Duwe Jesúja auxa zexaldixa mu zʉñgisekuane Juañja gaune zʉñgajienapanaldiamak
Meja ai kalta gauwane: Duwe Jesúja 12 shaxaldixakuega aldéñ izhgajañguxa Juañja jalde kalta gauwane. Ega na Duwe Jesúja ají múldigaba guaxaldixa gaxanekue nañga agatsé. Dueba negatshak jiaga Duwe ipananekue aksaneka izhogué, Duwe Jesú shalda guiyaba atuñshiñga kagi nóñgutse níbunixa izhuka Padmuxa abexane noguéñ jalde kalta gauwane (1.9).
Mekuetshi kalta gauwane: Juañja Asia baxe kuíbuldu kugua Duwe ipananekue ishjuizhaldekakuek jalde kalta kagakauwane (1.4). Guatshak saldiñga Duwe ipananekuetshi jiaga gauwane.
Jinak ai kalta gauwane: Jatetshi Aldunajañga Juañ aksanegatshak, aldunaldiñga Duwe Jesúja auxa zegatshak sakí zexaldixa tuñsha. Duwe Jesúja sakí tuñshanauxa aldéñ ipananekuetshi kalta gauwakue akbeyatshak, amak jalde kalta gauwá. Jika atú guazhámak agatsé tune kagajienaldiamake, jika atuñkakue na izhguashiji guaklde. Atshake Alduma zaldakueja Duwe ipananekue matshuwi sha kakuí, guiyaba katuñshatone. Akna, Juañja auxa zegatshak Duwe Jesúja saldiñga aguldiñkakue, shanekue nuk agubiyaldixaga ne katuñshi, aldunaxa kakuiyakshaldiamak jalde kalta gauwane. Ekíki abá naldakí Duwe Jesúk agapa aldeyalga aldoxaldiamak.
Ji, ji shalda guashi jalde kalta gaune:
1. Kasak kakbene (1.1-8)
2. Duwe Jesú sakí agatsé tune (1.9-20)
3. Duwe Jesúja kugua kuíbuldu nekuexa e ipananekue izhajuizhaldekakuek kakbene (2.1–3.22)
4. Juañja jékaldaxa zʉtune (4.1–5.14)
5. Jubeju zhauwa jananeja kalta kugua juizha ishkatsuñguane ishkawatiane (6.1–8.1)
6. Jateja guaklde uldeñkakue kugua tata axazajuigatshak atemajañ guiyaba zeklde (8.2–11.19)
7. Ezua ezua atú guazhámak agatsé tune (12.1–14.20)
8. Kugua migisalshá guakuekue (15.1–16.21)
9. Babildonia na izhguaji ezua munzhi béyakze sha makuakuek ité tune (17.1–18.24)
10. Jékaldaxa zhinik kabayu abutshik ite nagatuka (19.1-21)
11. 1.000 kagi zexaldixa (20.1-6)
12. Guiyaba atualdieñka kakuateyane (20.7-15)
13. Abisa alnoba, abisa kagi, abisa Jeldusaldéñ (21.1–22.21)
Duwe Jesúja
auxa zexaldixa mu zʉñgisekuane
Juañja gaune
1
Nas Juañ jalde miñgakauwatokugeki Duwe Jesú Zʉnekualka mu zʉñkiyasekuane xalte. Aiki Saldiñga netshi Jateja Asukuá Duwek agé guane, 1.1 Jñ 12.49 ekíki sakí zexaldixa zegakuamak zexaldá guapanká kaxazauñkakuañki zʉnatuñshaldiamak. Amak zʉñwashekualdiamake, Duweja zhiniki axazauñkugek aldéñ guaklde uldeñkak nagixaune. Akna Jatetshi múldigaba, Asukuá Duwe Jesú Zʉnekualkaja guakldamakga natuñshanamak miñgakauwatokuge. Ekí Jatetshi múldigaba naldiñga zʉxaitshiji kalta gauwatokugeja zexaldixa guagamak zexaldá guapanakna, mieldeke ai mizukuakshaldixake zeñ minaldaldixa. Ekíga na, mieldeke ai nukshi amak atshál minukake zeñ minaldaldixa nzha.
Nas Juañ, Asia baxe kuíbuldu kugua* 1.4 Jalde kaltak anuñka juizha “kugua” guaxaldixa. Jinake naldakí. Juldiúkuejañki “kugua”ki auxaga ne guashi akuaka nak. Duwe ipanaminekue mishjuizhaldekakuek kalta miñkuzgauwatokuge. Saldiñga netshi Jate atemajañ éegaba guañ mimajañgui, muldetua aldunaxa señgaba miñzukui shi mimezhokshí. Ekí miñkatshixaki izhoshiñga nagatogamak kaiga izhukaga, niuwizhíne jiaga izhoshiñga izhogataná. Ekí miñkatshixaga na, ají Alduna kugua naldashiñga 1.4 Is 11.2. Jatetshi Alduna ezua me naldatshak, kugua naldashiñga guagatshake, eñki auxaga ne, auxaga kama axaldé guashi. ne Jatetshi sanexa xaldoxé staxa izhuka. Ekí miñkatshixaga na, Duwe Jesú Zʉnekualka, eñki tunauxabe guaxal za nuka. 1.5 Jñ 18.37 Aldéñga na shuiguenik shuigazhíta kasaklde izhgatene, 1.5 1Kt 15.35-57; Kls 1.18 saldiñga kagik sanék guxakuetshi Sáñkalda izhuka. Aldéñki zʉnajañgui, nauwitsaldí abi akzuldi shuigatshakna, sha katshixatshi nashi kaldalgué, aik zʉnebesanshá. Guñgueni aldéñga sanegakualdixa zʉnezhagatshak, Saldiñga netshi Jate Ajatega axazauwi múldigaba agaskaitshatogakualdixa zʉnaldekshane. 1.6 1Pe 2.5; Aux 20.6 Aldéñ za saldiñgaja akldé akzamakga agazukual za noshiñga shi noshí. Ekibeñga aldéñ za saldiñga na nahauxa aksanekaga shi naldataní. Ekíga shi naldí.
