Ebeldeyukuetshi kalta zʉñgajienapanaldiamak
Meja ai kalta gauwane: Naldiñki jalde kalta gauwaneki me ne guagazhá guatshak jiaga, kalta kagakauwanekueja muldetua me ne kakualdi. Zʉñkueki juldiú sanága Duwe ipanane aksaneka, Jatetshi múldigaba Duwe Jesú nagagá nogueñga sezheklde muldetua akué. Aiki Pábuldu, Apuldu, Belnabé, azhi axautshi naldaka.
Mekuetshi kalta gauwane: Jalde kaltaki juldiú saná Duwe ipananekue Jatetshi múldigaba Duwe Jesú nagagá nogueñga sezheklde kakuekuek kagakauwane. Juldiú sanákueki ebeldeyu zukuakakue nak ebeldeyukue jiaga akuaka.
Jinak ai kalta gauwane: Duwe Jesú Zʉnekualka za na akaldak akzé izhuka, e za na Jate na ishkualdi zʉnezhokshixa zʉnatuñshaldiamak jalde kalta gauwane. Azhinikga axautshi e jana ne naldakí. Eñki Jateja guaklde uldeñkakue zhakaldak akzé, nauwibama Muesé zhakaldak akzé, Jatek múldigaba agaskaitshixa nauwibama Aldóñtshi atukuakue zhakaldak akzé. Akna axáñ ajanashixa, ajañguxa nanek mokue kualdinagábaki, abá naldakí Duwe Jesú alduna ishalga nogakue.
Ji, ji shalda guashi jalde kalta gaune:
1. Duwe Jesúki akaldak akzé (1.1-4)
2. Duwe Jesúki Jateja guaklde uldeñkakue zhakaldak akzé (1.5–2.18)
3. Duwe Jesúki nauwibama Muesé zhakaldak akzé (3.1-6)
4. Jate alduna ishiji amak axatshál nogakue (3.7-19)
5. Zhiksekuakue janaktuneñka juldunakue (4.1-13)
6. Duwe Jesúki Jatek múldigaba zʉñkagaskaitshixa akaldak akzé (4.14–7.28)
7. Duwe Jesúki Jatek múldigaba agaskaitshixakue zhakaldak akzé (8.1–10.39)
8. Jate alduna ishakue (11.1-40)
9. Jibañ tuañkaldogéñ abá naldakí abetakue (12.1-29)
10. Duwe ipananekue mitsabé izhogakue (13.1-25)
kalta
1
Duwe Jesúki akaldak akzé
1 Mauzeñgaki Saldiñga netshi Jateja matshuwi juizha ají múldigaba naldiñga zʉxaitshixakuek zhinik anuñka nalda nauwibamakue axazguagatonane. 2 Ne kaiga auxa zexaldiéñ zexaldá guapanatshak zʉnake, Asukuá Duwe Jesúk zhinik zʉñkazguagapanane. Ek ga saldiñga jika na nahauxa gauwá guane. Akze, saldiñga jika aksuí nogauxa Asukuájañga bieni jana aksuí noxaldixa itene. 3 Asukuága na Jate nahauxabé ne izhuka nak, eñki sakí agatsé, mitsá akaldak akzé zʉxaita muñshí zaldaba izhuka zʉnatuñshixa.✡ 1.2-3 Jñ 1.3,14; Kls 1.15-17 Duwe aldéñga na ají múldigaba kamakuek saldiñga jika na nahauxa nogakuauxabé nalshatuka. Ekí naldi na, aldéñga sha katshixa zʉñkabeti janshi zʉñkazgualdiamak nauwitsaldí shuigueniki, jékaldaxa Jate akaldak akzé jibatshaldi mual akldé akzeñka e na sanexaldiamak yaté guane. 4 Ekí atshatshak aldéñki Jateja guaklde uldeñkakue zhakaldak akzé ne awatuñshá. Ekibeñga, aldéñ “Jatetshi Asukuá” axeyateneki guaklde uldeñkakue axeyatene guashiñki zhakaldak akzé axezhuka nakldá.
