2
God El Karingin Israel
1 LEUM GOD El fahk nu sik 2 in sulkakin mwe fahkak se inge nu sin mwet nukewa in Jerusalem.
“Nga esam lupan pwaye ac oaru lom nu sik ke kom srakna mutan fusr,
Fuka lupan lungse lom nu sik ke kut tufahna payukyak.
Kom tuh fahsrna tukuk in acn mwesis,
Sie acn ma soenna oasr ma yok we.
3 Israel, kom tuh sriyukla in ma na luk;
Kom sie ma mutal nu sik mukena.
Nga fah supu mwe keok ac mwe ongoiya
Nu faclos nukewa su akkeokye kom.
Nga, LEUM GOD, pa fahk ma inge.”
Ma Koluk Lun Papa Matu Tumun Mwet Israel
4 Porongo mwe fahkak lun LEUM GOD, kowos fwilin tulik natul Jacob ac sruf lun Israel. 5 LEUM GOD El fahk:
“Ma koluk fuka papa matu tomowos ah konauk in nga?
Efu ku elos forla likiyu?
Elos alu nu ke ma sruloala ma wangin sripa,
Oru elos ekla pac mwet wangin sripa.
6 Elos tiana nunku keik,
Nga ne molelosla liki acn Egypt
Ac kololosme sasla yen mwesis;
Sie acn turangang ac pukanten luf we,
Sie acn pao ac facl in misa,
Yen wangin mwet muta we
Ac wangin pac mwet fufahsryesr we.
7 Nga usalosme nu in sie facl kasrup ac wo fohk we,
Elos in insewowo ke kosrani we ac ke ma wo pac saya.
A elos tuh akkolukyela facl sik;
Elos akfohkfokyela facl se su nga sang nu selos.
8 Mwet tol elos tiana siyuk, ‘LEUM GOD El oasr oya?’
Elos su sasla ke ma sap elos tia eteyu.
Mwet kol elos tuyak lainyu.
Mwet palu kaskas ke inen Baal,
Ac alu nu ke ma sruloala lusrongten.
LEUM GOD El Lain Mwet Lal
9 “Ouinge nga, LEUM GOD, fah akkalemye ma nga lain kowos kac.
Nga fah tia tui in lain fwilin tulik nutuwos.
10 Som nu layen roto, nu ke tuka Cyprus,
Ac supwala sie mwet nu layen kutulap nu in facl Kedar.
Kowos fah liye lah wangin kain inge nu sikyak meet.
11 Wangin sie mutunfacl nu aolla god la uh,
God inge finne tia god pwaye.
A mwet luk uh tuh sisyula,
God se su akwoyalos,
Ac elos forla nu ke god ma tia ku in oru kutena ma nu selos.
12 Ke ma inge nga sapkin yen engyeng uh in rarrarak ke mwe aksangeng,
In fwefela ac oela,
13 Tuh mwet luk elos orala ma koluk luo:
Elos forla likiyu,
Nga su unon in kof loslos nu selos,
Ac elos pukanak lufin kof —
Lufin kof su wohn ac tia ku in sruokya kof.
Fokin Sesuwos Lun Israel
14 “Israel el tia sie mwet kohs;
Tia osweyukla el nu ke moul in kohs.
Na efu ku mwet lokoalok lal suk in sruokilya?
15 Elos kouyak nu sel oana pusren lion uh.
Elos kunausla facl sel, oan mwesasla,
Ac siti we musalla ac wanginla mwet muta we.
16 Aok, mwet Memphis ac Tahpanhes
Elos fukulya sri in ahlunsifal.
17 Israel, kom na pa sifacna oru in upa nu sum!
Kom sisyula, LEUM GOD lom,
Ke nga tuh pwen kom inkanek uh.
18 Ya oasr ma ac wo nu sum kom fin som nu Egypt
In nim kof ke Infacl Nile?
Ya oasr ma ac wo nu sum kom fin som nu Assyria
In nim kof ke Infacl Euphrates?
19 Ma koluk lom sifacna ac fah kai kom,
Ac forla lom likiyu fah liskomla.
Kom ac fah akilen lah sie ma na koluk ac mwen
Pa in sisla LEUM GOD lom,
Ac tila inse pwaye nu sik.
Nga, LEUM GOD Fulatlana ac Kulana, pa fahk ma inge.”
