33
Moses El Akinsewowoye Sruf Nukewa Lun Israel
1 Pa inge kas in akinsewowo ma Moses, mwet lun God, el akinsewowoye mwet Israel kac meet liki el misa.
2 LEUM GOD El tuku Eol Sinai me;
El takak oana fact uh fin acn Edom,
Ac sreya mwet lal liki Eol Paran.
Oasr singoul tausin lipufan welul
Ac sie e firir oan lac paol layot.
3 LEUM GOD El lungse mwet lal.
Ac loangelos su ma lal.
Ouinge kut pasrla sisken nial
Ac akos ma El sapkin.
4 Kut akos Ma Sap ma Moses el ase nu sesr,
Sie ma saoklana lun mutunfacl sesr.
5 LEUM GOD El tokosrala lun mwet Israel
Ke pacl sruf nukewa ac mwet kol lalos tuh tukeni nu sie.
6 Moses el fahk ke sruf lal Reuben:
“Lela mwet Reuben in tiana wanginla,
Elos finne mwet na pu.”
7 Ke sruf lal Judah el fahk:
“LEUM GOD, porongo pusren tung ac kwafe lalos,
Sifilpa oraloseni nu yurin sruf wialos.
Mweun kaclos, LEUM GOD,
Ac kasrelos in lain mwet lokoalok lalos.”
8 Ke sruf lal Levi el fahk:
“LEUM GOD, akkalemye lungse lom nu sin mwet kulansap oaru lom, mwet Levi,
Ke Urim ac Thummim;
Kom tuh sang mwe srike nu selos in acn Massah,
Ac konauk inse pwaye lalos sisken kof Meribah.Exo 28:30; Exo 17:7; Exo 17:7; Oek 20:13
9 Elos akkalemye inse pwaye lalos nu sum
Yohk liki na nu sin papa, nina, mwet wialos, ku tulik natulos.
Elos akos ma sap lom,
Ac elos arulana liyaung wuleang lom.
10 Elos ac fah luti mwet lom in akos Ma Sap ac oakwuk lom;
Elos ac fah oru mwe kisa keng ac mwe kisa firir fin loang lom.
11 LEUM GOD, kasru sruf lalos in kapak ac ku;
Kom in engan ke ma elos oru.
Itungya mwet lokoalok lalos nukewa;
Tia lela elos in sifil tuyak.”
12 Ke sruf lal Benjamin el fahk:
“Pa inge sruf se LEUM GOD El lungse ac loango;
El liyalosyang ke len na fon,
Ac El muta inmasriolos.”
13 Ke sruf lal Joseph el fahk:
“Lela LEUM GOD Elan akinsewowoye facl selos ke af,
Ac ke kof ye faclu yak.
14 Lela acn selos in insewowo ke fokinsak mwesrla ye fact uh,
Ac kasrup ke fokinsak ma wo emeet ke kais sie pulan pacl.
15 Lela eol ma oan oemeet me in afla ke fokinsak wowo.
16 Lela acn selos in nwanala ke ma wo nukewa,
Ac akinsewowoyeyuk ke wolana lun LEUM GOD
Su kaskas liki kupo firir sac.
Lela mwe insewowo inge in tuku nu ke sruf lal Joseph,
Mweyen el pa tuh mwet kol inmasrlon tamulel wial.
17 Ku lal Joseph oana ku lun soko cow mukul,
Ac oana koen soko cow mukul lemnak.
Koac inge pa mwet lal Manasseh, su pus liki tausin,
Oayapa mwet lal Ephraim, su pus liki ngoul tausin.
El sang koac inge fakis mutunfacl uh,
Ac sinukunulos nu ke saflaiyen faclu.”
18 Ke sruf lal Zebulun ac sruf lal Issachar el fahk:
“Lela mwet Zebulun in kapkapak ke elos ac oru kuka lalos nu ke facl saya.
Ac lela kasrup lal Issachar in yokyokelik in acn sel sifacna.
19 Elos suli mwetsac nu fineol selos,
Ac oru mwe kise pwaye we.
Elos eis kasrpalos meoa me,
Ac liki puk weacn uh.”
20 Ke sruf lal Gad el fahk:
“Kaksakin God, su oru facl selos in yohk.
Sruf lal Gad el soano oana soko lion
In olela lac pao, ku sukela kulun sifa.
21 Elos eisla acn ma wo emeet tuh in ma lalos sifacna;
Ip lun sie mwet kol srisrngiyuki nu selos.
Elos akos ma sap ac oakwuk lun LEUM GOD
Ke mwet kol lun Israel elos tuh tukeni nu sie.”
22 Ke sruf lal Dan el fahk:
“Dan el soko lion fusr;
Ma sroma Bashan me.”
23 Ke sruf lal Naphtali el fahk:
“Yoklana mwe insewowo lal Naphtali ke sripen lungkulang lun LEUM GOD nu sel.
Acn sel oasr roto in Lulu Galilee ac som pac nu eir.”
24 Ke sruf lal Asher el fahk:
“Akinsewowoyeyuk sruf lal Asher yohk liki sruf saya.
Lela in el pa ohi yurin tamulel lal,
Ac lela facl sel in kasrup ke sak olive.
25 Srungul ke mutunpot nukewa ke siti sel in orekla ke osra,
Ac elan muta in misla pacl nukewa.”
26 Mwet Israel, wangin sie god oana God lowos.
El kasrusrsrusr in wolana lal yen engyeng uh,
El kasrma fin pukunyeng uh me in kasrekowos.
27 God El nuna nien molela lowos oemeet me,
El kafiskowosyak ke po kawil lal.
El lusak mwet lokoalok lowos meet liki kowos utyak nu yen selos,
Ac fahk nu suwos in kunauselosla nukewa.
28 Ouinge fwilin tulik natul Jacob elos muta in misla,
Ac okaki in sie facl sessesla ke wheat ac wain,
Yen aunfong inkusrao me aksroksrokye fohk uh.
29 Israel, fuka lupan engan lom!
Wangin sie oana kom,
Sie mutunfacl moliyukla sin LEUM GOD.
LEUM GOD sifacna pa mwe loang lom ac cutlass nutum
In loange kom ac sot kutangla nu sum.
Mwet lokoalok lom fah tuku putati ye motom,
Ac kom fah fotongolosi nu infohk uh.