Pweng Wo Ke Jesus Christ Ma Simla Sel
JOHN
Tukakinyen Book In JOHN
Book se inge, Pweng Wo Ke Jesus Christ Ma Simla Sel John, fahkak ke Jesus lah el Kas kawil lun God, su “Kas el ekla mwet ac muta inmasrlosr.” Book se inge simla tuh mwet ma riti uh in ku in lulalfongi lah Jesus pa Mwet Lango su God El tuh wulela kac, oayapa lah el Wen nutin God, ac elos fah ku in eis moul fin oasr lulalfongi lalos in el (20:31).
Mutaweyen book uh fahkak kalem lah Jesus pa Kas kawil lun God. Ip se meet ke book uh takunla kutu orekma usrnguk su akkalemye lah Jesus el Wen Nutin God, ac el Mwet Lango se ma wulela orekla kac. Tukun kas inge, oasr pac kutu sramsram in aketeya kalmen orekma usrnguk inge. Ip se inge srumun ke kutu mwet ma lulalfongi Jesus ac forla fahsr tokol, ac ke kutu mwet su lainul ac tia lungse lulalfongi. Chapter 13 nu ke 17 srumun yokna ke nunak lun Jesus nu sin mwet tumal lutlut ke fong se tukakinyukyak el, ac kas in akoelosla ac akpulaikyalos ke eku se ma sruhu el. Chapter 18 nu ke 21 srumun ke tukakyak ac sruoh lal, oayapa ke sripsripyak ac moulyak lal, ac ke sikyak lal nu sin mwet tumal lutlut tukun el moulyak ah.
Sramsram ke mutan se ma koneyukyak mu el kosro (8:1–11) bracketi meyen pus me simusla matu ac kutu pac leng meet ah sisla, ac kutu pac fuliya ke kutena yen saye.
John el srumun yokna ke mwe kite lun moul kawil in Christ — sie mwe kite su mutawauk inge, ac su ma nu selos su akilen tuh pwaye Jesus el inkanek, pwaye, ac moul. Sie pac ma kalem ke book lal John pa orekmakinyen ma su oasr faclu in akfisrasrye aketeya ke ma saok ke moul in ngun: oana kof, bread, kalem, mwet shepherd ac sheep natul, oa in grape ac fahko kac.
Takla Lun Koanon Book Se Inge
Mutaweyen book uh 1:1–18
John Baptais ac mwet tuma lutlut oemeet lun Jesus 1:19–51
Luti lun Jesus yurin mwet uh 2:1—12:50
Wik safla ke moul lun Jesus in acn Jerusalem ac acn apkuran nu we 13:1—19:42
Moulyak ac sikyang lun Leum nu sin mwet uh 20:1–31
Saflaiyen book uh: Jesus el sikyak pac Galilee 21:1–25
1
Kas In Moul
1 Meet liki orekla faclu, Kas*Kas: in kas Greek fahk mu “Logos” su kalmac apkuran in oana Lemlem Kulana lun God. el nuna oasr yurin God, ac el oapana God. 2 Kas se inge el oasr yurin God meet liki mutaweyen faclu. 3 God El orala ma nukewa kacl. Wangin kutena ma orekla saya, fin tia ke Kas. 4 Moul uh tuku liki Kas, ac moul se inge pa ase kalem nu sin mwet uh. 5 Kalem el tolak in lohsr, ac lohsr uh kofla konela.
6 God El supwama mwet fahkak se lal, pangpang John, 7 su tuku in fahkak nu sin mwet uh ke kalem sac, tuh mwet nukewa in lohng mwe fahk se inge ac lulalfongi. 8 Tia el pa kalem sac, a el tuku in fahkak ke kalem sac. 9 Pa inge kalem na pwaye — kalem se ma tuku nu faclu ac tolak mwet nukewa.
10 Kas el nuna oasr faclu, ac God El nwe orala faclu kacl, a faclu tiana akilenul. 11 El tuku nu yen sel sifacna, a mwet lal sifacna tia eisal. 12 Tusruktu, oasr kutu sin mwet uh eisal ac lulalfongi in el; ke ma inge el oru tuh elos in ku in ekla tulik nutin God. 13 Elos tia ekla tulik nutin God ke inkanek in isusla lun mwet, ku ke lungse lun mwet, a ke oakwuk lun God.
14 Kas el ekla mwet ac muta inmasrlosr, sessesla ke kulang ac pwaye. Kut liye wolana lal, wolana su el eis ke sripen el Wen sefanna nutin Papa.
15 John el kaskas kacl. El wowoyak ac fahk, “Pa inge el su nga tuh kaskas kac ke nga fahk, ‘El tuku tukuk, tusruktu el fulat likiyu, mweyen el nuna oasr meet liki nga tuh isusla.’ ”
16 Liki lungkulang yoklana lal el kalwenina in ase mwe insewowo nu sesr nukewa. 17 God El ase Ma Sap kacl Moses, a kulang ac pwaye tuku kacl Jesus Christ. 18 Wangin sie mwet na liye God, a wen sefanna natul, su oana God ac muta sisken Papa pacl nukewa, el pa arulana fahkulak kalem nu sin mwet uh.
Kas Sel John Baptais
(Matthew 3:1–12; Mark 1:1–8; Luke 3:1–18)
19 Mwet fulat lun mwet Jew in Jerusalem supwala kutu mwet tol ac mwet Levi nu yorol John in tuh siyuk sel, “Su kom an?”
20 John el tia srunga topuk, ac el fahk lemtulauk, “Tia nga pa Christ.”
21 Elos siyuk, “Na fin ouingan, su kom an? Kom pa Elijah?”
John el topuk, “Mo, tia nga pa el.”
