18
Jeremiah In Lohm Sin Mwet Orek Ahlu Kle
1 LEUM GOD El fahk nu sik, 2 “Oatula nu ke lohm sin mwet orek ahlu ke fohk kle, ac ingo nga fah sot nu sum kas ma nga lungse kom in fahkak.” 3 Ouinge nga som nu we, ac nga liyauk mwet orek ahlu sac ke el orekma ke wheel in orekma lal. 4 El fin orala sie ahlu tuh tia sun lungse lal, el ac eis kle sac ac ekulla nu ke sie pacna lumah.
5 Na LEUM GOD El fahk nu sik, 6 “Ya tia oasr ku luk in oru nu suwos, mwet Israel, oana ke mwet orek ahlu se ac oru ke kle lal uh? Kowos muta inpouk oana ke kle uh oan inpoun mwet orek ahlu. 7 Nga fin fahk ke kutu pacl mu nga ac fusak, koteya, ku kunausla kutena mutunfacl ku tokosrai, 8 a toko mutunfacl sac forla liki orekma koluk lal, na nga ac tila oru ma nga tuh fahkla mu nga ac oru. 9 Ku nga fin fahk mu nga ac musaeak ku akkeye sie mutunfacl ku tokosrai, 10 na toko mutunfacl sac tia akosyu ac orekma koluk, na nga ac tila oru ma nga fahkla mu nga ac oru. 11 Ke ma inge, fahkang nu sin mwet Judah ac mwet Jerusalem lah nga akoo in lainulos ac kalyaelos. Fahkang elos in tui liki moul koluk lalos, ac aolla ouiya ma elos oru ingan. 12 Elos ac topuk kom ac fahk, “Mo, efu ku kut in tui? Kut ac likkekena ac oru na ma koluk ke lungse lasr.”
Mwet uh Pilesrala LEUM GOD
13 LEUM GOD El fahk,
“Siyuk sin mutunfacl nukewa lah nu oasr pacl ma
Kain ouiya inge nu sikyak meet.
Ouiya na koluk se pa mwet Israel uh oru inge!
14 Ya nu oasr pacl wanginla snow fin acn eoteot fulat Lebanon?
Ya sungan infacl oyohu we uh nu oasr pacl mihnla?
15 Ma inge finne fahsrna wo, a mwet luk uh mulkinyula.
Elos esukak mwe keng nu ke ma sruloala.
Elos tukulkul ke inkanek lalos.
Elos tia sifilpa fahsr ke ouiya meet ah,
A elos fahsr ke inkanek ma tia akilenyuki.
16 Elos orala acn se inge in sie mwe aksangeng,
Ma ac srungayukla nwe tok.
Elos nukewa su fahsr we ac fah arulana lut ke ma elos liye.
Elos ac fah usruk sifalos ke fwefela lalos.
17 Nga ac fah luselik mwet luk ye mutun mwet lokoalok lalos,
Oana ke kutkut uh ukukla ke eng kutulap.
Nga ac fah ngetla lukelos,
Ac tia kasrelos ke pacl in ongoiya nu selos.”
Sie Pwapa Sulallal Lainul Jeremiah
18 Na mwet uh fahk, “Wona in oasr ma kut oru nu sel Jeremiah! Oasr mwet tol yorosr in luti kut, ac mwet lalmwetmet in aknunakye kut, ac mwet palu in fahkak kas lun God nu sesr. Lela kut in orek loh kikiap lainul ac tia sifil lohng ma el fahk uh.”
19 Na nga pre ac fahk, “LEUM GOD, lipsre pre luk, ac porongo ma mwet lokoalok luk inge fahk keik. 20 Ya ma koluk uh pa molin ma wo? A liye, elos pukanak luf se nu sik nga in putatyang nu loac. Esam lah nga tuh tuku nu yurum in kwafe kaclos, ac srike in loangelos liki kasrkusrak lom. 21 Ke ma inge, LEUM GOD, lela tulik natulos in misa ke masrinsral, ac in anwuki pac ke mweun. Lela mukul uh in misa ke mas ac mwet fusr in anwuki ke mweun. Mutan an in katinmasla, ac wangin tulik natulos. 22 Supwala sie un mwet koluk in kunausya lohm selos ac usla koano uh ke wangin eteya selos. Oru elos in wowoyak ke tuninfong. Mwet inge pukanak sie luf nga in putatyang nu loac, ac oakiya mwe kwasrip in sruokyuwi. 23 LEUM GOD, kom etu nufon pwapa lalos in uniyuwi. Nikmet nunak munas nu selos ke orekma koluk lalos, ku tulalosla liki ma sufal lalos. Siselosi nu in fohk uh ac kutangulosla. Oru ma inge nu selos in kasrkusrak lom.”