27
Utukla Jesus Nu Yorol Pilate
(Mark 15:1; Luke 23:1–2; John 18:28–32)
Toang na ke lotutang tok ah, mwet tol fulat ac mwet matu nukewa elos pwapa in unilya Jesus. Elos kaprilya ke sein, ac pwanulla nu yorol Pilate, governor Rome se su karingin acn Judea.
Misa Lal Judas
(Orekma 1:18–19)
Judas, su tukakunulak Jesus, ke el lohngak lah wotla mu in anwuki Jesus, el auli insial, ac folokunla ipin silver tolngoul ah nu sin mwet tol fulat ac mwet matu ah. Ac el fahk, “Nga orala ma na koluk se ke nga tukakunak sie mwet su wangin mwata in anwuki!”
Ac elos fahk nu sel, “Ac mea lasr nu kac? Ma na nu sum pa ma ingan.”
Judas el sisya ipin silver uh in Tempul ac illa. Na el som sifacna loksakla.
Mwet tol fulat elos srukak ipin mani uh ac fahk, “Mani inge ma moliyen srah — Ma Sap lasr uh tia lela kut in likiya mani ouinge ke nien fil mani lun Tempul.” Na elos insesela in orekmakin mani sac in molela acn se lun sie mwet orek ahlu kle, tuh in nien kulyuk nu sin mwetsac uh. Pa inge sripa se oru pangpang acn sac “Acn lun Srah” nwe misenge.
Ke ma inge akpwayeiyuk kas lal Jeremiah mwet palu su fahk, “Elos eis ipin silver tolngoul, lupa se mwet Israel elos insese in sang molella kac, 10 ac orekmakin in sang molela acn se lun mwet orek ahlu kle se, oana ke Leum El sapkin nu sik.”
Pilate El Kusen Siyuk Sin Jesus
(Mark 15:2–5; Luke 23:3–5; John 18:33–38)
11 Jesus el tu ye mutun Governor, ac Governor el siyuk sel, “Ya kom pa tokosra lun mwet Jew?”
Na Jesus el fahk, “Kom fahk na.” 12 Na ke mwet tol fulat ac mwet matu elos fahk kas in tukak kacl, wanginna ma el fahk.
13 Na Pilate el fahk nu sel, “Ya kom tia lohng kas in tukak puspis ma elos lain kom kac inge?”
14 Tusruktu Jesus el tiana fahkla siefanna kas, su arulana mwe lut nu sel Governor.
Wotla In Anwuki Jesus
(Mark 15:6–15; Luke 23:13–25; John 18:39—19:16)
15 In pacl in Kufwen Alukela nukewa, oasr oakwuk se lun governor lun acn Rome in aksukosokyela sie sin mwet kapir in presin ma mwet uh ac siyuk in ikakla. 16 In pacl se inge, oasr sie mwet presin pwengpeng ke koluk la. Inel pa Barabbas. 17 Ouinge ke mwet Jew puspis tukeni, Pilate el siyuk selos, “Su kac kowos lungse nga in aksukosyela nu suwos uh? Barabbas, ku Jesus su pangpang Christ?” 18 El arulana etu lah mwet kol lun mwet Jew elos eisalang Jesus nu sel mweyen elos sok sel.
19 Ke Pilate el muta ke nien nununku, mutan kial el sapla nu sel ac fahk, “Nimet kom oru kutena ma nu sin mwet se ingan su wangin mwatal, mweyen mweme se nga mwemei fong kacl arulana aklokoalokyeyu.”
20 Mwet tol fulat ac mwet matu elos pirakak insien mwet uh in siyuk Pilate elan tulalla Barabbas ac unilya Jesus. 21 Ac Pilate el siyuk sin mwet uh, “Su kac sin mwet luo inge kowos lungse nga in aksukosokyela?”
Ac elos fahk, “Barabbas!”
22 Na Pilate el siyuk selos, “Ac mea nga ac oru nu sin Jesus su pangpang Messiah?”
Elos nukewa fahk, “Unilya fin sakseng!”
