Mateyuja Duwe Jesú zʉnekuane shalda gaune zʉñgajienapanaldiamak
Meja ai kalta gauwane: Mateyu Duwe Jesú shagitixaja jalde kaltaki gauwane. Aldéñki sáñkaldak paldata akiyalzabine zhiksuika nalgué, Duweja agapa neyaxañ akbeyatshak ají jiba maji amak agapa neyapanane. Mateyuga na Aldebí jiaga akuaka nane.
Mekuetshi kalta gauwane: Mateyuja Duwetshi abamakue zhikldogamak gauwatshak, juldiútshi abama kasaklde Abaldahám zhinik guagapanane nak, juldiúkuetshi kalta gauwane zʉñkualdaka.
Jinak ai kalta gauwane: Mateyujañki asaná juldiúkueja Duwe Jesúki Jateja ezua zʉnekualdal gaxaldixa guakldane aiga ne kakualdakue jañgui gauwane. Ekí jañgui na, Jatetshi múldigaba sezhekldek zhinik ega ne guashi guakldanamak gauwane. Juldiúkuejañki e naxaldixaga jiaktuwi ashekue.
Ji, ji shalda guashi jalde kalta gaune:
1. Duwe Jesú kukane, guildegatone (1.1–2.23)
2. Duwe Jesú Jatetshi jiba atshapanane (3.1–4.25)
3. Duweja gaxa akshá zeñka zhinik shizhiyane (5.1–7.29)
4. Duweja káguba se kakzukui, kagauneklde (8.1–9.38)
5. Duweja shaxaldixakue kezhgakushi, kakagagáñga shi kaxaldiyane (10.1–11.1)
6. Duweja Galdildeyaxa kágubakue kagauneklde (11.2–12.50)
7. Duweja kugua ajanashakldegéñ zhinik shizhiyane (13.1-52)
8. Duwe Jesú Galdildeya zhinik neñgueni kágubakue kagauneshi san san neyatone (13.53–17.27)
9. Duwe agapa neñkakue mitsabé naldakue shi kaxaldiyane (18.1-35)
10. Duweja Juldeya baxe zaldakue kagaunegatone (19.1–23.39)
11. Duweja auxa zegatshak sakí zexaldixa shizhiyatone (24.1–25.46)
12. Duwe Jesú shuigueni mokue izhgatene (26.1–28.20)
Mateyuja
Duwe Jesú zʉnekuane shalda gaune
1
Duwe Jesútshi abamakue
(Lk 3.23-38)
Jalde kaltake Saldiñga netshi Jateja Asukuá Duwe Jesú zʉnekualdal gaxane shalda miñmeyaldikue. Duwe Jesúki nauwibama Dabí, Abaldahámtshi atukuaga.
Abaldahámki nauwisaná juldiútshi abama Isák tshate. Eñki Jakóp tshate. Jakópki Judá, akajatshi jiaga ajate. Judáki Paldes, Selda tshate. Ekuetshi ajabaki Tamál. Paldeski Esaldóñ tshate. Eñki Aldám tshate. Aldámki Aminadáp tshate. Eñki Nasóñ tshate. Nasóñki Sadmóñ tshate. Eñki Bohós tshate. E tshabaki Aldaháp. Bohóski Obét tshate. E tshabaki Aldút. Obétki Isahí* 1.5 Isahíga Jesé jiaga akuaka. tshate. E zʉnake nauwibama sáñkalda Dabí tshate.
Nauwibama Dabíki Saldamóñ tshate. E tshabaki Uldiyatshi asewá nane. 1.3-6 1Cr 1.34; 2.1-15; 3.5; Rut 4.18-22 Saldamóñki Aldubuám tshate. Eñki Abiya tshate. Abiyaki Asá tshate. Eñki Jusapá tshate. Jusapáki Juldám tshate. Eñki Usiyatshi abama. Usiyaki Jutám tshate. Eñki Akás tshate. Akáski Esekiya tshate. 10 Eñki Manasé tshate. Manaséki Amó tshate. Eñki Jusiya tshate. 11 Jusiyaki Jekoniya, akajatshi jiaga abama. Kauwizhéñ baxañ na nauwisaná juldiúkue kauwijí kagik zhinik san kagi Babildonia kawaldenane. 1.11 2R 24.8-16; 2Cr 36.9-10
