Book Se Akluo Ke
TOKOSRA
Tukakinyen Book Se Akluo Ke TOKOSRA
Book Se Akluo Ke Tokosra tafwema sramsram ke tokosrai luo lun mwet Israel su
Book Se Meet Ke Tokosra tuh safla kac. Book se inge ku in kitakatelik nu ke ip luo: (1) Sramsram ke tokosrai luo uh tuku e ke yac oalfoko kutu meet liki Christ, nwe ke pacl Samaria ikori, oayapa ke safla tokosrai epang ke yac itfoko longoul luo meet liki Christ (722 B. C.) (2) Sramsram ke tokosrai lun Judah tuku e ke tokosrai lun Israel ikori, nwe ke sruoh ac kunausyukla acn Jerusalem sel Tokosra Nebuchadnezzar lun Babylonia in yac 586 B. C. Book se inge safla oe ke sramsram kacl Gedaliah, governor lun Judah ye ku lun mwet Babylonia, ac ke ma simusla ma fahkak ke ikakla lal Tokosra Jehoiachin lun Judah liki kapir in acn Babylon.
Mwe ongoiya yohk inge sikyak ke sripen mwet Israel ac Judah, oayapa tokosra lalos, tuh tiana inse pwaye nu sin Leum God. Tukun pacl se kunausyukla Jerusalem ac mwet Judah puspis tuh sruoh, oasr ekla na yohk sikyak ke ouiyen moul lun mwet uh, ac ma inge akkalemyeyuk ke sramsram matu lun Israel.
Mwet palu se su srumunyuk yohk in book se inge pa Elisha, mwet palu se ma aolulla Elijah.
Takla Lun Koanon Book Se Inge
Tokosrai kitakatelik 1:1—17:41
a. Mwet palu Elisha 1:1—8:15
b. Tokosra lun Judah ac Israel 8:16—17:4
c. Samaria Ikori 17:5–41
Tokosrai lun Judah 18:1—25:30
a. Kacl Hezekiah me nwe kacl Josiah 18:1—21:26
b. Pacl Josiah el tokosra 22:1—23:30
c. Tokosra limekosr safla lun Judah 23:31—24:20
d. Jerusalem Ikori 25:1–30
1
Elijah Ac Tokosra Ahaziah
1 Tukun Tokosra Ahab lun Israel el misa, acn Moab tuyak ac alein nu sin Israel.
2 Tokosra Ahaziah lun Israel el putatla ke sawalsrisr fulat in lohm sel in acn Samaria ac arulana musalla manol. Ouinge el supwala kutu mwet lal in som lolngok yorol Baalzebub, god lun acn Ekron, sie siti in acn Philistia, in konauk lah el ac kwela ku tia. 3 A sie lipufan lun LEUM GOD sapkin nu sel Elijah, mwet palu in acn Tishbe, elan som osun nu sin mwet lal Tokosra Ahaziah ac siyuk selos, “Efu kowos ku som lolngok yorol Baalzebub, god lun Ekron? Ya mweyen kowos nunku mu wangin god lun Israel? 4 Fahk nu sel tokosra lah LEUM GOD El fahk, ‘Kom ac fah tia kwela. Kom ac misa!’ ”
Elijah el oru oana ma LEUM GOD El sapkin, 5 ac mwet ma supweyuk sel tokosra inge folokla nu yorol. Na tokosra el siyuk, “Efu kowos ku sa na foloko?”
6 Elos topuk, “Kut sun mwet se su fahk nu sesr kut in foloko fahk nu sum mu LEUM GOD El fahk nu sum ouinge, ‘Efu kom ku supweyuk mwet in som lolngok yorol Baalzebub, god lun Ekron? Ya mweyen kom nunku mu wangin god lun Israel? Kom ac tia kwela. Kom ac misa!’ ”
7 Ac tokosra el siyuk, “Fuka luman mwet sacn?”
8 Ac elos topuk, “El nukum nuknuk lik se orekla ke unen kosro, ac losya infulwal ke pel se orekla ke kulun kosro.”
Na tokosra el fahk, “Elijah pa mwet sacn!”Mt 3:4; Mk 1:6
9 Na el supwala sie mwet leum lun mwet mweun wi mwet lumngaul lal in som usalu Elijah. Mwet leum sac konalak ke el muta fin inging soko ac el fahk nu sel Elijah, “Mwet lun God, tokosra el sap kom in oatui.”
10 Elijah el topuk, “Nga fin mwet lun God, lela e in tuku inkusrao me unikomi ac mwet lom ingan!” In pacl sacna, e tuku inkusrao me ac uniya leum sac ac mwet lal ah.1:10–12; Lk 9:54
11 Tokosra el supwala pac sie leum wi mwet lumngaul lal, su som ac fahk nu sel Elijah, “Mwet lun God, tokosra el sap kom in oatui ingena!”
12 Elijah el topuk, “Nga fin mwet lun God, lela e in tuku inkusrao me unikomi ac mwet lom ingan!” In pacl sacna, e lun God tuku lucng me ac uniya leum sac ac mwet lal ah.
13 Na tokosra el sifilpa supwala sie pac leum wi mwet lumngaul lal. El utyak nu fin inging soko ah, sikukmutunteyak ye mutal Elijah ac kwafe sel, “Mwet lun God, pakoten nu sik ac mwet luk inge. Nimet unikuti! 14 Leum luo meet ah wi mwet laltal ah anwuki ke e inkusrao me. A nga siyuk kom in nunak munas ac pakoten nu sik!”
15 Lipufan lun LEUM GOD fahk nu sel Elijah, “Oatui welul ac nimet sangeng.” Ouinge Elijah el wi mwet leum sac som nu yorol tokosra 16 ac fahk nu sel, “Pa inge ma LEUM GOD El fahk, ‘Mweyen kom supwala mwet in som lolngok yorol Baalzebub, god lun Ekron, srulukin wangin god lun Israel kom in lolngok se, na pa kom ac tia kwela. Kom ac misa!’ ”
17 Ahaziah el misa oana ma LEUM GOD El fahkak sel Elijah. Wangin wen natul Ahaziah, na pa Joram tamulel lal, el aolul in tokosra ke yac akluo ke pacl in leum lal Jehoram wen natul Jehoshaphat, tokosra lun Judah.
18 Ma nukewa saya ma Tokosra Ahaziah el orala, simla oasr in Sramsram Matu Ke Tokosra Lun Israel.