23 Ac Pilate el sifil siyuk, “Ma koluk fuka el orala uh?”
Na elos wowoyak ke kuiyalos ac fahk, “Unilya fin sakseng soko!”
24 Ke Pilate el akilen lah wangin ma el ku in oru in kutong wowon lun un mwet uh, el eis kutu kof ac ohlla paol ye mutalos nukewa, ac fahk, “Wangin mwetik ke misa lun mwet se inge! Ma inge ma na lowos!”
25 Na mwet e nukewa elos topuk ac fahk, “Lela mwatan misa lal in oan facsr ac tulik natusr!”
26 Na Pilate el tulalla Barabbas nu selos; ac tukun el sap in sringsring Jesus, el eisalang tuh in anwuki el fin sakseng soko.
Mwet Mweun Elos Aksruksrukel Jesus
(Mark 15:16–20; John 19:2–3)
27 Na mwet mweun lal Pilate elos usalla Jesus nu inkul fulat lal governor, ac mwet mweun wialos nukewa toeni apnulla. 28 Elos sarukla nuknuk lal ac nokmulang ke sie nuknuk srusra. 29 Na elos pirakela sie tefuro ke lah ma oasr otoh kac ac sang nu fin sifal, ac sang sak soko nu inpaol layot; ac elos epasrla ye mutal ac aksruksrukel ac fahk, “Paing kom, Tokosra lun mwet Jew!” 30 Elos anel, ac eisla sak soko ah ac sang puok sifal. 31 Tukun elos aksruksrukel tari, elos sarukla nuknuk srusra sac, ac sifil nokmulang ke nuknuk se lal ah, na elos pwanulla in tuh anwuki el fin sakseng.
Sripsripyak Jesus Fin Sakseng Soko
(Mark 15:21–32; Luke 23:26–43; John 19:17–27)
32 Ke elos illa liki siti uh, elos sun sie mwet Cyrene su pangpang Simon, na mwet mweun elos sap ku nu sel elan us sakseng lun Jesus. 33 Elos tuku sun acn se pangpang Golgotha, su kalmac pa “Sri In Ahlunsuf.” 34 Na elos sang nu sin Jesus wain karyak ke ma mwen; tuh ke el ema tari el tia lungse nim.
35 Elos srupsrulak fin sakseng soko ah, na elos susfa ke nuknuk el nukum ah, in konauk lah ac ma lun su. 36 Tukun ma inge, elos muta in acn sac ac taranul Jesus. 37 Ac elos patikya sie ma simla oan lucng liki sifal, ma akkalemye sripen anwuki el, su fahk, “El inge Jesus, Tokosra lun mwet Jew.” 38 Na elos oayapa srupusrak mwet pisrapasr sulallal luo welul, sie layot ac sie lasa.
39 Mwet su fahsryak we elos usruk kwawalos ac fahk kas koluk in angnol Jesus, 40 ac fahk, “Kom pa tuh fahk mu kom ac kunausla Tempul ac sifil musaela tukun len tolu! Kom fin Wen nutin God, sifacna molikomla! Fani liki sakseng soko an!”
41 In lumah se na inge, mwet tol fulat ac mwet luti Ma Sap ac un mwet matu elos oayapa aksruksrukel ac fahk, 42 “El molela mwet ngia, a el tia ku in sifacna molella! Ya tia el pa tokosra lun Israel uh? El fin fani liki sakseng soko ingan ingena, na kut fah lulalfongel! 43 El lulalfongi God, ac sifacna fahk mu el Wen nutin God. Kolya kut in liye lah God El ac lungse molella!”
44 Finne mwet pisrapasr ma welul sripsripyak uh, eltal wi pac aksruksrukel.
Misa Lun Jesus
(Mark 15:33–41; Luke 23:44–49; John 19:28–30)
45 Ke infulwen len, in polo acn sac nufon lohsrla ke lusen ao tolu. 46 Na apkuran nu ke ao tolu tafun len tok, Jesus el wowoyak ac fahk, “Eli, Eli, lema sabachthani”? su kalmac uh pa, “God luk, God luk, efu kom ku fahsr likiyu?”
