JONAH
Tukakinyen Book Lal JONAH
Book lal Jonah tia oana book in palu saya in Bible uh, mweyen book se inge fahkak ke ouiyen moul lun sie mwet palu su srike in kaingkunla sap lun God. God El tuh fahkang nu sel Jonah elan som nu Nineveh, siti fulat lun acn Assyria, sie mutunfacl lulap su arulana lain Israel. Tuh Jonah el tia lungse som nu Nineveh in us kas lun God, mweyen el lulalfongi lah God El ac tia oru oana kas lal in kunausla siti sac. Tukun kutu ouiya ma sikyak nu sel na el sufasikla ac som, ac saflaiya el toasrla mweyen kas ma el fahkak ke musalla lun acn we tiana akpwayeiyuk.
Book se inge oana sie petsa ma akkalemye ku lulap lun God fin ma nukewa ma El orala. Tusruktu sripa se yohk emeet kac uh pa akkalemye lungse ac pakoten lun God, su kena in nunak munas ac molela mwet uh, finne mwet lokoalok lun mwet lal, liki na Elan akkeokyalos ku kunauselosla.
Takla Lun Koanon Book Se Inge
Pang nu sel Jonah ac seakos lal 1:1–17
Auliyak ac moliyukla lal Jonah 2:1–10
Kas lal Jonah lain Nineveh 3:1–10
Pakoten lun God nu sin Nineveh 4:1–11
1
Jonah El Seakos LEUM GOD
1 Sie len ah LEUM GOD El kaskas nu sel Jonah, wen natul Amittai.2 Tok 14:25 2 El fahk, “Fahla nu Nineveh, siti lulap sac, ac fahkak nu sin mwet we lah nga arulana etu lupan koluk lalos.” 3 Tusruktu Jonah el mukuiyak ac som nu siena acn elan kaingla liki LEUM GOD. El som nu Joppa ac konauk lah oasr oak soko akola in som nu Tarshish.*Tarshish: sie ipin acn Spain. El molella nu fin oak uh ac sroang in som nu Tarshish, wi mwet orekma fin oak uh, in kaingla nu ke sie acn loes liki LEUM GOD.
4 Tuh LEUM GOD El supwala sie paka nu meoa, ac eng uh arulana upa pwanang oak soko ah apkuran in musalla. 5 Selu fin oak uh tuninfongla, ac kais sie selos wowoyak in suk kasru sin god lal sifacna. Na elos sis koanon oak uh nu in meoa uh in akmulalaye oak uh. In pacl se inge Jonah el fani nu ten ac ona motul folosuwosla.
6 Captain lun oak uh liyalak ac fahk nu sel, “Efu kom ku motul? Tukakek ac pre nu sin god lom. Sahp el ac pakomutasr ac molikutla.”
7 Na selu ah fahk nu sin sie sin sie, “Wona kut in susfa in konauk lah su pwanma mwe fosrnga inge nu sesr uh.” Elos orala fa uh, na inel Jonah fwacfeyak. 8 Na elos fahk nu sel, “Mea kom oru inge uh? Kom tuku ya me? Kom mwet ya? Ya kom pa pwanang ma sikyak inge uh?”
9 Jonah el topuk, “Nga mwet Hebrew. Nga alu nu sin LEUM GOD, God inkusrao, su orala acn ac meoa uh.” 10 Jonah el fahk pac nu selos lah el kaing liki LEUM GOD.
Mwet fin oak uh arulana sangengla ac fahk nu sel, “Ma na koluk se pa kom oru ingan!” 11 Ac ke paka uh sifilpa upala liki meet ah, mwet fin oak uh siyuk sel, “Mea kut ac oru nu sum in kutongya paka uh?”
12 Jonah el topuk, “Sisyula nu in meoa uh na ac fah mihsi. Nga etu lah nga pa pwanang kowos sun eng na upa se inge.”
13 Elos tia sisella, a elos srike na ke kuiyalos in kalang nu weacn uh, tuh elos tia ku mweyen paka uh upala liki na meet. 14 Na elos wowoyak nu sin LEUM GOD ac fahk, “O LEUM GOD, kut siyuk, nikmet eisla moul lasr ke kut ac eisla moul lun mwet se inge! Kom, O LEUM GOD, pa pwanang ma inge nukewa. Ma inge kut ac oru fal nu ke lungse lom.” 15 Na elos sraklalak Jonah ac sisella nu in meoa, na eng uh tui in kitin pacl ah na. 16 Ma se inge oru mwet fin oak uh arulana sangeng sin LEUM GOD, pwanang elos oru sie mwe kisa nu sin LEUM GOD, ac wulela mu elos ac kulansap nu sel.
17 Ac LEUM GOD El oru tuh soko ik lulap in okomulla Jonah, ac el muta insien ik soko ah ke len tolu ac fong tolu.Mt 12:40