¡Tu guwíñ, Duwe Jesú mauwixa nagaté! 1.7 Dn 7.13
Saldiñgaja kauwijí ubak naldi ekí nagaté atualdixa.
Ekí atuatshakna aldéñ akuaxá guanane,
sʉza agaldeñshananekueja 1.7 Jñ 19.34 jiaga atualdixa.
Atshakna saldiñga saná kagik zhekuauxa nekueja
e shalda izhajaniñgaba abauwaldixa. 1.7 Zac 12.10; Mt 24.30
¡Akzé! Ekíga shi naldí.
Saldiñga netshi Jate nauwijí Sáñkaldajañga ekí ni guak: “Kasaxa zalda naldaldatshak jiak nasga asʉgaxa zalda na nakú. 1.8 Galdieguke “Alfa y Omega” akuaka. “Alfa”ki “a” jana kasak guashi, “omega”ki “zh” jana asʉxa guashi. Naski izhoshiñga nagatokugamakga kaiga izhokugega, niuwizhíne jiaga izhoshiñga izhogateñkuge. Nasga na auxaga kama naxaldé, saldiñga naksuikuegaba nzhakú.”
Duwe Jesú sakí agatsé tune
Nas Juañ Duwe Jesúk zhinik mimikaja naugék, etshi kaldakna maiñ nañga guiyaba tuañkaldogatshak jiaga Duwe zʉñsanegamak axatshiji, iyabá náaldaki abeti kizhuka. Nalguák Jatetshi múldigaba, Asukuá Duwe Jesúja guakldamakga guagukuéñ zhinik, kagi nóñgutse níbunixa izhuka Padmuxa guiyaba nawatuñshiñga nabexane 10 nogukueñga na, nauwijí Sáñkalda ldiuwañki§ 1.10 dumiñkuk Jatetshi Alduna naksanegatshake, aldunaldiñga nashaneldi zhinik tata jaldáñ negamak neshi ekí múldigaba naxazakuaká nuká: 11 “[Kasaxa zalda naldaldatshak jiak nasga asʉgaxa zalda na nakú.] Sakí tuabalduka kaltak gauwa xaldeki Asia baxe kuíbuldu kugua nekuexa nepananekue izhajuizhaldekakuek kakuzgauwa makualdí. Aikueki Epesu, 1.11 Ajsh 18.19 Esmilda, Pélgamu, Tiatilda, Saldi, Pildadelpia, Aldauldiseya 1.11 Kls 2.1 zaldakuek kabakuzgauwaldí.”
12 Nukañgukuake “¿me ekí naxazguaká?” nakldeguake eni zhikbaték tu gualdatshake, niubaga kugua agatsalda guksé muñshí stualdiamak agaldaka tualdatshak, 13 ai kenañki Jatetshi Asukuága ixagabaldeklde 1.13 Dn 7.13; Mlk 8.31; Aux 14.14 janagatse tu. Ají zhakuáki akzé tshakue kasaxa duwá agatsé ijuakue, tabáxaldake niubaga akbakue. 14 Ají saiki abutshi, mulda azhi nuabi tu abutshi, ají ubaki guksé nuñkua tuñgatse, 15 ají kasaki shezhaxalda* 1.15 “bronce” gukseldek guane, muldetua ishuwane tubá stuñka jana agatsé, ají múldigabaki nitaxalda atema ishkaldegamak zukuaka. 1.15 Ez 43.2; Dn 10.6 16 Jibatshaldi mualki kugua zumeya aksuikue, ají kaxake shezhá mushtabañga zaxa akzʉxaitshixá, 1.16 Eb 4.12 ají waxaki niuwi stuakldegauxa stuamakbé stuñka tu.
17 Ekí e tualdatshakna asták shuanuge jana napená. 1.17 Ez 1.28; Dn 8.17; Ajsh 26.14 Guakna aldéñki ají káuxalda jibatshaldi ne nepañgui ekí nakbeyá: “Zhe mikzegagába nogwá. Naski kasaxa zalda naldaldatshak jiak nasga asʉgaxa zalda na nakú. 1.17 Is 44.6; 48.12 18 Naski izhoshiñga izhokugéñ zhinik na, nakuaxa akuatshak jiaga izhoshiñga izhogateñkugé. 1.18 Alm 6.9 [Ekíga shi naldí.] Shuixak agubiya guanuge nak etshi yabi naksuikue, shuanekue jituatogeñka zalda yabi jiaga naksuikuega nakldá. 19 Akna sakí zeká, kaiga zhinik sakí zexaldixa matuauxa kalta gauwa guwá.
20 ”Guatshak kugua zumeya jibatshugaldi mual naksuikue tumalde migajienazháneki ekí guashi: Aiki guaklduge uldeñkakue, kuíbuldu kugua nekuexa nepananekue aksanekakue guashi. Ekibeñga na, niubaga kugua agatsalda guksé muñshí stualdiamak agaldaka tumalde migajienazháneki ekí guashi: Aiki kuíbuldu kugua nekuexa nepananekue izhajuizhaldekakue guashi nakldá.”