5 Akze, Jateja aldéñ guaklde uldeñkakue, ni mieldek jekí akbeyazhé:
“Mañki Nasukuá giemi maldé,
naski kaigaga Mijate nalkuge saldiñgak awatuñshanuge nzha.”† 1.5 Sal 2.7; Ajsh 13.33. Asukuá Duwe Jesú zʉnekualdal gaxaldixak akbeji na ekí sezheklde.
Ni ekí jiaga ekue shalda guagazhé:
“Nasga na Ajate naldaldikue.
Guatshak aldéñki Nasukuá naldaldixa nzha.”✡ 1.5 1Cr 17.13
6 Ekí ne, Asukuá ezuamé axaldé kagik gagapanatshak ekí guaklde:
“Saldiñga guaklduge uldeñkakueja Nasukuá akldé akzamakga shi agazukuí.”✡ 1.6 Dt 32.43; Sal 103.20
7 Guatshak aldéñ guaklde uldeñkakue shaldaki ají múldigabak ekí guaklde:
“Jateja guaklde uldeñkakue axazauwal gagatshak,
múlkalda jana, guksé jana jiba kakbeñka.”✡ 1.7 Sal 104.4
8 Akze, Asukuá shaldaki ají múldigabak ekí guaklde:
“Mañga na Saldiñga netshi Jatega maldé, Sáñkalda izhoshiñga na,
jian za sanegakuamak sanexa niuwi miksuikue saneshiñga mizhogataná.
9 Mañki jian atshá za mikldunka,
kutám atsháki miguldiji mikldunazhé.
Akna Saldiñga netshi Jate Mijatega mezhgakushi na,
ma na izhukakue zhakldé mikzukui, akldé zeñ mikzukuane nzha.”✡ 1.8-9 Sal 45.6-7
10 Ekí jiaga ají múldigabak guaklde:
“Nauwijí Sáñkalda, mañga na kasak kagi makauwatshak kama gukshamalde.
Ma naldi alnoba gaumalde.
11 Saldiñga gaumaldauxaki naldaksánaldixagaba.
¡Ma zʉnake naldiñga maldaldaldixa!
Ne, gaumaldauxaki zhakuá jana zauwaksánaldixa.
12 Akna zhakuá menaldá guatshake maja xaldeki abisa yushakuamak,
mañki alnoba, kagi jiaga abisa mayushaldixa.
Naldatshak ma zʉnake ni mitsák ayushabaldáta, shuixabaldáta,
amak za naldiñga izhoshiñga mizhogataná nakldá.”✡ 1.10-12 Sal 102.25-27
13 Akze, Jateja aldéñ guaklde uldeñkakueki ni mieldek ekí akbeyazhé:
“Nas saldiñga aksanegatokugeñga, jibatshugaldi mual akldé akzéñ naldesañ yate guwá.
Naski maguldiñkakuek auxaga magubishaldikueñka yo amak mizhoxaldixa nakldá.”✡ 1.13 Sal 110.1
14 Ne aldéñ guaklde uldeñka nahauxaki aldunakuega, egabá axazauñkakue nak, aldéñ káguba ikualdaldixakue agaunexal gakakue nuxa nakldá.
*^ 1.1 Juldiú sanákueki ebeldeyu zukuakakue nak ebeldeyukue jiaga akuaka.
✡1:3 1.2-3 Jñ 1.3,14; Kls 1.15-17
†1:5 1.5 Sal 2.7; Ajsh 13.33. Asukuá Duwe Jesú zʉnekualdal gaxaldixak akbeji na ekí sezheklde.
✡1:5 1.5 1Cr 17.13
✡1:6 1.6 Dt 32.43; Sal 103.20
✡1:7 1.7 Sal 104.4
✡1:9 1.8-9 Sal 45.6-7
✡1:12 1.10-12 Sal 102.25-27
✡1:13 1.13 Sal 110.1