34
1 Na Elihu el sifilpa fahk:
2 “Lohng kas luk uh, komtal su oru mu komtal lalmwetmwet,
Ac ikasla insremtal in lohngyu, komtal su pangon mu komtal etu ma nukewa.
3 Komtal etu mongo yu uh ke komtal ac ema uh,
Tusruktu komtal tiana akilen kas lalmwetmet ke komtal lohng uh.
4 Lela kut in tukeni sulela lah pia ma pwaye uh;
Ac lela kut in sifacna nunku lah pia ma wo uh.
5 Mweyen Job el sifacna fahk mu wangin ma koluk lal,
Ac el fahk pac mu God El tiana orek nununku suwohs nu sel.
6 El siyuk ac fahk, ‘Ac fuka ngan kikiap mu oasr ma koluk luk.?
Nga arulana musalla ke kinet keik, tusruktu wanginna ma koluk luk.’
7 “Nu oasr mwet komtal liye oana mwet se Job uh?
El oru aksruksruk lal uh ma na fisrasr, oana ke el nim kof uh.
8 El lungse asruoki nu sin mwet orekma koluk,
Ac wi mwet koluk fufahsryesr.
9 El fahk kut finne srike in fahsr tukun ma lungse lun God,
Wanginna ma ac wo nu sesr kac.
10 “Porongeyu, komtal su nunku mu oasr etauk la!
Ya God Kulana El ku in oru ma sesuwos?
11 El akinsewowoye mwet uh fal nu ke orekma lalos,
Ac folokin nu selos fal nu ke ouiyen moul lalos.Psa 62:12
12 God Kulana El tiana oru ma koluk;
Wangin pacl El oru ma sesuwos nu sin mwet uh.
13 Mea, God El eis ku lal sin sie na?
Ya oasr pac sie su sang ku nu sel in liyaung faclu?
14 God El fin sulela sel Elan eisla ngunal ac mongol liki mwet uh,
15 Na mwet nukewa ma moul uh ac misa
Ac sifilpa folokla nu ke kutkut.
16 “Inge, komtal fin lalmwetmet, komtal lohng ma nga ac fahk uh.
17 Ya komtal fahk mu oasr mwatan God su suwoswoslana?
Ya komtal nunku mu El su kulana El lain nununku suwohs?
18 God El ku in fahkak mwatan tokosra ac mwet leum uh
Ke pacl elos oru ma koluk, ac fin wangin sripalos.
19 El tia wi mwet leum uh lac,
Ku oru in wo nu sin mwet kasrup liki mwet sukasrup,
Mweyen El pa orala mwet nukewa.
20 Sie mwet el ku in misa in kitin pacl na ke fong.
God El sringilya mwet uh na elos misa;
El uniya mwet ku uh oana ma wangin.
21 El taran ma mwet uh oru in pacl nukewa.
22 Wanginna acn ma lohsr matoltol
Ku in okanla mwet koluk uh liki God.
23 God El tia enenu in pakiya pacl
Lun sie mwet in som tuh Elan nununku.
24 El tia enenu in oasr sukok se orek
Tuh Elan sisla mwet kol uh ac aolulosla.
25 Mweyen El etu ma elos oru uh.
El ac siselosla ac itungulosi ke fong uh.
26 El akkeokye mwet koluk uh yen mwet nukewa ac ku in liye,
27 Mweyen elos tila fahsr tokol,
Ac elos pilesrala ma sap lal nukewa.
28 Ke sripalos mwet sukasrup elos wowoyak ac pang nu sin God,
Tuh Elan kasrelos, ac God El lohng pusren pang lalos.
29 “God El fin sulela Elan tiana oru kutu ma,
Wangin mwet ac ku in fahk mu oasr ma sutuu sel.
El fin okanla mutal, wangin ma mwet uh ac ku in oru.
30 Wangin ma mutanfahl uh ac ku in oru
In ikolya mwet ma tia etu God uh in tia leum faclos.
31 “Job, ku kom fahkak tari ma koluk lom an nu sin God,
Ac wulela kom in tia sifil orekma koluk?
32 Kom nu siyuk God Elan akkalemye nu sum ma kom sufalla kac uh,
Ac insese mu kom ac tia sifilpa orekma koluk?
33 Ke kom lain ma God El oru uh,
Ya kom liye mu El ac ku in oru ma kom lungse uh?
Sulela uh ac ma na lom, tia ma luk;
Fahkma nu sesr ingena ma kom nunku an.
34 “Kutena mwet ma kalem in nunak uh, ac ku in insese nu sik;
Ac kutena mwet lalmwetmet ma lohng kas luk uh, ac ku in fahk lah
35 Job el kaskas ke lalfon lal,
Ac lah wangin kalmen ma el fahk uh.
36 Nunku akwoya ke ma nukewa ma Job el fahk uh;
Komtal ac akilen lah el kaskas oana sie mwet koluk.
37 El sang seakos in laesla ma koluk lal uh;
El aksruksruki God ye mutasr nukewa.”