12
Sk'aneal Yet Jix Sec' Oc Jun Ambal Suk'uk'i Sab Ix María Yin Jesús
(Mateo 26:6-13; Marcos 14:3-9)
1 Jobix oj toj yoc jun k'in pascua bey Jerusalén, jix apni Jesús bey Betania bey caan naj Lázaro, naj jix pitzc'u a yu Jesús. 2 Ja' yet jix apni Jesús tu', jix oc jun miman lo' yu eb yu naj. Ja' jun Lázaro tu', jix low yetoj eb. Ja' ix Marta chi i'wi eltoj lo'be. 3 Jal ix María xin, i'bil oc snan litro ambal suk'uk'i sab yu ix, chi yij nardo.*Nardo, ja' jun tujan suk'uk'i sab chi tit bey tx'otx' India. Yu caw naat chi tita, yuxan caw ey stool. Chi c'ubale yul wan net tol watx' smajil. Ja' jun ambal tu' caw ey stool. Jix apni c'al ix bey Jesús, catu' jix sec'on oc ix yin yajan naj. Jix lawi c'al tu', jix sjo'ontaj ix yetoj xil. Jun txolan jix no el yul jun na tu' yu sab. 4 Ja' jun scuywom Jesús chi yij Judas, sc'aal Simón Iscariote, naj t'inan yaon oc Jesús yul sk'ab camich. Ja' jix alon jaxca ti':
5 —Ja' jun ambal suk'uk'i sab ti', ey mi junoj oxeb cien quetzal stool.†Jix yal Judas: “tres cientos denarios.” Tol oj wal jix cu txon el oj, catu' chi kak'on stool tet eb meba', ẍi naj, chi tz'aj yaloni. 6 Pero tu' c'al chi tz'aj yala. Man yel oj tol chi ok' sc'ul naj yin eb meba'. Yutol c'ubam tumin yei, yu jun tu', yuxan ja' jix ochen jix tz'aj c'uba stool tu', catu' chi yi'on can el nioj yet yin ch'en, yutol elk'om naj. 7 Jix yalon Jesús tet naj jaxca ti':
—Bej ja tzuon ix. Yutol ja' jun yambal ix suk'uk'i sab ti', jix sc'uba ec' ix, yu jin bonle yet sc'ual jin mujbanil. 8 Ja' eb meba' tu', ey c'al ec' eb je yetoj. Jal jin xin, man tobal k'inal oj ey jin ec' je yetoj, ẍi Jesús tet naj.
Eb Jix Ochen Scamichal Naj Lázaro
9 Ec'al eb Israel jix abeni, tol ey ec' Jesús bey Betania, yuxan jix to eb yila. Man asanne oj Jesús chi yoche chi yil eb. Pero chi yoche pax chi yil yin naj Lázaro eb, yutol jix pitzc'u a naj xol eb camnaj yu Jesús. 10-11 Yu spitzc'ubail naj Lázaro tu', yuxan ec'al eb Israel jix yaoc sc'ul yin Jesucristo. C'am xa chi yaoc sc'ul eb yin eb yak'omal xaambal eb Israel tet Dios. Yu jun tu', yuxan jix slatine el sba eb yaawil yak'omal xaambal eb tu', catu' chi yochen eb chi smak' cam naj Lázaro tu' pax oj.
Ja' Yet Jix Oc Jesús Bey Conob Jerusalén
(Mateo 21:1-11; Marcos 11:1-11; Lucas 19:28-40)
12 Ec'al ánima jix apni bey Jerusalén yu sk'in pascua. Ja' yet jun c'ual tu', jix yaben eb tol lalan yapni Jesús titu'. 13 Yu jun tu', ec'al eb jix i'on el xaj te' ch'ib. Jix yi'ontoj eb, catu' jix to eb ẍa'on Jesús. Jix a yaw eb yin ipal, jix yalon eb jaxca ti':
—Yu wal dios. Kal wej watx' k'ane tet jun chejbiltej yu Dios ti'.*Salmos 118:25, 26 Kal wej watx' k'ane tet naj cu reyal jaon Israel jon ti', ẍi eb. 14 Jix ilcha jun no' burro yu Jesús tu'. Catu' jix a yiban no' jaxca tz'ibebil can yul An Juun bey chi yal jaxca ti':
15 Jex a Sión, manchej jex xiwi.
Il wej sjul je Reyal.