12 Ekí kawaldeñguenik na, exaki Jekoniyatshi asukuá Saldatiél kuká. Eñki Suldubabéltshi abama. 1.7-12 1Cr 3.10-19 13 Suldubabélki Abiyúd tshate. Eñki Eldiakím tshate. Eldiakímki Asúl tshate. 14 Eñki Saldók tshate. Saldókki Akím tshate. Eñki Eldiúd tshate. 15 Eldiúdki Eldiasál tshate. Eñki Matán tshate. Matánki Jakóp tshate. 16 Jakópki Jusé tshate. Juséjañki Maldiya guxane. Maldiyaki Duwe Jesútshi ajaba. Duwe Jesú zʉnake Jatejañga ezua zʉnekualdal gaxaldixa guakldanega nzha.
17 Akze, Duwe Jesútshi abamakue miñmenugekueki ekí zhikldogamak nitshigatuka: Nauwibama Abaldahámka zhinik panane nauwibama sáñkalda Dabí baxañ yo 14 tukua nitshinane. Guñguenik nauwibama Dabí baxañ zhinik nauwisaná juldiúkue nauwijí kagik zhinik san kagi Babildonia kawaldene baxañ yo mokue 14 tukua nitshinane. Guñgueni jiak Babildonia kawaldene baxañ zhinik Duwe Jesúga Jateja zʉnekualdal gaxaldixa guakldane kukanéñ yo mokue 14 tukua nitshine nzha.
Jesú jai kagik kukane
(Lk 2.1-7)
18 Guatshake Duwe Jesú Zʉnekualkaki ixagabaldeshi jai kagik ekí kukane: Ajaba nexaldixa Maldiyaki ezua sigí Jusé 1.18 Lk 1.26-27 na akuxaldixa jeñ ashishá akuanekue na naldá. Naldatshak askuildegagáñga aldogueñga Jatetshi Aldunajañga somá akzalshane. 1.18 Lk 1.35 19 Ekí aksʉ́ñga na, Jusé asewá nexaldixajañki sha axatshane jañguá. Akze, aldéñki sigí janshizhe, guiyabaja guagamak izhuka nalguakna, guiyabaja majakue guagamak majaldixa jañguatshak jiaga, jiwak akzukuasʉ́ñ akzeshi na ziñ me majaldixa akldék.
20 Ekí majaldixa jañguatogueñga na kabagatshake, Jateja guaklde uldeñkaga Jusék kabixaga akizhañkatshak ekí akbeyá: “Ma sáñkalda Dabítshi atukuak, munzhi Maldiya misewá nexaldixa ipanasʉ́ñ mikzegazháldi. Jinak ekí mikbeyakí. Somá axaldegatukaki Jatetshi Aldunajañga akzalshane nak. 21 Ai somá axaldegatukaki sigí sukue axaldexaldixa. Eñki kukatshak Jesú 1.21 Galdieguke “Jesú” guagatshake “Saldiñga netshi Sáñkalda zʉnekualka” guashi. Sal 130.8; Lk 1.31; 2.11 axezhagakue miñgatsaldaldixa. Jinak ekí axezhagakue naldakí. Ejañki ajíkue sha atshixakue kaxabeti, kekualdaldixa nak.”
22 Akze, saldiñga ekí zexeki mauzeñga ezua Jatetshi múldigaba naldiñga zʉxaitshixaja sakí zexaldixa guakldane amak zexaldiamak ekí zegatuka. Eja ekí guakldane:
23 “Ezua munzhi sigí izhguajagáldega ne jiaga
somá axaldegapanaldinik sigí sukue axaldexaldixa.
Ai somáki Emanuél axeyaldaxaldixa nakldá.” 1.23 Is 7.14
Guatshak Emanuél guagatshake “Saldiñga netshi Jateki nasʉñ nañga izhuká” guashi.
24 Ekí kabi akzegueni Jusé uba akldeñguake Jateja guaklde uldeñkaja aksanekldalguamak atshiji na, Maldiya asewá naldaldiamak ipaná. 25 Guatshak somá kukagá nogueñgaki asewá na askuildék guazhá. Guñguenik somá sigí sukue kukañguake agabenalguamak Jesú 1.25 Lk 2.21 axeté na gua.

*1:5 1.5 Isahíga Jesé jiaga akuaka.

1:6 1.3-6 1Cr 1.34; 2.1-15; 3.5; Rut 4.18-22

1:11 1.11 2R 24.8-16; 2Cr 36.9-10

1:12 1.7-12 1Cr 3.10-19

1:18 1.18 Lk 1.26-27

1:18 1.18 Lk 1.35

1:21 1.21 Galdieguke “Jesú” guagatshake “Saldiñga netshi Sáñkalda zʉnekualka” guashi. Sal 130.8; Lk 1.31; 2.11

1:23 1.23 Is 7.14

1:25 1.25 Lk 2.21