15
Asramsrami Akluo
(15:1—21:34)
[Eliphaz]
1 Na Eliphaz el topkol ac fahk,
2 “Kaskas wel, Job. Kom kaskas wel!
3 Wangin mwet lalmwetmet ku in fahk kain kas ma kom fahk ingan,
Ku sifacna loangel ke kain kaskas lalfon ingan;
4 Fin ac wi nunak lom an, na wangin mwet ac sangeng sin God;
Wangin pac mwet ac pre nu sel.
5 Moul koluk lom an kalem ke luman sramsram lom ingan;
Kom srike na in sifacna molikomla ke kas usrnguk lom ingan.
6 Tia enenu nga in akkolukye kom;
Kas nukewa lom ingan sifacna fahkkomyak.
7 “Mea, kom nunku mu kom pa mwet se ma isusla oemeet uh?
Mea, kom oasr ke pacl se God El orala fineol ah?
8 Ya kom tuh lohng ma God El akoo Elan oru ah?
Mea, lalmwetmet lun mwet uh ma lom mukena?
9 Kut etu nufon ma kom etu an.
10 Kut eis etauk lasr sin mwet ma fiayala aunsifa —
Su isusla meet liki papa tomom ah.
11 “God El ke akwoye kom; efu kom ku srangesr lohng?
Kut sramsram in Inen God ke pusra na wo ac kulang.
12 A kom folak ac ngetnget in kasrkusrak nu sesr.
13 Kom kasrkusrakak sin God, ac fahk kas na upa lainul.
14 “Mea oasr mwet ku in arulana mutal?
Ya oasr mwet suwohs ye mutun God?15:14–16; Job 25:4–6
15 Finne lipufan lun God uh, El tia pacna lulalfongelos;
Aok, elos tia pac mutal ye mutun God.
16 Ac mwet uh nim ma koluk uh oana kof uh;
Aok pwaye, mwet uh arulana fohkfok, ac wangin sripa.
17 “Inge Job, wona kom in porongeyu ke ma nga etu uh.
18 Mwet lalmwetmet elos luti nu sik ke ma pwaye
Su elos eis sin papa tumalos meet ah,
Ac wanginna ma lukma elos okanla.
19 Wangin mwetsac muta in facl selos;
Pwanang wangin mwet in pwanulosla liki God.
20 “Sie mwet koluk su akkeokye mwet saya uh
Ac fah mutana in keok ac mwaiok ke lusen moul lal nufon.
21 Pusra in aksangeng ac fah woi insracl,
Ac mwet pisrapasr ac fah pisre ma lal ke pacl el nunku mu el mutana in misla.
22 Wangin finsrak lal in kaingla liki lohsr uh,
Mweyen oasr cutlass se oanna akola in unilya,
23 Ac won vulture uh soano na in kangla manol.
El etu lah pacl fahsru lal uh ac lohsr;
24 Ongoiya oan soanel in sruokilya,
Oana sie tokosra su akola nu ke mweun.
25 “Pa inge safla lun sie mwet
Su srisrngi paol nu in mutun God,
Ac kena lain El su Kulana.
26 Mwet se ingan el ac likkekelana
Ac us mwe loang natul, ac yuyang in lain God,
27 El finne arulana yohk
Ac ratratla ke mwe kasrup.
28 “Pa ingan mwet se ma tuh sruokya siti pus,
Ac eisla lohm ma mwet la uh kaingla liki;
Tusruktu mweun ac fah kunausla siti ac lohm inge.
29 Kasrup lal uh ac tia oan paht;
Wangin kutena sin ma lal inge ac fah oan nwe tok.
Finne ngunal sifacna, ac fah wanginla pac,
30 Ac el ac fah tia ku in kaingla liki lohsr uh.
El ac fah oana soko sak
Su lah kac uh firiryak ke e,
Ac ros kac uh ukukla ke eng uh.
31 El fin wella ac lulalfongi ke ma koluk,
Na el ac fah kosrani ke ma koluk.
32 Meet liki el sun pacl in safla lal, el ac uli;
El ac uli oana sie lesak, ac tia ku in sifil folfolla insroa.
33 El ac fah oana soko fain ma fahko kac uh mangosr na putatla;
Ac oana soko sak olive ma putatla ros kac uh.
34 Ac fah wangin fwilin tulik nutin un mwet ma tia akfulatye God,
Ac e ac fah furreak lohm ma musaiyukla ke mani in eyeinse.
35 Mwet inge pa muta akoo in oru mwe lokoalok ac ma koluk;
Ac insialos sessesla ke kutasrik pacl nukewa.”