22
Kas Lal Jeremiah Nu Sin Tokosra Lun Judah
1 LEUM GOD El fahk nu sik nga in tufokla nu in lohm sin tokosra lun Judah, ac fahk kas inge: 2 “Lohng kas lun LEUM GOD, O tokosra lun Judah su muta fin tron lal David — kom, ac mwet pwapa fulat lom, ac mwet Jerusalem nukewa su ilyak ke mutunpot inge. 3 Nga, LEUM GOD, sapkin nu suwos in oru ma suwohs ac pwaye. Karinganang mwet ma pisreyukla ma la liki inpoun mwet pisrapasr. Nimet akkolukye ku akkeokye mwetsac, mwet mukaimtal ac katinmas, oayapa nimet uniya mwet wangin mwata in acn mutal se inge. 4 Kowos fin oru oana ma nga sapkin, na ac fah oasr tokosra tuku ke fwilin tulik natul David nwe tok. Elos, ac mwet fulat lalos ac mwet nukewa lalos saya, fah uti‐utyak ke mutunpot lun inkul fulat ke chariot ac fin horse uh. 5 Tusruktu kowos fin tia akos ma nga sapkin inge, na nga fulahk ke Inek sifacna lah inkul fulat se inge fah sikiyukla. Nga, LEUM GOD, pa fahk ma inge.Mt 23:28; Lk 13:35
6 “In nunak luk, inkul fulat sin tokosra lun Judah oasku oana acn Gilead, ac oana eol in acn Lebanon. Tusruktu nga ac oru tuh in sie acn oan musalla ma wangin mwet muta we. 7 Nga ac supwala mwet in kunausya. Elos ac us tuhla lalos ac pakiya sru cedar kato we, ac sisla nu in e uh.
8 “Na toko, mwet in mutunfacl puspis fah fahsr aliki ac asiyuki sie sin sie lah efu ku nga, LEUM GOD, oru ouinge nu ke siti pwengpeng se inge. 9 Na elos fah topuk mu mweyen kowos fahsr sayen wuleang lowos yurin God lowos ke kowos alu ac kulansupu god saya.”
Fahkak Lal Jeremiah Kacl Joahaz
10 Mwet Judah, nimet tungel Tokosra Josaiah;
Kowos in tia eoksra ke misa lal.
A kowos in arulana tung kacl Joahas, wen natul.
Elos ac usalla, ac el ac tia sifil foloko.
El ac tiana sifilpa liye acn el isusla we.
11 LEUM GOD El fahk kacl Joahas su aolla Josiah, papa tumal, in tokosra Judah, “El som liki acn inge, ac el ac tiana sifil foloko.2 Tok 23:31–34; 2 Chr 36:1–4 12 El ac misa in facl se elos usalla nu we, ac el ac tia sifil liye facl se inge.”
Fahkak Lal Jeremiah Kacl Jehoiakim
13 We nu sin mwet se su musai lohm sel ke sesuwos
Ac akyokye ke inkanek kutasrik,
Su akkohsye mwet in facl sel in orekma nu sel
Ac tia sang molin orekma lalos.
14 We nu sin mwet se ma fahk,
“Nga ac musaela sie lohm lulap nu sik sifacna
Ac oru tuh infukil lucng uh in yohk.”
Ouinge el orala winto in lohm sel
Ac sinkaeak acn loac ke sak cedar,
Ac sroalela ke sroal srusra.
15 Ya ma inge ac oru tuh kom in sie tokosra wo
Kom fin musa lohm ke sak cedar
Ma wo liki lohm sin mwet ngia?
Papa tomom el insewowo ke moul lal nufon.
Orekma lal pwaye ac suwohs pacl nukewa,
Ac el kapkapak in ma nukewa el orala.
16 El oru nununku suwohs nu sin mwet sukasrup,
Na ma nukewa fahsr pac wo nu sel.
Pa inge kalmen etu ke LEUM GOD.
