10
Ma Sruloala Ac Alu Pwaye
1 Mwet Israel, porongo kas lun LEUM GOD nu suwos 2 fahkang:
“Nikmet ukwe ouiya lun mutanfahl saya;
Nimet fosrnga ke ma sakirik ma ac sikyak inkusrao,
Mutanfahl saya finne tuninfong kac.
3 Alu lun mwet inge wangin sripa.
Soko sak ac pakpuki insak uh,
Na kihlyak ke kufwen sroasr lun mwet tufahl,
4 Ac yunla ke silver ac gold.
Osra pa sang sruokya
In tia topla.
5 Kain ma sruloala inge oana luman mwet kikiap se ma kaskiyuki ke ima uh.
Elos tia ku in kaskas.
Enenu in utuk elos
Mweyen elos tia ku in fahsr.
Nimet sangeng selos.
Elos tia ku in akkolukye kowos,
Ac wangin pac ma wo elos ku in oru nu suwos.”
6 LEUM GOD, wangin sie oana kom.
Kom kulana,
Ac Inem fulat ac yoklana ku la.
7 Kom pa tokosra lun mutunfacl nukewa, na su ac tia sunakin kom?
Fal in akfulatyeyuk kom.
Wangin sie oana kom
Inmasrlon mwet lalmwetmet nukewa lun mutunfacl uh,
Ku inmasrlon kutena tokosra lalos.Fwack 15:4
8 Mwet nukewa su alu nu ke ma sruloala elos sulalkung ac lalfon.
Mea elos ac ku in etala sin sie ma orekla ke sak?
9 Ma sruloala lalos nukla ke silver Spain me
Ac ke gold Uphaz me,
Orekla sin mwet usrnguk in sroasr.
Elos nuknukyang ke nuknuk folfolnemnem ac sroninmutuk
Orekla sin mwet orek nuknuk na usrnguk.
10 Tusruktu kom, LEUM GOD, pa God pwaye
Ac kom God moul
Ac tokosra ma pahtpat.
Ke pacl se kom kasrkusrak, faclu kusrusr;
Mutanfahl uh tia ku in muteng mulat lom. (
11 Kowos enenu in fahkang nu selos lah god ma tia orala faclu ac kusrao, ac fah kunausyukla. Elos fah wanginla liki acn nukewa fin faclu.)
Soko On In Kaksak in God
12 LEUM GOD El orala faclu ke ku lal;
El oakiya faclu ke lalmwetmet lal,
Ac El asroelik kusrao ke etu lal.
13 Ke sap lal, kof lucng liki yen engyeng uh*kof lucng liki yen engyeng uh: liye Gen 1:6–8 ngirngir;
El orama pukunyeng uh liki saflaiyen faclu.
El oru sarom in sarmelik in af uh
Ac supwama eng uh liki nien filma lal.
14 Ke mwet uh liye ma inge, elos akilen lupan lalfon ac nikin lalos sifacna.
Elos su oru ma sruloala elos mwekinla,
Mweyen god ma elos orala uh tia pwaye ac wangin moul la.
15 Elos ma lusrongten ma fal in pilesreyuk.
Elos ac fah kunausyukla pacl se LEUM GOD El ac tuku in nununkalos.
16 God lal Jacob El tia oana ma inge.
El pa orala ma nukewa,
Ac El sulela mwet Israel elos in mwet lal.
Inel pa LEUM GOD Kulana.
Pacl In Sruoh Se Ma Ac Tuku
17 Mwet Jerusalem, apweni! Kuhlusyuki kowos! 18 LEUM GOD El ac siskowosla liki facl se inge. El ac itungkowosi nwe ke na wangin sie suwos lula. LEUM GOD pa fahk ma inge.
19 Mwet Jerusalem elos wowoyak ac fahk,
“Fuka lupan ongoiya uh!
Kinet kacsr uh ac tiana mahla.
A kut tuh nunku mu kut ac ku in muteng ma inge!
20 Lohm nuknuk sesr uh musalsalu;
Sucl ma sang sruok uh wotelik.
Tulik natusr nukewa fahsr liki kut;
Wangin mwet lula in sifil tulokunak lohm nuknuk sesr;
Wangin mwet in sripisrya mwe lisrlisr kac uh.”
21 Na nga topuk, “Mwet kol lasr elos lalfon;
Elos tia siyuk kolyuk sin LEUM GOD.
Pa inge sripa pwanang elos tia kapkapak,
Ac mwet lasr uh fahsrelik.
22 Porongo! Oasr pweng se tuku!
Oasr sie mukuiyak lulap in sie mutunfacl epang;
Mwet mweun we ac fah ekulla siti lun Judah nu ke sie acn mwesis,
Nu ke acn in muta lun kosro lemnak uh.”
23 LEUM GOD, nga etu lah wangin sie mwet sifacna kol inkanek lal,
Wangin mwet sifacna nununku moul lal.
24 LEUM GOD, aksuwosye mwet lom,
Tusruktu nimet kom arulana upa nu sesr,
Ku kai kut ke pacl kom kasrkusrak,
Mweyen ac tuh pa ingan saflaiyen moul lasr.
25 Furokla kasrkusrak lom nu fin mutunfacl ma tia etekom,
Ac nu fin mwet su tia alu nu sum.
Elos onela mwet lom.
Elos kunauskutla na pwaye
Ac likiya acn sesr in oan musalla.