1:1 1.1 Jñ 12.49

*1:4 1.4 Jalde kaltak anuñka juizha “kugua” guaxaldixa. Jinake naldakí. Juldiúkuejañki “kugua”ki auxaga ne guashi akuaka nak.

1:4 1.4 Is 11.2. Jatetshi Alduna ezua me naldatshak, kugua naldashiñga guagatshake, eñki auxaga ne, auxaga kama axaldé guashi.

1:5 1.5 Jñ 18.37

1:5 1.5 1Kt 15.35-57; Kls 1.18

1:6 1.6 1Pe 2.5; Aux 20.6

1:7 1.7 Dn 7.13

1:7 1.7 Jñ 19.34

1:7 1.7 Zac 12.10; Mt 24.30

1:8 1.8 Galdieguke “Alfa y Omega” akuaka. “Alfa”ki “a” jana kasak guashi, “omega”ki “zh” jana asʉxa guashi.

§1:10 1.10 dumiñkuk

1:11 1.11 Ajsh 18.19

1:11 1.11 Kls 2.1

1:13 1.13 Dn 7.13; Mlk 8.31; Aux 14.14

*1:15 1.15 “bronce”

1:15 1.15 Ez 43.2; Dn 10.6

1:16 1.16 Eb 4.12

1:17 1.17 Ez 1.28; Dn 8.17; Ajsh 26.14

1:17 1.17 Is 44.6; 48.12

1:18 1.18 Alm 6.9