4
Srifeyuk Jesus
(Mark 1:12–13; Luke 4:1–13)
1 Na Ngun kololla Jesus nu yen mwesis in tuh srifeyuk el sel Devil. 2 Jesus el lalo len angngaul ac fong angngaul, na toko el masrinsral. 3 Na Devil el tuku nu yorol ac fahk, “Kom fin Wen nutin God, kom sap eot inge in ekla bread.”
4 Ac Jesus El fahk, “Ma Simusla fahk mu, ‘Mwet tia moul ke bread*bread: kalmac pa kutena mwe mongo. mukena, a elos enenu pac kas nukewa ma tuku sin God me.’ ”
5 Na Devil el usalak Jesus nu Jerusalem, Siti Mutal, ac fililya ke acn se ma fulat oemeet ke Tempul uh, 6 ac fahk nu sel, “Kom fin Wen nutin God, kom atula nu ten, tuh Ma Simusla uh fahk,
‘God El ac fah sap nu sin lipufan lal keim;
Ac elos fah tapukkomyak inpaolos,
Tuh finne niom, ac fah tia ngalyak ke eot uh.’ ”Psa 91:11–12
7 Ac Jesus el fahk, “Tuh Ma Simusla uh fahk pac mu, ‘Nik kom srike Leum God lom.’ ”
8 Na Devil el usalak Jesus nu fin eol na fulat soko, ac srisrngiya tokosrai nukewa fin faclu ac fahkak wolana la nu sel. 9 Na Devil el fahk, “Ma inge nukewa nga ac fah sot lom, kom fin pasrla ac alu nu sik.”
10 Na Jesus el fahk nu sel, “Fahla likiyu, Satan! Ma Simusla uh fahk, ‘Kom in alu nu sin Leum God lom, ac kulansap nu sel mukena!’ ”
11 Na Devil el som lukel Jesus, ac lipufan uh tuku ac kulansupwal.
Jesus El Mutawauk Orekma Lal In Galilee
(Mark 1:14–15; Luke 4:14–15)
12 Ke Jesus El lohngak lah John el kapiri in presin, el som nu Galilee. 13 El tuh tia muta Nazareth a el som ac muta Capernaum, sie siti srisrik su oan sisken Lulu Galilee ke acn lun Zebulun ac Naphtali. 14 Ma inge orek tuh in akpwayei kas ma mwet palu Isaiah el fahk,
15 “Facl lun Zebulun ac facl lun Naphtali,
Su oan inkanek nu ke Lulu Galilee, layen roto ke Infacl Jordan,
Galilee, facl sin mwet pegan!
16 Mwet su muta in lohsr
Elos liye sie kalem lulap.
Nu selos su muta in acn lohsr lun ngunin misa,
Kalem sac tololosyak tari.”
17 In pacl sac me Jesus El mutawauk in fahkak mwe luti lal ouinge: “Forla liki ma koluk lowos, tuh Tokosrai lun kusrao apkuran me!”
Jesus El Pangon Mwet Patur Akosr
(Mark 1:16–20; Luke 5:1–11)
18 Ke Jesus el fahsr pe Lulu Galilee, el liye tamulel se — sie pa Simon (su pangpang Peter), ac Andrew ma lel — ke eltal orekmakin nwek in patur. 19 Jesus El fahk nu seltal, “Fahsru wiyu ac nga fah luti komtal ouiyen paturi mwet.” 20 In pacl sacna eltal filiya nwek natultal ac welul som.
21 El fahsr nu meet kutu ac liyauk pac tamulel se, James ac John wen natul Zebedee. Eltal welul Zebedee papa tumaltal muta in oak soko onoh kwa lalos uh. Jesus El pangnoltal, 22 ac in pacl sacna eltal som liki oak uh ac papa tumaltal, ac fahsr tokol.
Jesus El Luti, Ac Fahkak, Ac Akkeye Mwet Mas
(Luke 6:17–19)
23 Jesus el fufahsryesr in acn Galilee nufon ac luti in iwen lolngok. El fahkak Pweng Wo ke Tokosrai uh, ac akkeyala kain in mas ac munas puspis yurin mwet uh. 24 Pweng kacl fahsrelik in acn Syria nufon, ouinge mwet uh use nu yorol mwet nukewa su mas ac keok ke kain in mas nukewa ma oasr yorolos: mwet su oasr demon yoro, mwet musen pulkoa, mwet ul — ac Jesus el akkeyalosla nukewa. 25 Un mwet puspis fahsr tokol liki acn Galilee ac Siti Singoul,†Siti Singoul: leng meet fahk mu Decapolis, su kalmac pa Siti Singoul. liki Jerusalem, Judea, ac acn su oan layen kutulap ke Infacl Jordan.