Israel El Srunga Alu Nu Sin LEUM GOD
20 LEUM GOD Fulatlana El fahk,
“Israel, kom nuna srunga na muta ye ku luk oemeet me.
Kom tiana akosyu ku alu nu sik.
Fin mangon eol nukewa,
Ac ye sak folfol nukewa
Kom tuh alu nu ke god eslap uh.
21 Nga yukwikomi oana soko fain sacnsan
Ke fita ma wo oemeet.
Na liye ma kom ekla nu kac inge!
Kom oana soko fain kolukla ac wanginla sripa.
22 Kom finne oulkomla ke soap na ku
Nga ac srakna liye tuhn fohkfok lun ma koluk lom.
23 Efu ku kom ku in fahk mu kom tiana aktaekye monum,
Ac fahk mu kom tiana wi alu nu sel Baal?
Esam lupan ma koluk kom oru infahlfal uh;
Ngetang liye ma kom orala inge.
Kom oana soko camel mutan lemnak
Ma yuwot yume sukok camel mukul,
24 Sasang nu in yen turangang uh.
In pacl el ouinge uh, su ac ku in kutongilya?
Camel mukul ma lungse el uh fah tia enenu in sokol,
Mweyen el pa ac sokolos.
25 Israel, nimet aktotoye niom,
Ku lela in paola kapinsrulyom
Ke ukweyen god ngia.
A kom fahk, ‘Mo! Nga tia ku in forla.
Nga lungse god saya uh,
ac nga fah ukwalos.’ ”
Fal In Kalyeiyuk Israel
26 LEUM GOD El fahk, “Oana ke sie mwet pisrapasr el ac mwekinla ke ac sruhu el, kowos mwet Israel nukewa ac fah mwekinla pac — tokosra, mwet fulat, mwet tol ac mwet palu lowos. 27 Kowos nukewa ac fah mwekinla — kowos su fahk mu sak soko pa papa tomowos ac eot se pa nina kiowos. Ma inge ac sikyak mweyen kowos forla likiyu ac tia nget nu sik. Tusruktu ke pacl se kowos ac sun ongoiya, na kowos ac siyuk nga in tuku ac molikowosla.
28 “Pia god ma kowos sifacna taflela nu suwos uh? Pacl kowos ac sun ongoiya, lela elos in molikowosla, elos fin ku! Arulana pusla god lowos, oana pisen siti in acn Judah. 29 Mea kowos torkaskas kac uh? Efu kowos orekma koluk na lainyu? 30 Nga tuh kai kowos, tusruk wanginna sripa mweyen kowos tia lela nga in luti kowos. Kowos uniya mwet palu lowos, oana soko lion sulallal. 31 Mwet Israel, porongo ma nga fahk uh. Ya nga oana sie acn mwesis nu suwos, oana sie acn lohsr ac sensen? Na efu kowos ku fahk mu kowos ac oru oana lungse lowos, ac kowos ac tiana foloko nu yuruk? 32 Ya sie mutan fusr ku in mulkunla mwe naweyuk lal, ku sie mutan akola in marut ku in mulkunla nuknuk in marut lal? Tia ku. Tusruktu nga tia ku in oakla pisen len mwet luk uh mulkinyula. 33 Kom arulana etu in konauk mukul kom lungse orek pwar se. Finne mutan koluk se, el ku in lutlut sum. 34 Nuknuk lom tuhnla ke srahn mwet sukasrup su wangin mwata, tia ke srahn mwet pisrapasr.
“Tusruktu finne ma inge nukewa orek, 35 a kom srakna fahk mu, ‘Wangin mwetik! LEUM GOD El tiana kasrkusrak sik.’ Tusruktu nga, LEUM GOD, fah kai kom mweyen kom lafwekin lah kom orekma koluk. 36 Efu ku arulana fisrasr sum in ikikil nunak lom? Kom ac toasrla sin Egypt, oana ke kom tuh toasrla sin Assyria.*toasrla sin Assyria: ke mwet Israel elos sukok kasru sin mwet Assyria, mwet Assyria tiana kasrelos. 37 Kom ac fah forla liki Egypt, ac suwoli ke mwekin. Nga, LEUM GOD, siselosla su kom lulalfongi. Wangin kutena ma wo kom ac eis selos.”
*2:36 toasrla sin Assyria: ke mwet Israel elos sukok kasru sin mwet Assyria, mwet Assyria tiana kasrelos.