31
“Nga orala tari sie wulela na ku
In tia ngetnget in mwel nu sin sie mutan fusr.
Mea God Kulana El oru nu sesr uh?
El akfalye fuka orekma lun mwet uh?
El supwama ongoiya ac mwe kunausla
Nu sin mwet su oru ma sesuwos.
God El etu ma nukewa nga oru uh;
Ac El suiya fahluk nukewa luk.
 
“Nga fulahk lah wangin pacl nga oru ma koluk,
Ac nga tia wi srike in aklalfonye mwet saya.
Lela God Elan pauniyu ke sie mwe paun suwohs,
Na El ac fah liye lah wangin ma sufal luk.
Nga fin kuhfla liki inkanek pwaye,
Ku lela in kifusyukla nga nu ke ma koluk;
Ac pouk fin tunla ke ma koluk,
Na lela sacn sunuk uh in kunausyukla,
Ku lela mwet saya uh in kangla mwe mongo ma nga yukwi uh.
 
“Nga fin tuh ngetnget in mwel nu sin mutan kien mwet tulan luk,
Ac wikla soanel likin lohm sel uh,
10 Na lela mutan kiuk uh in orek mongo nun sie pacna mukul,
Ac motul in mwe oan kien sie pacna mwet.
11 Kain sulallal ouinge enenu in kaiyuk ke kalya na upa.
12 Ac fah oana sie e ma kunausla ma nukewa,
Ac esukak ma nukewa luk.
 
13 “Ke pacl sie sin mwet kulansap luk, mukul ku mutan, ac suk suwohs lal yuruk,
Nga ac akfulatye suk lal uh, ac srike in akwoyela.
14 Nga fin tia oru in wo nu sel, na nga ac ngetnget fuka nu sin God?
Mea nga ac ku in fahk ke God El ac tuku in nununkeyu?
15 God se na ma oreyula uh,
Pa orala pac mwet kulansap luk uh.
 
16 “Wangin sie pacl nga srangesr kasru mwet sukasrup uh;
Nga tia wi lela katinmas uh in muta in ongoiya,
17 Ku lela tulik mukaimtal uh in masrinsral ke nga mongo uh.
18 In moul luk nufon, nga mutana kasru mwet ouinge.
 
19 “Nga fin konauk sie mwet in oasr enenu lal,
Su arulana sukasrup, ac tia ku in moli nuknuk lal,
20 Na nga ac kital nuknuk ma orekla ke unen sheep
Su tuku ke un sheep nutik sifacna.
Na el ac kaksakinyu ke insial nufon.
 
21 “Fin oasr pacl ma nga kutasrik nu sin kutena tulik mukaimtal,
Ke nga etu lah fin sun nununku, nga ac kutangla,
22 Na lela in kotkot uh pouk;
Ku lela pouk in ayukla liki finpisuk.
23 Ke sripen nga sangeng ke kaiyuk lun God,
Nga tia ku in oru ouiya inge.
 
24 “Wanginna pacl nga lulalfongi ke mwe kasrup
25 Ku inse fulat ke mwe kasrup luk.
26 Wangin pac pacl nga alu nu ke kalmen faht uh,
Ku nu ke katwen malem uh.
27 Soenna oasr pacl kifusyukla nga in akfulatye ma inge,
Ku ngan pasrla in akkalemye sunak luk nu selos.
28 Kain ma koluk ouinge fal in kaiyuk sin nununku, nu ke misa;
Mweyen ma inge aklusrongtenye God Kulana.
 
29 “Nga tia wi engankin pacl mwet lokoalok luk elos keok,
Ku pwarkin pacl elos sun ongoiya;
30 Wangin pacl nga akfohkfokyela oalik ke sripen nga pre tuh elos in misa.
31 Mwet orekma luk nukewa etu lah
Pacl nukewa nga insewowo in paing mwetsac nu in lohm sik.
32 Nga solama pac mwet fahsr nu in lohm sik,
Ac tia lela elos in motul inkanek uh.
 
33 “Kutu mwet uh srike in okanla ma koluk lalos,
Tusruktu nga tia wi okanla ma koluk luk uh.
34 Nga tia wi muta misla ku wikla in lohm sik
Mweyen nga motok kas lun mwet,
Ku sangeng ke kas in akkoluk lalos uh.
 
35 “Mea, wanginna mwet ac ku in porongo ma nga fahk inge?
Nga fulahk lah kas inge nufon kas na pwaye.
Lela God Kulana Elan topukyu.
 
“Fin simla kas ma mwet alein nu sik inge sang lainyu uh
Ngan ku in liye,
36 Nga lukun tia sensen in srupusrak in oan finpisuk,
Ac filiya fin sifuk oana sie tefuro.
37 Nga ac fahkak nu sin God ma nukewa ma nga oru uh,
Ac tia tupwek in tu ve mutal.
38 “Fin acn ma nga imai inge ma nga pisrala,
Ku eisla sin mwet su ma la na pwaye uh —
39 Ac nga fin kang mwe mongo ma kapak fin acn inge,
A nga fuhlela mwet ma imaela uh in masrinsral —
40 Na lela tuh in tia wheat ac barley pa kapak we,
A in pulac na ac kokul.”
 
Pa inge saflaiyen kas lal Job.