënţ uko ude ţañ umëbanuŋ ubida wi ñaaŋ
ŋţup bŧi ŋankpënuŋ ţi mntum mi Naşibaţi ŋa.”✡Pleşan 8.3. »
5 Kë Unŧaayi Uweek ukak añooţa du Yeruŧalem ubeeka uyimanaan, apayana du bţuk bi *Katoh Kaweek ki Naşibaţi duuţ 6 aşë ji na a : « Woli iwo Abuk Naşibaţi, klut kajot. Kë hënk di di upiiŧuŋ ţi Ulibra wi Naşibaţi aji :
“Kë Naşibaţi aluŋ kaji na ŋwanjuŧ ŋi nul
ŋajeju ţi iñen
kaţi ihubta ţi plaak ploŋ.”✡Kañaam 91.11-12. »
7 Kë Yeŧu aji na wa : « Ukak apiiŧana aji :
“Iinwo kado katen me Ajugun Naşibaţi i nu ahinan pdo uko wi ajakuŋ.”✡Pleşan 6.16. »
8 Unŧaayi ukak apayana du pnkuŋ ploŋ pweek maakan aşë diimana ŋŧaak bŧi ŋi umundu na mndëm mi ŋa, 9 aşë ji na a : « Dwulu iko yi bŧi woli iŋup adëmanaan. » 10 Wal mënţ kë Yeŧu aşë ji na wa : «*Ŧatana, ţëpan iya! Upiiŧana aji :
“Ajugun, Naşibaţi i nu ţañ i i iwooŋ kadëman,
kë ul ţañ i i iwooŋ kado kalempar.”✡Pleşan 6.13. »
11 Wi wi unŧaayi uşaaŋ aya aduka. Kë ŋwanjuŧ ŋaşë bi añoga, alempara.
Yeŧu awugşa akak Galilay
(Markuŧ 1.14-15; Luk 4.14-15)
12 Baţup Yeŧu aji bawat *Yowan nabatŧaar ukalabuş. Wi aŧiinkuŋ uko waŋ, awugşa wal mënţ akak du uŧaak wi *Galilay. 13 Apën du ubeeka wi *Naŧaret aya afëţ du wi Kapernawum. Uwo du kabaŋ ki bdëk, kañog ŋŧaak ŋi Ŧabulon na Neftaliya. 14 Uko mënţ uyuuj kë uko wi *Iŧayi *Naţupar Naşibaţi abiiŋ aţup udolanaa :
15 « An, ŋŧaak ŋi Ŧabulon na Neftaliya,
naññogung bdëk bi Galilay du plut pi Yordan,
nanwooŋ du Galilay di banwooŋ baanwo bayuday bafëţuŋ!
16 Pntaali panwooŋ ţi bdëm
pawin bjeehi bweek,
bjeehi bweek bapën
ajeehan bañaaŋ banwooŋ du dko di bdëm bi pkeţ. »✡Iŧayi 9.1-2.
17 Wal mënţan waŋ kë Yeŧu aşë jun pjukan aji : « Nawutan pjuban, naţëlëş ŋbida, ţiki *Pşih pi Naşibaţi pañog pii pi. »
Yeŧu adu baţaşarul babaakër baŧeek
(Markuŧ 1.16-20; Luk 5.1-11)
18 Unuur uloŋ, Yeŧu apoş ţi kabaŋ ki *bdëk bi Galilay, aşë win biinţ batëb banţaaruŋ, Ŧimoŋ andu'aniiŋ Piyeer, na Andre, kë bakfël bridiya du bdëk, bawo baŧuh. 19 Aji na baka : « Naţaşaan, dkakanan baŧuh bañaaŋ. » 20 Ţi dko mënţ kë babi duk duk iridiya, aţaşa.
21 Aya alow btiişu akak awin batëb banţaaruŋ, *Yakob na *Yowan babuk ñiinţ aloŋ anwooŋ katim ki Ŧebede. Bawo ţi bţeem na aşin baka, awo ţi pboman iridiya, kë aşë du baka. 22 Ţi dko mënţ, kë baduk aşin baka na bţeem, aţaşa.
Yeŧu ajukan akuţ ajeban bañaaŋ
(Markuŧ 1.39; Luk 4.44; 6.17-18)
23 Yeŧu aji ñaay na uŧaak wi *Galilay bŧi kajukan ţi itoh iñehanaani, kabot kaţup *Uţup Ulil Unuura wi *Pşih pi Baţi, kajeban mmaak bŧi na pţakëm bŧi ţi bañaaŋ. 24 Katimul kapënala ţi uŧaak wi Ŧiri bŧi, kë başë ji baţija bamaakal bŧi na biki iko iloŋ iknooranuŋ: banwooŋ na ŋnŧaayi, bankjotuŋ kako, na banyojuŋ iñeen na ihoţ kë aji jeban baka. 25 Bañaaŋ baŧum maakan baji babi kaţaşa, kawoona Galilay, uŧaak wi Ŋbeeka Iñeen, ubeeka wi Yeruŧalem na uŧaak wi *Yuda bŧi na uŧaak unwooŋ du plut pi Yordan.