13
1 “Mutuk liye ma ing nukewa tari;
Insrek lohng pac tari, ac kalem kac.
2 Ma komtal etu an nga etu pac.
Wangin ma nga ten liki komtal kac.
3 Tusruktu alein luk uh ma nu sin God, tia ma nu sumtal;
Nga ke fahkak ye mutal lah wangin mwetik.
4 Komtal sang kas kikiap kosrala nikin lomtal ingan;
Komtal oana mwet ono ma tia ku in akkeyala kutena mwet mas uh.
5 Komtal fin tia kaskas, sahp ac oasr mwet nunku mu komtal lalmwetmet.
6 “Porongo ke nga ac srumun kas in aksuwos luk.
7 Efu ku komtal kikiap in kaskas?
Ya komtal nunku mu God El ac wokin kikiap lomtal an?
8 Mea, ke pacl in nununku, komtal ac loangel?
Ya komtal ac kaskas in kasrel?
9 God El fin liksreni lohwot nu sumtal, ya oasr ma wo El ku in konauk keimtal?
Mea, komtal pangon komtal ac ku in kiapu God oana ke komtal kiapu mwet uh?
10 Komtal finne oru srisri lomtal an in lukma,
El ac srakna kai komtal kac,
11 Ac ku lal uh ac fah arulana aksangengye komtal.
12 Soakas lomtal uh wangin sripa, oana apat uh;
Ac alein lomtal uh munas oana fohk kle.
13 Tal misla, ac se pacl luk nga in kaskas,
Ac fokin fahk luk uh, ma na luk.
14 “Nga akola in pilesralana moul luk uh.
15 Finsrak luk nukewa wanginla, na mea sunakin God El fin uniyuwi?
Nga ac fahklana ma nga nunku nu sel.
16 Sahp, pulaik luk uh ac ku in moliyula,
Mweyen wanginna mwet koluk ku in lain God.
17 Srike lohng kas in aketeya luk uh.
18 Nga akola in fahk ma nga pulakin uh,
Mweyen nga etu lah pwaye sik.
19 “O God, ya kom ac tuku in fahk mu oasr ma sutuu luk?
Fin ouingan, nga akola in mihslana ac misa.
20 Ma luoiyana nga ke siyuk sum; kom fin insese nu kac,
Na nga fah tia srike in wikla liki kom:
21 Ma se meet, kom in tia sifil akkeokyeyu; akluo, tia sifilpa aksangengyeyu.
22 “Kaskas meet, O God, ac nga fah topuk kom.
Fin tia ouinge, lela nga in sramsram, ac kom fah topukyu.
23 Mea ngac ma koluk luk uh? Ma sufal fuka nga orala uh?
Ma koluk fuka kom nununkeyu kac uh?
24 “Efu ku kom kaingkinyu?
Efu ku kom oreyu oana mwet lokoalok se lom?
25 Ya kom srike in aksangengyeyu? Wangin sripuk, nga oana sra se;
Kom alein nu sin mah paola soko.
26 “Kom srukak ma koluk na lulap lainyu,
Wi pac ma nga tuh oru ke nga mwet fusr.
27 Kom filiya niuk ke mwe kapir;
Kom tawiya fahluk nukewa luk,
Ac lol pac falkuk yen nukewa nga fahsr nu we.Job 33:11
28 Ke sripa se inge, nga mwesri oana sie polosak kulawi,
Oana sie nuknuk ma waten uh kangla.