15
On Lal Moses
1 Na Moses ac mwet Israel onkakin on soko inge nu sin LEUM GOD:
“Nga fah on nu sin LEUM GOD mweyen El kutangla ke sie kutangla wolana;
El sisla horse uh ac mwet kasrusr fac nu in meoa.Fwack 15:3
2 Leum God El nien molela na ku luk,
El pa moliyula.
El God luk, ac nga fah kaksakunul.
El God lun papa tumuk, ac nga fah onkakin ku fulat lal.Psa 118:14; Isa 12:2
3 LEUM GOD El oana sie mwet mweun,
Inel pa LEUM GOD.
4 “El sisla un mwet mweun lun Egypt ac chariot uh nu in meoa,
Captain ma sumat emeet elos walomla in Meoa Srusra.
5 Meoa loallana afnulosla;
Elos tili nwe kapin meoa uh oana eot uh.
6 “LEUM GOD, lac poum layot wolana ac kulana,
Lac poum layot foklalik mwet lokoalok in ip srisrik.
7 Ke kutangla kulana, kom siselosla su lain kom;
Ke follana lun kasrkusrak lom, kom esukulosyak oana mah pao.
8 Kom uk fin meoa uh ac kof uh ilusyukyak fulat nu lucng;
Tuyak suwohs oana sinka se;
Acn loallana meoa uh kekela.
9 Mwet lokoalok el fahk, ‘Nga fah ukwalos ac sruokolosi.
Nga fah kitalik mwe kasrup lalos ac eis ma nukewa nga lungse;
Nga fah fwacla cutlass nutik uh, ac eisla ma lalos nukewa.’
10 Tusruktu ke mong sefanna lom, LEUM GOD, na mwet Egypt uh walomla;
Elos tili oana lead in kof pulkulak.
11 “O LEUM GOD, su inmasrlon god uh oana kom?
Su oana kom in mutal wolana lom?
Su ku in oru mwenmen ac orekma kulana oana kom?
12 Kom asroela lac poum layot,
Ac faclu okomla mwet lokoalok lasr.
13 Ke sripen lungse kawil lom, kom oaru ac pwanla mwet su kom molela;
Ke ku lom, kom pwanulos nu ke facl mutal sum.
14 Mutanfahl uh lohng kac, ac elos rarrar ke sangeng;
Mwet Philistia elos keok ke tuninfong lalos.
15 Mwet kol lun Edom elos wi pac tuninfongla;
Mwet kulana lun Moab elos rarrar;
Ac wanginla pulaik lun mwet Canaan.
16 Tuninfong ac fosrnga putati nu faclos.
Ke elos liye po kulana lom, O LEUM GOD,
Elos koflana mukuikui, oana eot uh,
Nwe ke na mwet lom, su kom molela liki kohs,
Elos takla fahsr alukelosla.
17 Kom usalosme ac oakelosi fineol sum,
Acn se su kom, LEUM GOD, sulela in nien muta lom,
Sie acn mutal su kom sifacna musaela.
18 LEUM GOD, kom ac fah tokosra nwe tok ma pahtpat.”
On Lal Miriam
19 Mwet Israel fahsr sasla in meoa fin acn pao. Tusruktu pacl se chariot lun Egypt wi horse uh ac mwet kasrusr fac tuh som nu in meoa uh, LEUM GOD El folokoneni kof uh nu faclos ac afnulosla.
20 Mutan palu Miriam, su ma wial Aaron, el eis tambourine natul, ac mutan nukewa wi fahsr tokol. Elos srital ke tambourine ac onsrosro. 21 Miriam el yuk soko on in topkolos:
“Kowos on nu sin LEUM GOD, mweyen El kutangla ke sie kutangla wolana.
El sisla horse uh ac mwet kasrusr fac nu in meoa.”
Kof Mwen
22 Na Moses el pwanla mwet Israel liki Meoa Srusra nu yen mwesis Shur. Elos fahsr len tolu yen mwesis, ac tiana konauk kof. 23 Na elos tuku nu ke sie acn pangpang Marah, tusruktu kof we arulana mwen, oru elos tia ku in nim, pa sripa se sis acn sac pangpang Marah.*Marah: kalmen kas Hebrew se inge pa “mwen”. 24 Mwet uh torkaskas nu sel Moses ac siyuk, “Mea kut ac nim uh?” 25 Moses el insianaung in pre nu sin LEUM GOD, ac LEUM GOD El akkalemye nu sel sie polosak. Na Moses el sisang nu inkof uh, ac kof uh ekla ku in nimnim.
In acn Marah LEUM GOD El sang ma sap nu selos tuh elos in moul kac, ac oayapa El srikalos we. 26 El fahk, “Kowos fin arulana porongeyu, ac oru ma suwohs ye mutuk, ac liyaung ma nga sapkin, ac akos kas luk, na nga fah tia kai kowos ke kutena mas upa oana nga tuh oru nu sin mwet Egypt. Nga LEUM GOD, su akkeye kowos.”
27 Toko elos tuku nu Elim, acn se ma oasr unon singoul luo ac sak palm itngoul we. Elos tulokunak iwen aktuktuk selos wekof uh.