24
In pacl se inge, Balaam el etu tari lah LEUM GOD El lungse elan akinsewowoye mwet Israel, ke ma inge el tia enenu in sukok kasru ke susfa, oana el muta oru meet ah. El ngetla nu yen mwesis ac liye mwet Israel lah elos mutangan aktuktuk ke kais sie sruf lalos. Ngun lun God tuku ke ku nu facl, na el fahk kas in palu inge:
“Kas inge ma sel Balaam wen natul Beor,
Kas lun sie mwet su ku in liye arulana kalem,
Su ku in lohng ma God El fahk uh.
Mutuk ngetnget na ac oana ngan liye
Sie aruruma sin God Kulana.
Lohm nuknuk sin mwet Israel uh arulana kato,
Oana tak na loeloes ke sak palm,
Ku ima puspis ma oan sisken soko infacl,
Oana sak aloes ma LEUM GOD El yukwiya,
Ku sak cedar sisken kof uh.
Ac fah arulana yohk af nu faclos
Ac elos ac yukwiya fita sunalos ke fohk ma aksroksrokyeyuk.
Tokosra lalos ac fah fulat lukel Agag,
Ac tokosrai lal ac fah fahsrelik nu yen loessula.
God El usalosme liki acn Egypt;
El mweun kaclos oana soko cow mukul lemnak.
Elos kontonauk mwet lokoalok lalos,
Itungya srelos, ac kotkoteya sukan pisr natulos.
Mutunfacl se inge oana soko lion kulana;
Ke el motul, wangin sie mwet ac pulaik in oaksalak.
Kutena mwet su akinsewowoye Israel ac fah akinsewowoyeyuk.
Ac kutena mwet su selngawel Israel ac fah selngawiyuk.” Gen 49:9; Gen 12:3
10 Tokosra Balak el isani paol ke kasrkusrak ac fahk nu sel Balaam, “Nga tuh pangonkomme kom in selngawi mwet lokoalok luk, a pacl tolula kom akinsewowoyalos ac tiana selngawelos. 11 Tari, folokot nu yen sum an! Nga tuh wulela mu nga ac moli yohk nu sum, tuh pa LEUM GOD El kosrala kom in tia eis mwe moul nu sum uh.”
12 Balaam el topuk, “Nga tuh fahkang nu sin mwet kom supwama ah mu 13 kom finne ase nufon silver ac gold inkul fulat sum an luk, nga ac tia ku in seakos ma sap lun LEUM GOD nu sik ac sifacna oru kutena ma. Nga ac fahk na ma LEUM GOD El sap ngan fahk mukena.”
Kas In Palu Safla Lal Balaam
14 Balaam el fahk nu sel Balak, “Inge nga ac folokla nu yurin mwet luk uh, tusruktu meet liki nga som, nga ac fahkot ma mwet Israel uh ac mau oru nu sin mwet lom ke pacl fahsru uh.” 15 Na el fahk kas in palu inge:
“Kas inge ma sel Balaam wen natul Beor,
Kas lun sie mwet su ku in liye arulana kalem,
16 Su ku in lohng ma God El fahk uh
Ac eis etauk su tuku sin El su Fulatlana.
Mutuk ngetnget na ac nga liye
Sie aruruma sin God Kulana.
17 Ke nga ngetla liye pacl fahsru,
Nga liye mutunfacl Israel.
Sie tokosra ac fah sikyak in facl sac, oana sie itu,
Sie tokosra ku ac fah tuku liki facl Israel.
El fah sringilya mwet kol lun acn Moab
Ac kunausla mwet Seth nukewa.
18 El fah kutangla mwet lokoalok lal in acn Edom.
Ac eisla acn lalos uh tuh in ma lal.
Ke pacl se inge, Israel ac nuna kutangla acn puspis saya.
19 Mutunfacl Israel fah fotongolosi nu infohk uh
Ac sukela mwet nukewa ma srakna moul.”
20 Na Balaam el liye mwet Amalek, ac el fahk kas in palu inge:
“Amalek pa mutunfacl se ma ku liki nukewa,
Tusruktu saflaiyal el fah wanginla ma pahtpat.”
21 In aruruma lal el liye pac mwet Ken, ac el fahk kas in palu inge:
“Acn se ma kowos muta we oakwuki arulana ku,
Oana sie ahng oan yen fulat fin fulu uh.
22 Tusruktu kowos mwet Ken ac fah kunausyukla,
Ke mwet Assyria ac fah uskowosla nu in sruoh.”
23 Na Balaam el fahk kas in palu inge:
“Su mwet ma fahsreni in acn epang inge?
24 Mwet mweun ac fah kal tuku Cyprus me;
Elos ac kutangla acn Assyria ac acn Eber
Tusruktu, elos sifacna ac fah wanginla ma pahtpat.”
25 Na Balaam el mukuiyak ac folokla nu yen sel, ac Balak el oayapa som nu yen sel.

24:9 Gen 49:9; Gen 12:3