47 Kutu sin mwet ma tu in sac elos lohngol ac elos fahk, “El pangnol Elijah!” 48 Na sie selos kasrusr ac eis sie insroal, twenya ke wain mwen, ac sang nu ke soko sak, na kolak elan nim.
49 A mwet ngia elos fahk, “Kolyawin, kut soano lah Elijah el ac tuku molella!”
50 Jesus el sifil wola ke sie pusra lulap, ac sisla mongol.
51 Na in pacl sacna, lisrlisr se lisringyen Acn Mutal Na Mutal in Tempul ah mihsalik ip luo lac lucngi nwe ten. Faclu kusrusryak, eot lulap uh fokelik, 52 inkulyuk uh ikakla, ac mwet puspis sin mwet lun God su misa meet elos sifilpa akmoulyeyukyak 53 ac illa liki kulyuk lalos. Ac tukun Jesus el moulyak liki misa, elos som nu in Siti Mutal, yen mwet puspis liyalos we.
54 Ke mwet kol se lun un mwet mweun, ac mwet lal su taran Jesus, elos pula kusrusr lun faclu, ac liye ma nukewa ma sikyak inge, elos tuninfongla ac fahk, “Pwayena lah el inge Wen nutin God!”
55 Mutan puspis wi pac muta in sac, su tu loes kutu ac liye ma orek uh. Elos inge tuh welul Jesus tuku Galilee me ac kulansupwal. 56 Kutu selos pa Mary Magdalene,* Mary Magdalene: Mary se inge el mwet Magdala, sie siti srisrik in acn Galilee. Mary nina kial James ac Joseph, ac mutan kial Zebedee.
Pukpuki Jesus
(Mark 15:42–47; Luke 23:50–56; John 19:38–42)
57 Ke ekela, sie mwet kasrup in acn Arimathea el tuku. Inel pa Joseph, ac el sie pac mwet lutlut lun Jesus. 58 El utyak nu ye mutal Pilate ac siyuk ke monin Jesus, ac Pilate el sap in itukyang monin Jesus nu sel Joseph. 59 Ouinge Joseph el eisya manol ac nokmulla ke nuknuk linen sasu se, 60 ac filiya in kulyuk se lal sifacna su el tufahna taflela in eot uh. Tari el epusang eot na lulap se sang kosrala mutun kulyuk uh, na el som. 61 Mary Magdalene ac Mary se ngia eltal muta we tulanot kulyuk sac.
Mwet In Taran Kulyuk Uh
62 In len tok ah, len Sabbath, Sabbath: len Sabbath lun mwet Jew pa Saturday lasr uh. un mwet tol fulat ac mwet Pharisee elos tukeni som osun nu sel Pilate, 63 ac fahk nu sel, “Governor, kut esam lah ke mwet kikiap sac srakna moul ah, el tuh fahk mu, ‘Nga ac fah sifil akmoulyeyukyak tukun len tolu.’ 64 Ke sripa se inge, wo kom in sap in arulana taranyuk kulyuk sac nwe ke sun len se aktolu, tuh mwet tumal lutlut elos fah tia ku in som ac pisrala manol, tari elos fahk nu sin mwet uh mu akmoulyeyukyak el liki misa. Kikiap se tok inge ac koluk liki na kikiap se meet ah.”
65 Ouinge Pilate el fahk nu selos, “Eis kutu mwet soan, ac kowos som taran kulyuk sac akwoye.”
66 Ouinge elos som ac siliya eot se ke kulyuk uh in ku, ac elos filiya kutu mwet in taran.

*27:56 Mary Magdalene: Mary se inge el mwet Magdala, sie siti srisrik in acn Galilee.

27:62 Sabbath: len Sabbath lun mwet Jew pa Saturday lasr uh.