18
[Bildad]
1 Na Bildad el fahk,
2 “Job, ku kain in mwet se kom an tiana ku in misla?
Kom fin tuiwin ac lohng ma kut fahk uh, kut ac ku in sramsram nu sum.
3 Mea sis kom nunku mu kut lalfon oana cow uh?
4 Kom sifacna akkeokye kom ke kasrkusrak lom an.
Mea, ku in wanginla mwet fin faclu kom fin kasrkusrak?
Mea, God Elan mokle eol uh in tuh akinsewowoye kom?
5 “Kalem lun mwet koluk uh ac nuna kunlana;
Firir kac uh ac fah tia ku in sifil kalem.18:5–6; Job 21:17
6 Lam in lohm nuknuk sel uh ac fah lohsrla.
7 Meet, el fahsr ku na, a inge el fahsr tukulkul;
Kas in luti lal sifacna, oru el ikori.
8 El fahsryang nu in sie nwek, ac nial sremla;
9 Sie sruhf srumasrla kapinnial ac sruokilya.
10 Sie sruhf wikla oanna infohk uh;
Sie pac sruhf uh oakwuki ke acn el fahsr we.
11 Mwe aksangeng apnulla yen nukewa;
Ac welul yen nukewa el fahsr we.
12 Meet el kasrup, a inge el masrinsral;
Mwe ongoiya oanna siskal soanel.
13 Sie mas na upa su ku in unilya kanglana manol,
Ac kulweya paol ac nial.
14 Amala el liki lohm nuknuk su el tuh muta insewowo loac,
Ac kokola el nu ye mutun Tokosra lun Misa.
15 Inge kutena mwet ku in utyak ac muta in lohm nuknuk sel —
Tukun aknasnasyeyukla ke sulphur!
16 Okah ac lah kacl uh uli ac paola.
17 El tila pwengpeng in acn sel, oayapa in acn nukewa saya!
Wangin mwet sifilpa esamul.
18 El ac fah lisyukla liki facl sin mwet moul,
Ac ukohkyak el liki kalem nu ke lohsr uh.
19 Wangin fwilin tulik natul, nufonna misa.
20 Mwet nukewa in acn kutulap lac nwe roto su lohng pweng kacl
Elos sangeng ac rarrar.
21 Pa inge saflaiyen moul lun mwet koluk uh.
Pa inge ma ac sikyak nu sin mwet su tia lulalfongi ke God.”