24
1 “Efu ku God El tia oakiya sie pacl in nununku?
Efu ku mwet ma oaru in oru lungse lal tiana liye Elan kai mwet koluk uh?
2 “Mwet uh mokle masrol lalos in akyokye acn lalos uh;
Ac pisre sheep uh in akyokye un sheep natulos sifacna.
3 Elos pisrala donkey nutin tulik mukaimtal uh,
Ac sruokya ox*ox: liye ke Kalmen Kutu Kas. nutin mutan katinmas uh, na soano elan molela soemoul lal.
4 Elos ikol tuh mwet sukasrup in tia ku in eis suwohs lalos,
Ac oru tuh mwet enenu in kaing ac wikla.
5 “Ouinge mwet sukasrup elos suk mwe mongo nalos yen mwesis
Oana donkey inima uh;
Wangin acn elos ku in konauk mongo nun tulik natulos we.
6 Elos enenu in kosrani ke ima su tia ma lalos,
Ac sifani grape ke ima lun mwet koluk.
7 Ke fong uh elos mihsrisr, mweyen wangin ma elos in kateya;
Elos koflufol na motul.
8 Elos ac wohlak na ke af ma kahkla fineol uh me,
Ac lokeni oan sisken eot uh in lusrungulosyak.
9 “Mwet koluk elos tulakunla tulik mukul fusr ma misa papa tuma liki nina kia, tuh elos in mwet foko lalos,
Ac eis tulik nutin sie mwet sukasrup in akfalye soemoul lal.
10 A mwet sukasrup elos ac illa ac wangin nuknuk in karingin manolos;
Elos ac masrinsral na ke elos telani fokin wheat uh.
11 Elos fuleya olive in orek oil, ac grape in orek wain,
A elos ac malu na.
12 Mwet kinet ac mwet apkuran in misa in siti uh elos wowoyak nu sin God,
Tusruktu God El tiana porongo pre lalos.
13 “Oasr kutu mwet koluk ma kwase kalem uh;
Elos nikin kalmeya, ac tia ke fahsr nu yen kalem uh kololos nu we.
14 Ke tafun lotu uh, mwet akmas el illa
In uniya mwet sukasrup uh,
Ac ke fong uh, el som pisrapasr.
15 Sie mwet kosro el ac soano in tari ekela;
El ac afinya mutal, mwet uh in tia akilenul.
16 Ke fong uh mwet pisrapasr elos ac sifacna utyak nu in lohm uh,
A ke lenelik elos ac wikla ac tia lungse muta ke kalem uh.
17 Elos sangeng ke kalem lun len uh,
A lohsr uh tiana aksangengyalos.”
[Zophar]
18 “Sie mwet koluk ac fah pokyukla ke sronot uh,
Ac acn sel fah selngawiyuki sin God;
El ac tia sifil som orekma ke ima in grape lal uh.
19 Oana ke snow uh ac wanginla ke pacl fol ac ke pacl wangin af uh,
Ouinge sie mwet koluk ac fah wanginla liki facl sin mwet moul uh.
20 Finne nina kial uh, ac tia pac esamul;
Wet uh ac kangulla, ac el musalla oana soko sak ma ikori.
21 Ma inge sikyak nu sel mweyen el akkeokye katinmas,
Ac tia kulang nu sin mutan su wangin tulik natu.
22 Ke ku lun God, El kunausla mwet funmwet;
God El fin mukuila, mwet koluk sac ac misa.
23 God El ku pac in oru tuh mwet sac in tia sun ongoiya,
Tusruktu El ac taranna ma el oru pacl nukewa.
24 Mwet koluk se ku in sun wo ouiya ke kitin pacl,
Na el ac uli oana soko mah wangin sripa,
Oana sie sripin mahsrik ma pakpuki.
25 Ya oasr mwet se ku in lafwekin mu tia ouinge?
Oasr mwet ku in orek loh ac fahk mu kas luk inge tia pwaye?”