39
Ku kom etu ke pacl nani lemnak fineol uh ac isusla?
Kom nu liye ke deer lemnak uh isus uh?
Kom etu lah eltal ac pitutu malem ekasr elos fah isusla?
Ac kom etu pacl in isus lalos uh?
Kom etu ke pacl elos ac kuruweni
Ac oswela natu natulos uh nu faclu?
Natu natulos uh ac kapak ac arulana fokokoi inima uh;
Elos ac som ac tia sifil foloko.
 
“Su ikasla donkey lemnak uh?
Su fuhlela eltal in forfor sukosok?
Nga sang acn mwesis uh tuh in acn in muta lalos,
Ac lela elos in muta yen wangin mwet muta we, ac wangin mah ku in kapak we.
Elos muta yen loes liki oraru lun siti uh,
Ac wangin mwet ku in akmunayalosla ac sap elos in orekma.
Fineol uh pa acn mahsrik ma elos mongo we,
Ac suk ma folfolsra elos in kang.
 
“Ya soko cow lemnak ac ku in orekma lom?
Ku el ac lungse motul in lohm sin kosro nutum uh?
10 Ku kom ku in kapriya soko ke sucl ac oru elan pikin ima lom uh?
Ku oru elan amakin mwe kulkul inima lom uh?
11 Kom ku in lulalfongi ke fokoko lun manol,
Ac finsrak mu elan oru orekma toasr lom uh?
12 Ya kom lulalfongi elan usani fokin ima ma kom kosrani uh
Ac orani wheat uh nu ke acn in kulkul wheat lom uh?
 
13 “Posohksok lulap lun ostrich finne pisrpisr ke pikpik uh,
Tuh ostrich uh tia ku in sohk oana stork uh.
14 Ostrich uh filiya atro natulos ah fin fohk uh,
Fusrfusr lun fohk uh in mau ku in fisrik atro uh.
15 El tia nunku lah nia se ku in longya,
Ku kosro lemnak ac fukulya.
16 El oru oana in tia ma natul pa atro uh.
El tia nunku lah ac wangin sripen kemkatu lal uh.
17 Nga pa tuh oru elan lalfon,
Ac tia sang etauk nu sel uh.
18 Tusruktu el fin mukuiyak elan kasrusr
El ac isrun na soko horse ac mwet ma kasrusr fac uh.
 
19 “Job, ku kom pa oru horse uh in fokoko,
Ac sang unac fin kwawalos in srosro uh?
20 Ku kom pa oru elos in sro oana locust uh,
Ac aksangengye mwet uh ke mongin fwaclos uh?
21 Elos ac rarala ac kihling infohk infahlfal uh;
Elos ac yuyang nu ke mweun ke kuiyalos nufon.
22 Elos tia etu sangeng,
Ac wangin cutlass ku in oru elos in foloki.
23 Kufwen mweun ma mwet kasrusr faclos uh us
Ac erarrar ac saromrom ke kalmen faht uh.
24 Elos ac rarak ke tufal uh, ac sroak kasrusr nu meet.
Pacl mwe ukuk uh kasla, elos tia ku in oakwuki.
25 Pacl nukewa mwe ukuk uh ac kas uh elos ac ngorla;
Elos ku in ngokak mweun uh meet liki elos apkuranyang nu kac,
Ac elos lohng pusren sapsap lun mwet kol lun mwet mweun uh.
 
26 “Ya won hawk uh lutlut sohksok sum
Ke el ac asroelik posohksok lal nu eir uh?
27 Ku eagle uh soano sapsap lom
Tuh elan orala ahng lal uh yen fulat fineol uh?
28 El ac orala acn in muta lal uh fin eot ma oan yen fulat oemeet fineol uh,
Ac oru acn tohktok fineol uh in nien wikla ku lal.
29 El ac muta we ac ngetnget liye acn loes ac acn apkuran,
In konauk ma elan uniya ac kang.
30 Eagle uh ac toeni raunela monin ma misa,
Ac eagle fusr uh ac nim srah kac uh.” Mt 24:28; Lk 17:37

39:30 Mt 24:28; Lk 17:37