Ey a yiban jun no' yune' burro, ẍi An Juun tu'.*Zacarías 9:9 16 Ja' yet jun c'u tu', ma na'cha el wan ti' yu eb scuywom Jesús. Ja' to yet jix i'le pax a Jesús tu' satcan, catu' jix sna'ontej eb, tol sk'aneal Jesús tz'ibebil can yul An Juun tu', jaxca c'al ye can tz'ibele can tu', quey tu' jix yun yel oc oj. 17 Ja' eb ey ec' yetoj Jesús, yet jix yawten eltej Lázaro bey mujan octoj, yet jix pitzc'u a oj, jix yal el tzet jix yil eb tu'. 18 Yu jun tu', yuxan jix to eb ánima tu', sto ẍa'on Jesús, yutol jix yab sk'aneal jun milagro jix yun naj. 19 Jix yalon eb fariseo jaxca ti':
—Ja' tinani' c'am xa tzet watx' chi kune. Ilala, masanil ánima chi oc yetoj, ẍi eb.
Ey Wan Eb Griego Chi Yoche Chi Yil Yin Jesús
20 Ey wan eb griego jix apni bey Jerusalén bey k'in tu', yu yi'on ey sba eb tet Dios. 21 Ja' eb tu', jix apni eb sc'atan naj Felipe a Betsaida yul yet Galilea. Catu' jix yalon eb tet naj jaxca ti':
—Cha wamigo, chi koche chi kil yin Jesús, ẍi eb. 22 Jix to naj Felipe yalon tet naj Andrés, catu' jix to eb scawanil yalon tet Jesús. 23 Catu' jix yalon Jesús tu' tet eb jaxca ti':
—Jainti', Ak'bil Wopiso xol eb ket animail yu Dios, ja' tinani', lalan sjul yorail xeclo el oj, tol yel miman wel oc apnoj. 24 Caw yel chi wal e ex, k'inaloj ey junoj ixim sbak' trigo chi can yiban tx'otx'. Tu' c'al chi can jaxca tu'. Ta chi mujlei, jaxca tol chi cami, pero chi a pax jul oj, miman xa sbak' chi yak'a. 25 Ja' mac asanne sk'inal ey yel oc apnoj yul sat, oj lawoj can el sk'inal tu'. Jal pax mac c'am yel oc apnoj sk'inal yul sat yul yiban k'inal ti' xin, ja' ton eb tu' oj ẍa' sk'inal tol ey c'al yin tobal k'inal. 26 Ta ey mac chi ochen chin ak'on servil, tzajlo ojab wintaj an, yet watx' ja' bey ey jin ec' oj, ja' tu' oj ey pax ec' oj. Ta ey mac chin ak'on servil, ja' jin Mam oj pajtzen tet eb, miman oj yun yel oc eb, ẍi Jesús.
Jix Yaltej Jesús Tzet Oj Yun Scami
27 Ja' tinani', caw chi oc pitz'an cus c'ulal yin jin pixan. Pero, ¿tzet oj wute walon an? ¿Tumi oj wal tet Dios jaxca ti', “Mamin, col jin el yul sk'ab jun sya'ilal oj jul wiban ti' an,” tumi ta jin chi? Yutol yu ton jun ti', yuxan chin jul an. 28 Mamin, txeclo ojab el oj, tzet utbil tol miman ja wel oc apnoj, ẍi Jesús.
Jix lawi tu' xin, jix yaben yoc jun k'ane eb bey satcan, jix yal jaxca ti';
Jix jin tx'oxlei, tol miman wel oc apnoj. Ja' tinani' xin, oj jin tx'ox junel xa, ẍi jun k'ane tu'. 29 Ja' eb ánima ey ec' titu', jix yab jun tu' eb, yuxan ey eb jix alon jaxca ti':
—Tejan c'u jun jix bilwi tu', ẍi eb. Ey eb xin:
—Tejan ángel junoj jix k'anab eytej tet Jesús ti', ẍi eb. 30 Yu jun tu', yuxan jix yal Jesús tet eb jaxca ti':
—Man wu oj, yuxan jix al-le eytej wan ti', pero tol je yu. 31 Ja' tinani', ja' eb ey yul yiban k'inal ti', oj na'le oc yin eb. Catu' oj jin k'ojon el jun chi ak'wi mandar yul yiban k'inal ti' yin yopiso. 32 Jal jainti' xin, ja' yet oj jin i'le a oj, oj wawtetej masanil ánima e in an, ẍi Jesús. 33 Jix yal naj jaxca tu', yu tzet utbil oj yun scami. 34 Catu' jix yalon eb ánima tet naj jaxca ti':
—Ja' yul an ley ey ec' e on, ja' tu' jix kab tzet utbil tol ja' jun Cristo, ey c'al ec' yin tobal k'inal. Yu jun tu', ¿tzet yuxan cha wala, tol ja' jun Ak'bil Yopiso yu Dios xol eb ket animail, sowalil oj i'le a oj? ¿Mac txequel jun Ak'bil Yopiso yu Dios cha wal tu'? ẍi eb tet naj. 35 Catu' jix yalon tet eb jaxca ti':
—Jain chi wak' saj k'inal bey je pixan, jain ey jin ec' je nan je xol tinani', pero nianxane tiempo ey jin ec' oj. Caw che wa'ne je beybal, yajban tol ey jin to ec' jayeb oj xa c'ual je yetoj. Ta c'amaj, oj somcha el je c'ul. Jaxca junoj mac txequel chi bey xol k'ej k'inal, c'am chi ske' yilon bey chi toi, quey tu' oj yun je yel oc apnoj. 36 Jainti', laan jin jaxca saj k'inal an. Yu jun tu', yuxan a wej oc je c'ul win an, yajban tol ey jin to ec' je yetoj, catu' chi wak'on saj k'inal bey je pixan yin junelne, ẍi Jesús tet eb. Jix lawi c'al yalon wan ti', catu' jix eli. Jix yewba el sba tet eb.