Elos siyuk, “Kom pa Mwet Palu sac?”
El topuk, “Mo.”
22 Elos fahk, “Na fahk nu sesr lah su kom an. Mea kom ac fahk keim sifacna? Enenu kut in us sie top folokla nu yorolos su supwekutme.”
23 John el topuk ke kas ma mwet palu Isaiah el simusla:
“Nga pa ‘pusren sie su wowoyak yen mwesis:
Oru sie innek suwohs nu sin Leum elan fahsr kac!’ ”
24 Na mwet utuk kas ma supweyukla sin mwet Pharisee, 25 elos siyuk sel, “Fin tia kom pa Christ ku Elijah ku Mwet Palu sac, efu ku kom baptaisi mwet uh?”
26 John el topuk ac fahk, “Nga baptais ke kof, tusruktu oasr sie su muta inmasrlowos su kowos tiana akilen. 27 El tuku tukuk, tusruktu nga kupansuwol in tulala ah losyen fahluk lal.”
28 Ma inge nukewa sikyak in acn se pangpang Bethany, ma oan kutulap in Infacl Jordan,†Bethany, ma oan kutulap in Infacl Jordan: acn se inge sie liki Bethany se ma oan fototo nu Jerusalem. yen John el orek baptais we.
Lamb Nutin God
29 Len se toko ah, John el liyalak Jesus ke el tuku nu yorol, ac el fahk, “Liye, Lamb nutin God pa ingo, su eela ma koluk lun faclu! 30 Pa inge el su nga tuh kaskas kac ke nga fahk, ‘Mwet se ac tuku tukuk, tusruktu el fulat likiyu, mweyen el nuna oasr meet liki nga tuh isusla.’ 31 Nga tuh tiana etu lah su el, tusruktu nga tuku baptaisi mwet ke kof in fahkulak nu sin mwet Israel.”
32 Ac John el fahkak pac ouinge, “Nga sifacna liye ke Ngun oatui oana sie wuleoa inkusrao me, ac oan facl. 33 Nga srakna tia etu lah el pa mwet sac, a God, su supweyume in baptais ke kof, El fahk nu sik, ‘Kom fah liye Ngun oatui ac oan fin sie mwet. El pa mwet se ma ac baptais ke Ngun Mutal.’ ” 34 Na John el fahk, “Nga liye tari, ac nga fahk nu suwos lah el pa Wen nutin God.”
Mwet Tuma Lutlut Oemeet Lun Jesus
35 In len se toko ah, John el sifilpa tu insac, wi luo sin mwet tuma lutlut lal. 36 El liye ke Jesus el fahsryak, na John el fahk, “Pa ingo Lamb nutin God!”
37 Mwet lutlut luo lal eltal lohng ke el fahk ouinge, na eltal fahsr tokol Jesus. 38 Jesus el tapulla ac liye lah eltal fahsr tokol, ac el siyuk, “Mea komtal suk an?”
Na eltal topuk, “Rabbi, kom muta oya?” (Kalmen Rabbi pa “Mwet luti.”)
39 Jesus el topuk, “Fahsru liye.” (In pacl sac ac ao akosr ma ke tafun len tok.) Ouinge eltal welul som ac liye yen el muta we, ac mutana yorol nwe ke ekela.
40 Sie seltal pa Andrew, ma lel Simon Peter. 41 El sa na konalak Simon, ma lel, ac fahkang nu sel, “Kut konalak Messiah.” (Kalmen kas se inge pa “Christ.”) 42 Na el pwanulla Simon nu yurin Jesus.
Jesus el ngetang nu sel ac fahk, “Kom pa Simon wen natul John, tusruktu ac fah pangpang kom Cephas.” (Ine se inge oapana Peter, ac kalmac pa “eot.”)
Jesus El Pangnol Philip ac Nathanael
43 Len se tok ah, Jesus el nunkauk elan som nu Galilee. El liyalak Philip ac fahk nu sel, “Fahsru wiyu!” 44 (Philip el mwet Bethsaida, siti se na ma Andrew ac Peter muta pac we.) 45 Philip el konalak Nathanael ac fahk nu sel, “Kut konauk mwet se ma Moses el sim kacl in book in Ma Sap, oayapa su mwet palu simusla kacl. El pa Jesus, wen natul Joseph, mwet Nazareth.”
46 Na Nathanael el siyuk, “Ya oasr ma wo ku in tuku Nazareth me?”
Philip el fahk, “Fahsru ac liye.”
47 Ke Jesus el liyal Nathanael lah el fahsr nu yorol, el kaskas kacl ac fahk, “Mwet Israel na pwaye se pa inge. Wangin ma sufal in el!”
48 Nathanael el siyuk sel, “Kom ku eteyu?”
Ac Jesus el fahk, “Nga liye kom ke kom muta ye sak fig soko, meet liki Philip el pangon kom ah.”
49 Na Nathanael el fahk, “Mwet Luti, kom Wen nutin God! Kom Tokosra lun Israel!”
50 Jesus el fahk nu sel, “Ya kom lulalfongi mweyen na nga fahkot lah nga liye kom ye sak fig soko ah? Kom ac fah liye ma yohk liki ma inge!” 51 Ac el fahk nu selos, “Nga fahk na pwaye nu suwos: kowos ac fah liye kusrao ikakelik, ac lipufan lun God sowak ac oatui nu fin Wen nutin Mwet.”