16
Tuptup In Wuleang Oakwuki In Lohm Nuknuk
1 Elos usla Tuptup in Wuleang nu in lohm nuknuk se David el akoela nu kac, ac elos filiya loac. Na elos orek kisa ac mwe kisa in akinsewowo nu sin God. 2 Tukun David el orek kisa tari, el akinsewowoye mwet uh Inen LEUM GOD, 3 ac el kitalik mwe mongo nu selos nukewa. El sang nu sin kais sie mukul ac mutan in Israel kais soko lof in bread, ipin ikwa manman se, ac kutu raisin.
4 David el sulela kutu mwet in sruf lal Levi tuh elos in kol alu lalos nu sin LEUM GOD lun Israel, ac elos on ac kaksakunul ye mutun Tuptup in Wuleang. 5 Asaph pa sulosolla tuh elan mwet kol, ac Zechariah el mwet kasru lal. Jeiel, Shemiramoth, Jehiel, Mattithiah, Eliab, Benaiah, Obed Edom, ac Jeiel pa ac srital ke harp. Asaph pa srital ke cymbal, 6 ac ma kunen mwet tol luo, Benaiah ac Jahaziel, in uk mwe ukuk ye mutun Tuptup in Wuleang ke len nukewa. 7 Pa inge pacl se emeet David el sang kunokon se inge nu sel Asaph ac mwet Levi wial, tuh in elos pa on ac kaksakin LEUM GOD.
Soko On In Kaksak
(Psalm 96:1–13; 105:1–15; 106:1, 47–48)
8 Sang kulo nu sin LEUM GOD, ac fahkak fulat lal;
Fahkak orekma lal nu sin mutanfahl uh.
9 On ac kaksakin LEUM GOD;
Fahkak orekma wolana ma El orala.
10 Kut in engan lah kut ma lal;
Lela mwet nukewa su alu nu sel in arulana engan!
11 Ngetak nu sin LEUM GOD tuh Elan kasrekowos,
Alu nu sel pacl e nukewa.
12 Esam orekma sakirik El orala,
Mwenmen lal ac nununku lal su El fahkla.
13 Kowos fwil natul Jacob, mwet kulansap lal,
Tulik nutin Israel, su God El sulela.
14 LEUM GOD El God lasr;
Ma sap lal ma nu sin faclu nufon.
15 Nikmet mulkunla wuleang lun God,
Su El orala tuh in oan ma pahtpat,
16 Wuleang su El oakiya inmasrlol ac Abraham,
Aok, wulela lal nu sel Isaac. Gen 12:7; Gen 26:3
17 LEUM GOD El orala sie wulela yorol Jacob,
Sie wulela su fah oan ma pahtpat.16:17–18; Gen 28:13
18 El fahk, “Nga ac fah asot facl Canaan nu sum.
Ac fah mwe usru lom sifacna.”
19 Mwet lun God elos mwet pu,
Elos tuh mwetsac in facl Canaan.
20 Elos forfor liki sie mutunfacl nu ke sie pac mutunfacl,
Liki sie tokosrai nu ke sie pacna tokosrai.
21 Tuh God El tia lela kutena mwet in akkeokyalos;
El karingnalos ke El kai tokosra saya ac fahk,Gen 20:3–7
22 “Nik kowos aklokoalokye mwet kulansap sulosolla luk;
Nik kowos kalyei mwet palu luk.”
23 On nu sin LEUM GOD, kowos mwet faclu nufon!
Fahkak pweng wo ke len nukewa lah El molikutla.
24 Fahkak wolana lal nu sin mutanfahl uh,
Fahkak orekma ku lal nu sin mwet nukewa.
25 LEUM GOD El fulat, ac fal in arulana kaksakinyuk El;
Lela in akfulatyeyuk El yohk liki god nukewa.
26 Tuh god lun mutunfacl saya kewa elos ma sruloala na,
A LEUM GOD El orala kusrao.
27 Wolana ac sunak apnulla,
Ku ac insewowo nwakla Tempul lal.
28 Mwet nukewa fin faclu, kowos in kaksakin LEUM GOD,
Kaksakin wolana lal ac ku lal.
29 Kaksakin Ine wolana lun LEUM GOD;
Fahsru nu in Tempul lal ac use mwe sang lowos nu sel.
Epasr ye mutun El su Mutal ke El sikyak;
30 Rarrar ye mutal, kowos faclu nufon!
Faclu oakwuki ku, ac tia ku in mokleyuk.
31 Kusrao ac faclu, kowos in enganak!
Fahkak nu sin mutanfahl uh lah LEUM GOD El tokosra.
32 Meoa ac ma nukewa loac in ngirngir;
Lela inima uh ac ma nukewa we in enganak!
33 Sak insak uh elos fah sasa ke engan
Ke LEUM GOD El ac tuku in leumi faclu.
34 Sang kulo nu sin LEUM GOD, mweyen El wo;
Lungse lal oan ma pahtpat.2 Chr 5:13; 7:3; Ezr 3:11; Psa 100:5; 106:1; 107:1; 118:1; 136:1; Jer 33:11
35 Kowos in fahk nu sel, “O God, Mwet Lango lasr, molikutla;
Uskuteni nu sie, ac molikutla liki mutunfacl saya,
Tuh kut fah ku in sang kulo
Ac kaksakin Ine mutal lom.”
36 Kaksakin LEUM GOD, God lun Israel!
Kaksakunul inge ac nu tok ma pahtpat!
Na mwet nukewa elos fahk, “Amen,” ac elos kaksakin LEUM GOD.
Alu In Jerusalem Ac Gibeon
37 Tokosra David el sang tuh in ma kunal Asaph ac mwet Levi wial ah tuh elos in liyaung alu in acn se ma Tuptup in Wuleang oan we. Na elos in oru orekma lalos we ke len nukewa nwe tok. 38 Obed Edom wen natul Jeduthun, ac mwet onngoul oalkosr in sou lal pa mwet kasru lalos. Ma kunen Hosah ac Obed Edom in topang ke mutunpot.
39 Tusruktu ma kunen mwet tol Zadok ac mwet tol wial, in karingin alu nu sin LEUM GOD ke nien alu in acn Gibeon. 40 Ke lotutang ac eku nukewa, elos oru mwe kisa firir fin loang uh, fal nu ke ma simusla in Ma Sap su LEUM GOD El tuh sang nu sin Israel. 41 Sayen mwet tol inge, Heman ac Jeduthun oelulos, ac oayapa kutu pac mwet su sulosolla tuh elos in on in kaksakin LEUM GOD ke sripen lungse lal su oan ma pahtpat. 42 Ma kunen Heman ac Jeduthun in karinganang trumpet ac cymbal ac oayapa mwe on saya ma orekmakinyuk ke pacl on in kaksak inge orek uh. Ma kunen mwet in sou lal Jeduthun in topang ke mutunpot uh.
43 Na mwet nukewa folokla nu acn selos, ac David el folokla pac nu acn sel nu yurin sou lal.2 Sam 6:19–20