Ma Yaoc Sc'ul Eb Israel Yin Jesús
37 Cax c'al ec'al milagro jix x'ox Jesús tet eb, pero toj wal yu jun tu' chi yaoc sc'ul eb yin naj. 38 Quey ton tu' jix yun yel oc tzet albil can yu naj Isaías, ẍejab Dios, yet jix yalon can jaxca ti':
Mamin, ¿mac wal junoj jix yaoc yin sc'ul tzet jix kala? Cax c'al jix ja tx'ox ja wipal tet eb, pero c'am eb jix yaoc sc'ul ja win, ẍi can Isaías tu' yul An Juun Tz'ibebil can oj.*Isaías 53:1
39 Yuxan ma c'al ta' ske' yaon oc eb yin sc'ul. Ila, tol albil pax yu naj Isaías junel xa jaxca ti':
40 Ja' Dios, jaxca tol ja' chi majchen sat eb, chi ak'on cawxo sna'bal eb, yet watx' jaxca tol c'am chi ilwi eb, catu' c'am chi na'cha el yu eb, yet watx' c'am xa chi ske' sq'uexon sna'bal eb.
Yu jun tu', ja' Dios, ma yak' lawoj spenail eb, ẍi Isaías tu'.*Isaías 6:10
41 Yalnaj can naj Isaías wan ti', yutol yilnaj swatx'il Jesús, yuxan ja' ton sk'aneal ti' albil can yul An Juun Tz'ibebil can oj. 42 Cax c'al albil can jaxca tu', pero ey eb Israel tu' jix yaoc sc'ul yin Jesús. Man asanne oj eb comon ánima, pero ey pax eb yaaw, ec'al eb jix yaoc yin sc'ul. Asan tol c'am chi x'ox el sba eb, yutol chi xiw eb tet eb fariseo, yutol tala chi ujtele eltej eb yul snail sculto eb yu eb. 43 Jix yute sba eb jaxca tu', yutol chi yoche eb tol miman yel oc apnoj eb yul sat ánima. C'am chi sna' eb ta tol ey yel oc apnoj eb yul sat Dios.
Ja' Sk'ane Jesús Oj Na'on Oc Yin eb Ánima
44 Ja' naj Jesús, yin ipal jix k'anab eltej xol ánima jaxca ti':
—Ja' eb chi yaoc sc'ul win an, man asanne oj win chi yaoc sc'ul eb. Chi ya pax oc sc'ul eb yin jin Mam jix jin chejontej. 45 Ja' eb chin aon oc yin sc'ul, lalan pax yaon oc jun mac jix jin chejontej eb yin sc'ul. 46 Jainti', jix jin jul yu wak'on saj k'inal yin spixan eb ánima yul yiban k'inal ti', yet watx' ja' eb chi yaoc sc'ul win an, c'am xa k'ej k'inal yin spixan eb. 47 Ja' eb chi aben jin k'ane, ta c'am chi sjije eb, man jain oj, oj waoc sya'ilal eb. Yutol man yu oj waon oc sya'ilal ánima, yuxan jix jin jul yul yiban k'inal ti'. Pero yu jin colon el eb, yuxan jix jin jul an. 48 Ja' eb c'am wel oc apnoj yul sat, eb c'am chi sjije jin k'ane, ey xa jun tujan oj aon oc sya'ilal eb, ja' ton jin k'ane chi wal ti' an. Ja' jin k'ane ti', oj aon oc sya'ilal eb yet slawub c'ual. 49 Yutol man yul oj wet chin k'anab jin txojli. Ja' jin Mam, jun jix jin chejontej, ja' chi ak'on ẍejbanil e in tzet chi wal an. 50 Wotaj an, yu ẍejbanil tu', chi ske' ẍa'on can sk'inal eb tol ey c'al yin tobal k'inal ta chi yaoc eb yin sc'ul. Yu jun tu', jaxca jix yun yalon jin Mam e in an, quey tu' chi wute walon pax an, ẍi Jesús.