7
Jatetshi aldé atualdiamak agazuñguanekue
1 Ekí tuatogukuenik ekí jiaga tu: Kagi maxáiñtaba izhgekuauxa Jateja guaklde uldeñkakue makaiwa akteté tu. Aikuejañki múlkalda maxáiñtaba ixekue kagik, níbunik, ni ezua kaldik izheyazháldiamak juaxaldiyane te. 2 Tualdatshak jiak Jateja guaklde uldeñka mokue ezuañki niuwi nañkajaldi zhinikga nitshigaté tu. Eñki Jate izhoshiñga izhukatshi za aldé atualdiamak káguba akzuñgualdixa aksuikue. Naldeja ai makaiwa Jateja guaklde uldeñkakue kagi, níbuni sha gualdiamak niuwi agaxenekuek ekí jaldáñ kakbeyá: 3 “Kagi, níbuni, kaldi sha guagába jiaktuateñga nogwíñ. Kaigabeñki Nauwijate axazauñkakue etshi za nekue atualdiamak sʉgáxaldak akzuñgua gakuatshak za na amak atshabiñkuká gualdixa niyó.” 4 Nukaldatshak amak agazuñguanekue mitsá ne nukaldatshak, aiki 144.000 saldiñga Isayél*7.4 Gn 32.28; 35.22-26. Isayélki Jakópga 12 sukua axaldé. tsukuakue ldaxegaba agazuñguane: 5 Judá ldaxe zhinik 12.000, Aldubén ldaxe zhinik 12.000, Gad ldaxe zhinik 12.000, 6 Asél ldaxe zhinik 12.000, Neptaldí ldaxe zhinik 12.000, Manasé ldaxe zhinik 12.000, 7 Simehóñ ldaxe zhinik 12.000, Aldebí ldaxe zhinik 12.000, Isakál ldaxe zhinik 12.000, 8 Sabuldóñ ldaxe zhinik 12.000, Jusé ldaxe zhinik 12.000, Benjamín ldaxe zhinik 12.000 agazuñguanekue.
Zhakuá abutshi ijuakuekue
9 Ekí tuñgukuenik tua nakzegagá, káguba izáatasa zhikzhe saldiñga kuíbuldu zaldakue, saldiñga sanákue, saldiñga sha sha zukuaxa na nahauxa sanákue zhinik ajuizhaldeklde sanexa xaldoxé staxa, Jubeju zhauwa nugaldi mual zʉtuwiñgaba akteté tu. Ekueki zhakuá abutshi ijuakuekue, káuxaldake setábaxe xai†7.9 Jñ 12.13. Setábaxe xaiki sáñkalda muldetua iyapanká atuñshi, jue jue axajanashishixa. kaksui, 10 jaldáñ ekí akuák:
“Nauwijate, sanexa xaldoxéxa ité malduká,
Ma Jubeju zhauwaga maldé,
Maiñ zʉnekualda miñsuikue nzha.”
11 Akuagatshakna saldiñga Jateja guaklde uldeñkakueki sanexa xaldoxék, duebakuek, makaiwa benekuek ibatekldekue akteté tu. Ekí noxekueja sanexa xaldoxé stak Jate akldé akzamakga agazukualdiamak ishkajiezhi nuldu axayoshi, 12 ekí akuaxaldá:
“¡Ekíga shi naldí!
¡Nauwijate, ma na saldiñga zeñ zalda mikbeya ipanamildaka nibaldá,
Ma za akaldak akaldak mikzé nibaldá,
Ma za auxaga mishkué maldé nibaldá,
Ma za auxaga ‘zeñ nzhakldék’ mikbeya ipanamildaka nibaldá,
Ma za akaldak mikzahamak mixabeta ipanamildaka nibaldá,
Ma za saldiñga jika na nahauxa maksaneka nibaldá,
Ma za auxaga kama mixaldé nibaldá!
¡Ekí za naldiñga shi maldaldataní! Ekíga shi naldí.”
13 Ekí nukaldatshake exa 24 duebakue, ezuajañki ekí naklduka: “Jaldekue zhakuá abutshi ijuakuekueki, ¿mekue shi na? ¿Mani zhinik nakldekue shi na?” 14 Nakldukañguake, “duwe, mañki mikuega ne ekí nakldukashibaldá” akiyokuñgukuake ekí nakbeyá:
“Ekueki zʉxaita zalda guiyaba atuatogéñ✡7.14 Dn 12.1; Mt 24.21; Mlk 13.19 zhinik aldakldekue;
kauwijí zhakuáki Jubeju zhauwatshi abik ishkiyajizhatshak✡7.14 Eb 9.14; 1Jñ 1.7; Aux 1.5; 22.14 ishkiyabutshekuane.
15 Ekí zhinik na, Jatetshi sanexa xaldoxé stak akté nukakue, juwí Jate izhogaldi axazauwal zañga nukakue.
Akna Jateja numañ katualdiamak aldéñ izhogaldiñga kezhokshaldixa.
16 Akna akldé maldija kakuazhíta, akldé ni kakldunazhíta,
ni niuwija akldé zʉxaita guañgua kakzukuaksáni, shañga kakzukuazhíta.‡7.16 Sal 121.5-6
17 Jinake naldakí. Jubeju zhauwa sanexa xaldoxé staxa akldukaja,
jubeju numañ atuamakbe numañ katuwi kaksaneshi na,✡7.17 Jñ 10.9-11 izhoshiñga mezhokshakue ni nañkajeñka kauldeyaldixa nak.✡7.17 Is 49.10; Jñ 4.14; 7.37-39; Aux 21.6; 22.17
Ekíga, Jateja akldé abauwazháldiamak
ubaldiá kakldogauxa kexañgualdixa nakldá.✡7.17 Is 25.8; Aux 21.4”
*7:4 7.4 Gn 32.28; 35.22-26. Isayélki Jakópga 12 sukua axaldé.
†7:9 7.9 Jñ 12.13. Setábaxe xaiki sáñkalda muldetua iyapanká atuñshi, jue jue axajanashishixa.
✡7:14 7.14 Dn 12.1; Mt 24.21; Mlk 13.19
✡7:14 7.14 Eb 9.14; 1Jñ 1.7; Aux 1.5; 22.14
‡7:16 7.16 Sal 121.5-6
✡7:17 7.17 Jñ 10.9-11
✡7:17 7.17 Is 49.10; Jñ 4.14; 7.37-39; Aux 21.6; 22.17
✡7:17 7.17 Is 25.8; Aux 21.4