2
Misla Ma Pahtpat
1 Pa inge kas in fahkak su God El sang nu sel Isaiah, wen natul Amoz, ke acn Judah ac Jerusalem:
2 In pacl fahsru uh,
Fineol soko ma Tempul oan we
Ac fah fulat liki eol nukewa,
Ac fah ngeti nu fin inging nukewa.
Mutunfacl puspis ac fah rirme nu we,
3 Ac mwet puspis ac fah fahk,
“Lela kut in utyak nu fineol sin LEUM GOD,
Nu ke Tempul lun God lun Israel.
El ac fah luti kut ma El lungse kut in oru;
Kut ac fah fahsr ke inkanek lal.
Mweyen mwe luti lun LEUM GOD tuku Jerusalem me;
Ac El kaskas nu sin mwet lal Zion me.”
4 El ac fah aksuwosye alein inmasrlon mutunfacl lulap.
Elos ac fah tuktukya cutlass natulos nu ke mwe pukpuk,
Ac osra natulos nu ke mitmit in kosr lesak.
Mutunfacl nukewa ac fah tia sifilpa mweun,
Fah tia pac sifil akoeyuk mweun.Jol 3:10; Mic 4:3
5 Inge, kowos fwilin tulik natul Jacob, lela kut in fahsr in kalem lun LEUM GOD!
Filang Ac Fah Kunausyukla
6 O God, kom ngetla liki mwet lom, su fwilin tulik natul Jacob! Acn uh sessesla ke mwet inutnut su tuku liki acn kutulap ac liki acn Philistia. Mwet uh fahsrna tukun ouiya lun mwetsac. 7 Facl selos sessesla ke silver ac gold, ac tia ku in oaoala mwe kasrup lalos. Facl selos sessesla ke horse, ac tia ku in oaoala pisen chariot okoalos. 8 Acn selos sessesla ke ma sruloala, ac elos alu nu ke ma elos sifacna orala ke paolos.
9 Mwet nukewa ac fah akpusiselyeyuk ac akmwekinyeyuk. LEUM GOD, nimet nunak munas nu selos.
10 Elos ac wikwik ke luf inmasrlon eot fineol uh, ku pukanak luf infohk uh in srike in kaingkunla kasrkusrak lun LEUM GOD ac in wikla liki ku ac wonana lal!Fwack 6:15; 2 Thes 1:9 11 Sie len inse fulat lun mwet uh fah akpusiselyeyuk, ac filang lun mwet uh ac fah wanginla. Na LEUM GOD mukena ac fah akfulatyeyuk. 12 Ke len sac, LEUM GOD Kulana El ac akpusiselye mwet nukewa su oasr ku la, oayapa elos su inse fulat ac filang. 13 El ac kunausla sak cedar fulat in acn Lebanon, ac sak oak nukewa in facl Bashan. 14 El ac aktupasrpasrye eol fulat ac inging nukewa. 15 El ac kunausla tower fulat nukewa ac pot ku lun mweun. 16 El ac tilmakinya oak na lulap ac kato. 17 Inse fulat lun mwet uh ac fah akpusiselyeyuk, ac filang lun mwet uh ac fah wanginla, ac LEUM GOD mukena ac fah akfulatyeyuk ke len sac. 18 Ma sruloala uh ac fah wanginla ac tia sifil liyeyuk.
19 Mwet ac fah wikwik ke luf inmasrlon eot fineol uh, ku pukanak luf infohk uh in srike in kaingkunla kasrkusrak lun LEUM GOD, ac in wikla liki ku ac wolana lal, ke El ac tuku in osrokak faclu. 20 Ke len sac ac tuku, elos ac sisla ma sruloala gold ac silver ma elos orala, ac sisla nu yen kisrik ac fak uh muta we. 21 Ke LEUM GOD El ac tuku in osrokak faclu, mwet uh ac wikla luin luf ma elos pukanak, ku luf inmasrlon eot fineol uh, in srike in kaing liki kasrkusrak lal, ac in wikla liki ku ac wolana lal.
22 Kowos in tia sifilpa lulalfongi ku lun mwet — elos nukewa ac misa, na elos ac kasru fuka?