Duwe Jesújañga ají múldigaba guaxal gaxanekue ajanashatone kalta zʉñgajienapanaldiamak
Meja ai kalta gauwane: Aldukaja jalde kalta gauwagáñga, “Aldukaja Duwe Jesú zʉnekuane shalda” gauwane. Eñki juldiú saná naldagálde. Aldukaki Pábulduja Duwe shalda san san guashi neyatogatshak anuñka juizha agapa neyatone (Ajsh 16.10-17; 20.5-15; 21.1-18; 27.1–28.16), naldatshak méldiku nane (Kls 4.14).
Mekuetshi kalta gauwane: Jalde kaltaki “Aldukaja Duwe Jesú zʉnekuane shalda” janañga ezua izhgajañguxa Teyupildu axezhukatshi agakauwatshak, saldiñga Duwe ipananekuetshi jiaga agakauwane nakldá.
Jinak ai kalta gauwane: Aldukaja jalde kalta gauwatshak, Duwe Jesú ají múldigaba guaxal gaxanekue sakí shizhiyatone, sakí ajanashatone shalda gauwane. Ekíga na, Jatetshi Alduna kaxagatangueni, axañga misha Duwe zʉnekuane shalda Jeldusaldéñka shizhaldiyaldinik Juldeyaxa gualdinik Samaldiaxa shizhaldiyaldinik aldiweki kagi nahauxa shizhaldiyapanane (1.8). Ekíga na, kasak Duwe ipananekue sakí ashekuane shalda gauwane. Pábuldu Duwe zʉnekuane shalda shizhiji san san neyatone shalda matshuwi zʉñmeyatshak jiaga, aldiwe sakí atshiji shuaneki zʉñmeyazhá.
Ji, ji shalda guashi jalde kalta gaune:
1. Kasak misha ji shalda kakbene (1.1-26)
2. Duwe Jesú zʉnekuane shalda Jeldusaldéñka akuagapanane (2.1–8.3)
3. Duwe Jesú zʉnekuane shalda Samaldia, Juldeya baxe akuagapanane (8.4–9.43)
4. Duwe Jesú shalda juldiú naldagáldekuek agabene (10.1–28.31)
a. Duwe Jesú zʉnekuane shalda kagabeyapanane (10.1–12.25)
b. Pábulduki Duwe shalda guashi kasak nene (13.1–14.28)
c. Jeldusaldéñka ajuizhaldeklde (15.1-35)
d. Pábulduki Duwe shalda guashi mutshuane nene (15.36–18.22)
e. Pábulduki Duwe shalda guashi maikjuizhane nene (18.23–20.38)
f. Pábulduki akugueni Aldumaxa awaldene (21.1–28.31)
Duwe Jesújañga
ají múldigaba guaxal gaxanekue
ajanashatone
1. Kasak misha ji kakbene
1
(1.1-26)
Jatetshi Alduna kaxagatanaldixa kakbene
1 Duwe Teyupildu, nas kasak kalta mikuzgaunugeki*1.1 Aldukaja “Duwe Jesú zʉnekuane shalda” agakauñguenik jalde kalta agakaune. Duwe Jesú jai kagik izhoguéñ saldiñga atshatone, shizhiyatone 2 Ajateja jékaldaxa ulditshixaldiéñ yo shalda mikbeyananuge. Amak nitshigagá nogueñga, Duwejañki Jatetshi Aldunaja aksanegatshakna, ají múldigaba guaxal gaxaldixa izhgakuxanekue†1.2 Lk 6.12-16. Jai kagi Duwe Jesú ají jiba atshapanatshak 12 aldéñ shaxaldiyaldixakue kezhgakuxá. Aikuega na Duwejañga ají múldigaba guaxal gaxaldixa kezhgakuxanekue. sakí ají jiba axajanashaldiamak kakbeyá. 3 Guatshak Duweki guiyaba tuwi shuiguenik mokue izhgaldagueni, ají múldigaba guaxal gaxaldixakuek 40 ldiuwi anuñka juizha aldéñ naldiñga kakizhañká. Ekí kakizhañkaji na, “Duweki beñga nuká nakbatú” kakldekshaldiamak matshuwi nalda kaxatshá.✡1.3 Mt 28.16-20; Mlk 16.12-19; Lk 24.13-51; Jñ 20.19–21.25; 1Kt 15.5-7 Atshaga na, Saldiñga netshi Jatejañga kágubakue sakí janshagatsaldi kaksanexaldixa shalda akldé shi kaxaldiyane.
