41
1 “Fuka, kom ac ku in sruokilya Leviathan*Leviathan: liye 3:8. ke soko ka in ahya,
Ku kapriya oalul ke soko sucl?Psa 74:14; 104:26; Isa 27:1
2 Kom ac ku in isongang soko sucl nu ke infwacl,
Ku srumasrla kapin oalul ke soko ka in ahya?
3 Ya el ac ku in kwafe kom in tulalla?
Ya el ac ku in fahk kas in aklung nu sum kom in pakomutal?
4 Ya el ku in orek pwapa in insese nu sum
Ac wulela mu el ac kulansapwekom nwe tok?
5 Ya kom ac kaprilya oana sie won ma kom nutl
Ac pwanul fahsr ye mutun tulik mutan kulansap lom in akpwaryaltal?
6 Ya mwet patur uh ac tuku pwapa nu sum ke sie moul fal in molella?
Ya mwet kuka uh ac sipikilya nu ke ip srisrik ac kukakunul?
7 Kom ac ku in nwakla kolo kacl uh ke osra in fakfuk,
Ku putala sifal ke soko osra in ngoe?
8 Kahlilya pacl se, ac kom fah tia lungse in sifilpa srike;
Kom ac tia ku in mulkunla amai se lom el u!
9 “Kutena mwet ma liyel Leviathan uh
Ac munasla nunka, ac putatla nu infohk uh.
10 Ke pacl se mokleyukyak el uh, el ac arulana sulallal;
Wangin mwet ac ku in tu ye mutal.
11 Su ku in anwuk nu sel ac moul na?
Wanginna sie mwet fin faclu ku.
12 “Kolya ngan srumun nu sum ke nial Leviathan,
Ac fahk lupan yokiyal ac kuiyal.
13 Wangin mwet ku in seya kolo lik ma el nukum uh,
Ku putala loeyuk se loac ke manol, su oana nuknuk in loeyuk ma orekla ke osra.
14 Su ku in oru elan mangelik
Ke oalul rauniyukla ke wihs na aksangeng uh?
15 Fintokol orekla ke takin mwe loeyuk
Su kapreni nu sie, ac keke oana eot uh.
16 Kais sie kupasryang arulana ku nu ke ma oan siska uh,
Oru finne kitin eng, tia pac ku in sasla inmasrlo.
17 Ma inge nukewa arulana fulfuleni nu sie,
Oru wangin kutena ma ku in sraclik.
18 El fin sinacla, na kalem uh ac sasma liki infwacl;
Atronmutal saromrom oana faht uh ke takak.
19 Firir in e uh sroma liki inwalul,
Ac kosran e uh sohkelik.
20 Kulasr uh fofosrme ke infwacl
Oana kulasr†kulasr: ku oana kulasr in sie um. ke e ma tawin sie tup in sup lulap.
21 Mongol ku in tanak e in firiryak;
Ac e uh atula ke inwalul.
22 Inkwawal arulana fokoko,
Oru mwet nukewa ma sonol uh ac rarrarlana sel.
23 Wangin kutena acn ma munas ke kolo kacl uh;
Arulana keke oana osra, ac tia ku in kotkot uh.
24 Nunak likkeke lal oru el tia etu sangeng.
El ku oana sie tapweng eot, ma tia ku in fokelik.
25 Pacl se el ac tuyak uh, finne mwet ma fokoko oemeet uh elos sangeng pac sel;
Ke sripen sangeng lalos, elos tia ku in oru kutena ma.
26 Wangin cutlass ku in kantelya;
A mwet uh finne orekmakin osra in fakfuk, osra in pisr, ku kutena kain mwe fakfuk saya, tia ku in fakisya manol.
27 Nu sel, osra uh munas oana mah paola,
Ac bronze uh fisrasryasr oana sak kulawi uh.
28 Wangin osra in pisr ku in oru elan kaing,
Ac eot ma sang tanglal uh oana ipin sra uh.
29 Nu sel, soko sak in anwuk uh oana pwe es uh,
Ac ke mwet uh ac faksel ke osra in fakfuk uh, el ac israsr na.
30 Unac in ik ma oan ke sial uh oana ipin ahlu kle ma fokelik ac arulana kosroh;
Unac inge ac kunkunausya infohk furarrar uh oana osra in pukpuk uh.
31 El ac arukak kapin meoa oana kof uh ke ac boel uh,
Ac oru in pulollol oana tup in mwe akmusra fol se.
32 Inkacl ah orala soko inkanek na saromrom tokol,
Ac el furokak meoa uh wiawala.
33 Wangin kutena ma fin faclu ku in lumweyuk nu kacl;
Inmasrlon ma orakrak nukewa, el tia etu sangeng.
34 El tia oek kosro ma yohk lukel uh;
El oana sie tokosra nu sin kain kosro lemnak nukewa.”