63
Kutangla Lun LEUM GOD Fin Mutunfacl Puspis
1 “Su tuku inge liki siti lun Bozrah in acn Edom? Su nukum nuknuk tuhnla ke srah inge, ac fahsr lal uh akkalemye lah oasr ku ac fulat lal?”
LEUM GOD pa inge, su kulana in molela, ac El tuku in sulkakin kutangla lal.63:1–6; Isa 34:5–17; Jer 49:7–22; Ezk 25:12–14; 35:1–15; Amo 1:11–12; Oba 1–14; Mal 1:2–5
2 “Efu ku nuknuk lal uh arulana srusra, oana sie mwet su futfut grape in orek wain?”
3 LEUM GOD El topuk, “Nga futungya mutunfacl puspis oana grape uh, ac wangin mwet tuku kasreyu. Nga fotngolos in kasrkusrak luk, ac srah kaclos tuhnala acn nukewa ke nuknuk luk uh.Fwack 14:20; 19:15; Fwack 19:13 4 Nga sulela mu pa inge pacl fal in molela mwet luk; pacl fal pac in kalyei mwet lokoalok lalos. 5 Nga lut ke nga ngetla ac liye lah wangin mwet tuku in kasreyu. Tusruktu kasrkusrak luk oru nga fokokoi, na nga eis kutangla ke ku luk sifacna.Isa 59:16 6 In kasrkusrak luk, nga futungya mutunfacl puspis ac kunauselosla. Nga okoala srah kaclos nu fin fohk uh.”
Pakoten Lun LEUM GOD Nu Sin Israel
7 Nga fah fahkak ke lungse kawil lun LEUM GOD.
Nga kaksakunul ke ma nukewa El oru nu sesr.
El arulana akinsewowoye mwet Israel
Ke sripen pakoten ac lungse pwaye lal.
8 LEUM GOD El fahk, “Elos mwet luk; elos ac tia kiapweyu.” Ouinge El molelosla 9 liki mwe keok lalos nukewa. Tia lipufan se, a LEUM GOD sifacna pa molelosla ke lungse ac pakoten lal. In pacl nukewa somla El nuna karinganulos, 10 a elos tuh utuk nunak lainul ac aktoasrye ngun mutal lal. Ke ma inge LEUM GOD El ekla ac mwet lokoalok lalos, ac mweun lainulos.
11 Na elos esamak pacl meet ah, ke pacl lal Moses, mwet kulansap lun LEUM GOD, ac elos siyuk, “El aya LEUM GOD su molela mwet kol lun mwet uh liki meoa uh? El aya LEUM GOD su sang ngun lal nu sel Moses, 12 su sang po ku lal nu ke lac po layot lal Moses, in sraclik kof uh ye mutalos, in pwanang Inel in pwengpeng ma pahtpat?Exo 14:21 13 Su kololos sasla yen loal?”
Elos tuh oana horse in acn mwesis ma fahsr ac tia tukukul. 14 Oana un cow ma pwenyukla nu in sie infahlfal kasrup fohk we, ouinge LEUM GOD El sang mongla nu sin mwet lal. El kolla mwet lal, ac oru Inel in pwengpeng ac sunakinyuk.
Sie Pre In Siyuk Ke Pakoten Ac Kasru
15 LEUM GOD, ngeti nu facsr inkusrao me, yen kom muta we in acn mutal ac wolana sum. Pia nunak yohk lom kacsr uh? Pia ku lulap lom? Pia lungse ac pakoten lom? Nimet likinsai kut. 16 Kom papa tumasr. Papa matu tumasr, Abraham ac Jacob, finne tia akilen kut, tusruktu kom, LEUM GOD, pa papa tumasr, su moli kut pacl nukewa. 17 Efu ku kom lela kut in kuhfla liki inkanek lom? Efu ku kom akupaye nunak lasr pwanang kut forla liki kom? Foloko ke sripalos su kulansupwekom, ac ke sripen mwet su nuna ma lom emeet me.
18 Kut, mwet mutal lom, tuh lisyukla sin mwet lokoalok lasr ke kitin pacl. Elos kunausya acn mutal sum. 19 Kom oru nu sesr oana kom in soenna leumi kut, ac oana kut in soenna mwet lom.
63:1 63:1–6; Isa 34:5–17; Jer 49:7–22; Ezk 25:12–14; 35:1–15; Amo 1:11–12; Oba 1–14; Mal 1:2–5
63:3 Fwack 14:20; 19:15; Fwack 19:13