4 Ezua ldiuwañ Duwe Jesúja ají múldigaba guaxal gaxaldixakue na izhogueñga ekí atshakue kakbeyá:
—Kaigabeñki jai Jeldusaldéñ zhinik neyagába, Najateja ají Alduna miñgakaxaldixa miñmeyananega, nas jiaga aiga miñmenuge✡1.4 Lk 24.49; Jñ 14.16-17; 14.26; 15.26; 16.7-15 jiaktuwi zhe minoxaldí. 5 Akze, Juañ nik majaukshakuejañki nik nuxa mimajaukshanane. Ne anuñka ldiuwi zegatshak zʉnake Jatejañga ají Aldunak mimajaukshi na, ai Alduna maiñldi auxaga miñkaldaldaldiamak miñgexaldixa nakldá✡1.5 Ajsh 2.1-4 —na Duweja kakbeyá.
Duwe Jesú jékaldaxa nitshine
6 Gueni Duwe Jesúja ají múldigaba guaxal gaxaldixakue na juizhaldegatoguéñ ekueja ekí agalduká:
—Nauwijí Sáñkalda, ¿kaiga shi axautshi sanákue zʉñsanekakue magubiyaldinik, ma niñkauwañki Isayélkuañ maldazʉñsanegapanaldixa na?‡1.6 Jinake ekí agaldukazhá. Kauwizhéñ Jateja ezua kekualdal gaxaldixa guakldane, ega na niuwabak sáñkalda kakiyaldaxaldixa ajañguxa nalguák.
7 Guñguake Duweja ekí kakiyó:
—Aiki Najateja aldéñga niuwi axaldahamak ji ldiuwañ amak zekualdixa janaktune. Ne maiñga ai miñkualdakue miñgatsaldakí nakldá. 8 Naldatshak ekí miñkualdakue: Jatetshi Alduna auxaga miñkaldaldaldiamak mipanatshak, ají kama jiaga mipanaldixa. Amak mipanaldinik nashaldá, atshaté natuminamak miñguaxaldixa. Jai Jeldusaldéñ misha guaxabipanaldinik Juldeya eñgui baxe nahauxa ekíga guashi na, akldé Samaldiaxá guashi, aldiweki kagi maxáiñtaba izhgekuauxa nashaldá miñguaxaldixa nakldá.✡1.8 Ajsh 2.1–8.3; 8.4-25; 13.1-3
9 Ekí Duwe Jesúja kakbeñgueni kauwizhéñ atuaté aldogueñga, jékaldaxa awalditshigatshak mauwixa tuasá.✡1.9 Mlk 16.19; Lk 24.50-51 10 Ekí nitshiguake alnobaxa za azatú aldogueñki, tua kakzegagáñga mozhua sigí zhakuá abutshi ijuakuekue§1.10 Ekueki Jateja guaklde uldeñkakue. kauwizhesañ kakizhañká. 11 Gueni ekí kakbeyá:
—Maiñ Galdildeyaxa zaldakuek, ¿jinak shi alnobaxa zañga stu minók? Akze, ejié Duwe Jesúki maiñ nugéñ zhinik jékaldaxa sakí awalditshigaté mituamakbeñga mokue ega na kagik zabaldixa nakldá.
Matiá niñkauwañki Juda naldataldaldé ishkakuxane
12 Ekí zeguake Duweja ají múldigaba guaxal gaxaldixa kezhgakuxanekue gaxa akshá zeñka Oldibu axezhogeñka ashekualguenik mokue Jeldusaldéñ aldé. Ekí aldeyatshake kauwijí guiyabaja izhgasekué ldiuwañki mitsá nuxa zhikldoshi neyakue guagauxabé na zaldá.*1.12 1 “kilómetro” 13 Exa aldeyatshake juwí kauwizhéñgaba ashekueñka mozhua zeñka saldi alditshí. Ekueki ekí axezhukakue: Péguldu, Juañ, Santiaku, Andaldé, Pildipi, Tumás, Baltoldomé, Mateyu, Santiaku, eñki Alpeyutshi asukuá. Ezuañki Simóñ, eñki axautshi sanákue kauwijí kagixa sanekakue akzʉxaitshaldiamak niji izhuka. Ezuañki Juda, eñki Santiakutshi asukuá na naldá.✡1.13 Mt 10.2-4; Mlk 3.16-19; Lk 6.14-16 14 Ekueki Duwe ipananekue, munzhi Duwe agauneka nanekue, ajaba Maldiya, Duwetshi aldanikue juizhi Jatek axazakuaxaldiamak ajuizhaldegamakga abá naldakí ajuizhaldeka na naldá.
15 Atshak baxañga na, Duwe ipananegaba anuñka 120 ajuizhaldegatoguéñ, Péguldujañki kauwikenáñ izhgaldagueni ekí kakbeyá: 16 “Gajakuañ, mauzeñga Jatetshi Aldunaja nauwibama Dabí aksanegatshak Juda shalda Jatetshi múldigabak gaushanamak zegakue zanamak zeklde. Judajañki Duwe guxaldixakue amak akuxaldiamak uldenane. 17 Akze, Judaki Duweja naldiñga nasʉñ nañga agatsé shagitiyakualdixa izhgakuxane nalguák, amak nasʉñ nañga axazauñka nane.