17 A kom sukna ma ac wo nu sum sifacna;
Kom uniya mwet wangin mwata
Ac arulana aklalfonye mwet lom.
LEUM GOD pa fahk ma inge.
18 Ouinge LEUM GOD El fahk kacl Tokosra Jehoiakim lun Judah, wen natul Josiah,
“Wangin mwet ac fah mwemelil ke misa lal, ku fahk mu,
‘Pakomuta kawuk se luk! Fuka koluk in mau!’
Wangin mwet ac fah wowoyak ac tung kacl ac fahk,
‘Leum luk, We! Tokosra, We!’2 Tok 23:36—24:6; 2 Chr 36:5–7
19 Ac fah orek nu sel oana misa lun soko donkey:
Ac fah amala el
Ac sisila likin mutunpot Jerusalem.”
Fahkak Lal Jeremiah Ke Safla Lun Jerusalem
20 Mwet Jerusalem, fahla nu Lebanon ac wowoyak,
Fahla nu facl Bashan ac tung;
Som ac wowoyak infulan eol Moab,
Mweyen kutangyukla mutunfacl nukewa su kasrekom ke pacl in mweun.
21 LEUM GOD El kaskas nu sum ke pacl kom srak mut,
A kom tia lungse porongo.
Pa ingan ouiyom in moul lom nufon —
Kom tiana akos LEUM GOD.
22 Mwet kol lom ac fah ukukla ke eng;
Mwet kasrekom in pacl in mweun ac utukla nu in sruoh.
Siti sum ac fah aklusrongtenyeyuk ac akmwekinyeyuk
Ke sripen ma koluk nukewa kom orala.
23 Kom mongla wo in lohm sum orekla ke sak cedar ma utuku Lebanon me;
Tusruktu ac fah mwe pakomuta na yohk nu sum ke pacl se ngal upa ac sun kom —
Ngal oana ngal lun sie mutan isus.
Nununku Lun God Nu Sel Jehoiachin
24 LEUM GOD El fahk nu sel Tokosra Jehoiachin,*Jehoiachin: sie pac ine kacl Jeconiah pa Jehoiachin. wen natul Tokosra Jehoiakim lun Judah, “Oana ke nga pa God moul, fin kom pa ring lun tokosra ma oan lac po layot sik, nga ac faiskomla2 Tok 24:8–15; 2 Chr 36:9–10 25 ac eiskomyang nu sin mwet ma lungse unikomi, su kom sangeng se. Nga ac eiskomyang nu sel Tokosra Nebuchadnezzar lun Babylonia ac un mwet mweun lal. 26 Nga ac liskomla ac nina kiom ke ku luk tuh komtal in mwet sruoh in sie facl ma komtal kewa tia isusla we, ac komtal ac fah misa we. 27 Komtal ac fah kena sifilpa liye facl se inge, tusruktu komtal ac fah tiana foloko.”
28 Ac nga fahk, “Ya Tokosra Jehoiachin el oana soko sufa fokelik ma sisila ac wangin mwet enenu? Na efu ku el, ac tulik natul, utukla nu in sruoh nu ke sie facl ma elos tiana etu?”
29 O fahl Judah, fahl Judah, fahl Judah!
Porongo ma LEUM GOD El fahk:
30 “Filiya ke ma simusla lah ac fah wangin tulik natul Jehoiachin.
Ac fah wangin ma wo el orala in pacl lal.
Wangin sin fwilin tulik natul
Ac fah aolulla ke tron lal David
In leum fin acn Judah.
Nga, LEUM GOD, pa fahk ma inge.”
22:11 2 Tok 23:31–34; 2 Chr 36:1–4
22:18 2 Tok 23:36—24:6; 2 Chr 36:5–7
*22:24 Jehoiachin: sie pac ine kacl Jeconiah pa Jehoiachin.
22:24 2 Tok 24:8–15; 2 Chr 36:9–10