Book Se Akluo Ke
SAMUEL
Tukakinyen Book Se Akluo Ke SAMUEL
Book Se Akluo Ke Samuel tafwela Book Se Meet Ke Samuel in sramsramkin pacl David el tokosra fin acn Judah layen eir (chapter 1–4), ac tok fin facl sac nufon, weang Israel nu epang (chapter 5–24). Book se inge arulana akkalemye ke ouiyen oakwuk lal David in akyokye tokosrai lal, ac ke pacl in alein lal nu sin mwet lokoalok lal in acn sac, oayapa in lain ku su tuku saya me. Ma kalem kacl David uh pa yohk lulalfongi ac moniyuk lal nu sin God, oayapa el sie su ohi yurin mwet lal. Tusruktu, kutu pacl uh el ku in oru ma upa ac sulallal nu sin mwet uh in suk ma ac wo nu sel sifacna. Finne ouinge, ke pacl se Nathan, mwet palu lun Leum God, el akkalemye nu sel ma koluk lal, na David el auliyak ac inse pusisel in eis kalya su Leum God El sang nu sel.
Moul lal David, oayapa orekma yohk el orala, arulana pwengpeng yurin mwet Israel, pwanang in pacl tok ke elos sun ma upa nu selos, ac suk tuh in sifilpa oasr sie tokosra lalos, elos kena tuh in siena sin “tulik natul David.” Kalmac, elos lungse tuh sie sin fita lal David in leum faclos, su ac fah oana el.
Takla Lun Koanon Book Se Inge
David el leum fin acn Judah 1:1—4:12
David el leum fin Israel nufon 5:1—24:25
a. Tafun pacl meet lal 5:1—10:19
b. David ac Bathsheba 11:1—12:25
c. Mwe lokoalok ac pacl upa 12:26—20:26
d. Tafun pacl tok lal 21:1—24:25
1
David El Etauk Ke Misa Lal Saul
1 Tukun Saul el misa, David el foloko ke el tuh kutangla mwet Amalek, na el muta in acn Ziklag ke len luo. 2 Ke len toko ah, mwet fusr se tuku liki nien aktuktuk lal Saul. El tuh seya nuknuk lal ac sang fohkfok nu fin sifal in akkalemye asor lal. El som nu yorol David ac srimi nwe infohk uh in akfulatyal. 3 David el siyuk sel, “Kom tuku ya me?”
El topuk, “Nga kaingla liki nien aktuktuk lun mwet Israel.”
4 David el fahk, “Fahk nu sik lah mea sikyak.”
Na el topuk, “Mwet mweun lasr ah kaingla liki mweun ah, ac pukanten mwet lasr anwuki. Saul ac Jonathan wen natul, wi pac misa.”
5 Na David el fahk, “Kom etu fuka lah Saul ac Jonathan misa?”
6 El topuk, “Nga tuh muta Fineol Gilboa, ac nga liye ke Saul el fungyang nu fin osra natul ah, na chariot ac mwet kasrusr fin horse lun mwet lokoalok ah apkuranyang nu yorol.1:6–10; 1 Sam 31:1–6; 1 Chr 10:1–6 7 Na el forma twe liyeyuyak, ac el pangonyu. Na nga fahk, ‘Mea?’ 8 Na el siyuk lah su nga uh, na nga fahk lah nga mwet Amalek. 9 Na el fahk, ‘Fahsru ac uniyuwi! Nga arulana kineta, ac nga apkuran in misa.’ 10 Ouinge nga kalukyang nu yorol ac unilya, mweyen nga etu lah el ac na misa na el fin putatyang nu fac. Na nga eisla tefuro lal liki sifal, ac mwe naweyuk ke paol, pa nga use nu sum inge.”
11 David el arulana asor ac seya nuknuk lal, ac mwet lal nukewa oru oapana. 12 Elos asor ac tung ac eoksra nwe ke ekela kacl Saul ac Jonathan, oayapa ke Israel, mwet lun LEUM GOD, mweyen arulana pukanten mwet anwuki ke mweun ah.
13 Na David el siyuk sin mwet fusr se su use pweng se inge nu sel, “Kom mwet ya?”
El topuk, “Nga mwet Amalek, tusruktu nga muta facl sum uh.”
14 David el siyuk sel, “Kom ku tia sangeng in uniya tokosra se su sulosolla sin LEUM GOD?” 15 Na David el pangonma sie mwet lal ac fahk, “Unilya!” Ac mwet sac sringilya mwet Amalek sac, ac el misa. 16 Ac David el fahk nu sin mwet Amalek sac, “Misa lom ma sum sifacna. Kom sifacna sot mwatum ke kom fahkak lah pwaye kom uniya sie su LEUM GOD El sulela in tokosra.”
David El Eoksra Kacl Saul Ac Jonathan
17 David el onkakin on in eoksra se inge kacl Saul ac Jonathan, 18 ac el sapkin in lutiyuk nu sin mwet Judah. (Simla tari in Book in Jashar.) Jos 10:13
19 “Fin tohktok lun Israel, mwet kol lasr misa we!
Mwet mweun pulaiklana lasr elos ikori we!
20 Nimet fahkak nu in acn Gath,
Ku ke inkanek in Ashkelon.
Nimet oru tuh mutan Philistia in pwar;
Nimet lela tuh an nutin mwet pegan in enganak.
21 “Lela in wangin af ku aunfong putat nu fin tohktok Gilboa;
Lela in wangin fokin ima we pacl nukewa!
Mwe mwekin se lah mwe loang lun mwet pulaik lasr in oan we;
Mwe loang lal Saul tia sifil mosrweyuk.
22 Pisr natul Jonathan uniya mwet lokoalok puspis,
Osra natul Saul tia etu pakoten —
Sringilya mwet fokoko, ac uniya mwet lokoalok.
23 “Saul ac Jonathan, wolana ac saok;
Tukeni ke moul, tukeni ke misa;
Mui liki eagle, fokoko liki lion.
24 “Mutan Israel, kowos in mwemelil kacl Saul!
El nukumkowosyang ke nuknuk srusra yohk molo,
Ac nawekowos ke mwe yun ac gold.
25 “Mwet mweun pulaik ikori tari,
Anwuki elos ke mweun.
Jonathan el misa oan fin tohktok uh.
26 “Nga arulana asor keim, Jonathan, ma lik;
Kom tuh arulana saok sik!
Fuka lupan woiyen lungse lom nu sik,
Wo liki lungse lun sie mutan.
27 “Mwet mweun pulaik ikori tari,
Mwe mweun natulos sisila ac wanginla sripa.”