18 ”Juda ekí Duwe izhguashi sha atshane shalda agasabine, ai paldatak na ezua kagi jabí.†1.18 Mt 27.7-8. Ai kagiki Judatshi ajañguxa. Jinak naldakí. Judak paldata agasabinega aldéñ shuigueni Jatek múldigaba agaskaitshixakuetshi sáñkaldakueja ai kagi ajabine nak. Exaki shuigueni sáñkalda zhikjiuwi mual akjienatshake dzhizha akduzbenatshake, ganuksha akzʉxaitá. 19 Guñgueni saldiñga Jeldusaldéñka ashekuekueja ekí zeklde kakwasheguakna, ai kagiki Aseldama axeyaté. Kauwixauklduañki ‘abi zuldanéñ’ guashi.”✡1.18-19 Mt 27.3-8
20 Guñgueni Pégulduja ekí jiaga kakbeyá: “Zubeyakue xaltek e shalda ekí sezheklde:
‘E tshuxaki ni me izhogazhákldegaldi, sʉnjá shi zeshí.’✡1.20 Sal 69.25
Ekí jiaga gauwanane:
‘Ají jiba axautshija niñkauwañki agipaná shi gui.’✡1.20 Sal 109.8
21 Akna e naldataldaldéki ezua izhgakugakue zʉñgatsegashá. Aiki nasʉñ Duwe Jesúja shi zʉñkaldiji zʉñgapa izhonauxa izhonega naldakue. 22 Akna Juañja Duwe nik jaukshiñguenik zhinik nauwikenáñ izhoshiñga jékaldaxa awalditshinéñ yo, nasʉñ nañga izhone naldakue. Jinake naldakí. Eñki nasʉñ nañga ‘Duwe Jesúki shuiguenik izhgatene tunugamak nzha’ guashi zʉñgaunexaldixa nak.”
23 Ekí kakbeyatshakna amak naldakakue mozhua ajañgui akuák. Ekuega na, ezuañki Jusé Balsabá, Justu jiaga akuaka. Ezuañki Matiá axezhuka. 24 Ekí ajañguñguenik Duwe Jesú axazakuagatoguéñ, ekí agabeyá: “Nauwijí Sáñkalda, mañki aldunaxa zʉñnegatogauxa mikuegaba. Akna jejié mozhua nekue mielde izhgakuxamalde zʉnatuñsha guwá. 25 Eñki Juda naldataldé mixazauwi, mañga mijí múldigaba guaxal makaxaldiamak. Akze, Judaki shi migitixa mixazauñka nalgué, ai jiba majañgueniki shuigatshake neyakue agatsalgualdi ne guane.” 26 Ekí axashishiñgueniki, mielde ai naldaka ne atualdiamak ajanashiji na, aldiyatshake Matiá ne atuñguakna e ishkakuxá. Atshak zhinik na Matiá jiaga, Duwe Jesújañga 11 ají múldigaba guaxal gaxaldixa izhgakuxanekue nañga agatsé atualdá na gua.
*1:1 1.1 Aldukaja “Duwe Jesú zʉnekuane shalda” agakauñguenik jalde kalta agakaune.
†1:2 1.2 Lk 6.12-16. Jai kagi Duwe Jesú ají jiba atshapanatshak 12 aldéñ shaxaldiyaldixakue kezhgakuxá. Aikuega na Duwejañga ají múldigaba guaxal gaxaldixa kezhgakuxanekue.
✡1:3 1.3 Mt 28.16-20; Mlk 16.12-19; Lk 24.13-51; Jñ 20.19–21.25; 1Kt 15.5-7
✡1:4 1.4 Lk 24.49; Jñ 14.16-17; 14.26; 15.26; 16.7-15
✡1:5 1.5 Ajsh 2.1-4
‡1:6 1.6 Jinake ekí agaldukazhá. Kauwizhéñ Jateja ezua kekualdal gaxaldixa guakldane, ega na niuwabak sáñkalda kakiyaldaxaldixa ajañguxa nalguák.
✡1:8 1.8 Ajsh 2.1–8.3; 8.4-25; 13.1-3
✡1:9 1.9 Mlk 16.19; Lk 24.50-51
§1:10 1.10 Ekueki Jateja guaklde uldeñkakue.
*1:12 1.12 1 “kilómetro”
✡1:13 1.13 Mt 10.2-4; Mlk 3.16-19; Lk 6.14-16
†1:18 1.18 Mt 27.7-8. Ai kagiki Judatshi ajañguxa. Jinak naldakí. Judak paldata agasabinega aldéñ shuigueni Jatek múldigaba agaskaitshixakuetshi sáñkaldakueja ai kagi ajabine nak.
✡1:19 1.18-19 Mt 27.3-8
✡1:20 1.20 Sal 69.25
✡1:20 1.20 Sal 109.8