MICAH
Tukakinyen Book Lal MICAH
Mwet palu Micah, sie mwet su palu pac in pacl lal Isaiah, el mwet in sie siti srisrik in acn Judah, tokosrai layen eir. El lulalfongi lah acn Judah ac putatyang pac nu ke innek in ongoiya se na ma Amos el tuh palye ke tokosrai Israel, su oan epang, ac ke sripa sac pacna God El ac kalyei mwet su oru nununku sesuwos. Ne ouinge, fahkak lal Micah akkalemye yokna lah oasr finsrak lal nu ke pacl fahsru.
Sie mwe fahkak ma fal in akilenyuk yohk uh sikyak ke chapter 4 verse 1 nu ke 4, su akkalemye ke moul wo ac misla ye kolyuk lun God. Ke chapter 5 verse 2 nu ke 5, oasr kas in palye ke sie tokosra pwengpeng su fah tuku liki takin sou lal David ac use misla nu sin mutunfacl sac. Oayapa kas in palu ke chapter 6 verse 8 sisani kas in palu nukewa mwet palu Israel tuh fahk: “Ma El enenu sesr uh pa inge: in oru ma suwohs, in moulkin lungse pacl e nukewa, ac in moul in inse pusisel yurin God lasr.”
Takla Lun Koanon Book Se Inge
Nununkeyuk Israel ac Judah 1:1—3:12
Sifil tulokyak tokosrai uh ac oasr misla 4:1—5:15
Kas in sensenkakin ac kas in ase finsrak 6:1—7:20
1
1 In pacl ma Jotham, ac Ahaz, ac Hezekiah elos tuh tokosra lun acn Judah, LEUM GOD El sang kas inge nu sel Micah, su sie mwet in siti srisrik Moresheth. LEUM GOD El ikasla nu sel Micah kalmen ma inge nukewa ke Samaria ac Jerusalem.2 Tok 15:32–38; 2 Chr 27:1–7; 2 Tok 16:1–20; 2 Chr 28:1–27; 2 Tok 18:1—20:21; 2 Chr 29:1—32:33
Kas In Eoksra Ke Samaria Ac Jerusalem
2 Lohng ma se inge, kowos mutanfahl nukewa;
Porongo ma se inge, kowos nukewa su muta fin faclu!
LEUM GOD Fulatlana El ac fah kaskas lain kowos.
Lipsre! El kaskas liki Tempul lal inkusrao me.
3 LEUM GOD El tuku liki acn mutal sel.
El fah oatui ac fahsr fin mangon eol uh.
4 Na eol uh ac fah kofelik ye nial
Oana kiris ma oan ke e uh.
Ma inge ac fah kahkla nu infahlfal uh,
Oana kof uh ke sororla pe eol uh.
5 Ma inge nukewa ac sikyak mweyen mwet Israel elos orekma koluk ac tunyuna lain God. Tunyuna lun Israel ac sisi nu fin su? Nu fin Samaria sifacna, siti fulat selos! Ac su ac eis mwatan alu nu ke ma sruloala in acn Judah? Jerusalem sifacna! 6 Ouinge LEUM GOD El fahk, “Nga fah kunausla Samaria tuh in oana sie yol in ma musalla in acn turangang, yen grape uh yok we. Nga fah okoala eot musalsal lun siti uh nu infahlfal uh, ac oru tuh in wangin ma oan fin pwelung lun siti sac. 7 Ma sruloala nukewa ma saok sin mwet we ac fah fokfoki nu ke ip srisrik, ac ma nukewa ma itukyang nu sin mutan ma kosro in tempul lul ma sruloala ac eis molo kac*mutan ma kosro ... eis molo kac: Liye Dut. 23:17. fah isisyak ke e. Mwe alyalu saya nukewa ac fah orala sie yol in ma sisila. Samaria el tuh eisani molin mutan kosro uh in akkasrupye fokin acn uh, a inge mwet lokoalok lun Samaria ac fah usla ma inge ac sang nu sin mutan kosro ke tempul lun ma sruloala in acn saya.”
8 Na Micah el fahk, “Ke sripa se inge nga ac fah mwemelil ac eoksra. Nga ac fah koflufolla foroht forma, ac tia loeyuk niuk, in akkalemye asor luk. Nga fah wowoyak oana kosro inima, ac mwemelil oana pusren sie kakowa†kakowa: won se pangpang pac lo; pacl se kasla ke fong, mwe sulkakin pweng koluk. ke fong. 9 Kinet ke Samaria tiana ku in mahla, ac Judah el apkuran in sun pac luman keok sacna. Mwe ongoiya sun tari mutunpot lun Jerusalem, acn su mwet luk muta we.”
Mwet Lokoalok Fahsryak Nu Jerusalem
10 Nimet fahk nu sin mwet lokoalok lasr in acn Gath lah kutangyukla kut. Nimet lela elos in liye ke kowos tung. Mwet in Beth Leaphrah,‡Beth Leaphrah: siti srisrik in acn Judah. kowos ipippip infohk uh in akkalemye inse toasr lowos! 11 Kowos mwet Shaphir, kowos ac som nu in sruoh, koflufol ac mwekin. Elos su muta in Zaanan tiana ku in ilme liki siti selos. Pacl se kowos lohng pusren tung in acn Bethezel, kowos ac etu na lah wangin nien wikla we. 12 Mwet Maroth elos tawi ac tupan in kasreyuk elos, mweyen LEUM GOD El oru tuh ongoiya lulap apkuranyang nu Jerusalem. 13 Kowos su muta in Lachish, kapriya horse an nu ke chariot an. Kowos etai ma koluk lun Israel, pwanang Jerusalem oru pac ma koluk. 14 Ac kowos mwet Judah, wilkasla nu sin acn Moresheth Gath. Ac fah wangin kasru lun siti srisrik Achzib nu sin tokosra lun Israel.
15 Mwet Mareshah, LEUM GOD El fah eiskowosyang nu inpoun mwet lokoalok, su ac fah sruokya acn in muta lowos. Mwet kol lun Israel fah som ac wikla in sie luf in acn Adullam. 16 Mwet Judah, kalla aunsifowos in asor ke tulik kowos kuloi. Koala insifowos in mangsrasrala oana sifen won vulture uh, mweyen tulik nutuwos ac fah utukla liki kowos nu in sruoh.
1:1 2 Tok 15:32–38; 2 Chr 27:1–7; 2 Tok 16:1–20; 2 Chr 28:1–27; 2 Tok 18:1—20:21; 2 Chr 29:1—32:33
*1:7 mutan ma kosro ... eis molo kac: Liye Dut. 23:17.
†1:8 kakowa: won se pangpang pac lo; pacl se kasla ke fong, mwe sulkakin pweng koluk.
‡1:10 Beth Leaphrah: siti srisrik in acn Judah.