1 Ma simla inge fahkak inen acn ma mwet Israel aktuktuk we tukun elos fahsr liki acn Egypt ke sruf lalos ye kolyuk lal Moses ac Aaron. 2 Moses el simusla inen kais sie acn ma elos tulokunak lohm nuknuk selos we, oana ma LEUM GOD El sapkin.

3 Mwet Israel elos som liki Egypt ke len aksingoul limekosr in malem se meet in yac, len se tukun Kufwen Alukela se oemeet. Ye karinginyuk lun LEUM GOD elos illa liki siti Rameses ye mutun mwet Egypt, 4 su pikin wounse mukul natulos ma LEUM GOD El uniya. LEUM GOD El oru ouinge in akkalemye lah El arulana ku liki god lun acn Egypt.

5 Mwet Israel som liki acn Rameses ac tulokunak nien aktuktuk lalos Sukkoth. 6 Nien aktuktuk lalos akluo pa in acn Etham sisken yen mwesis. 7 Liki acn sac elos folokla nu Pi Hahiroth, kutulap in Baal Zephon, ac aktuktuk apkuran nu Migdol. 8 Elos mukuila liki Pi Hahiroth ac fahsr sasla in Meoa Srusra nu in acn mwesis lun Shur. Tukun fahsr ke len tolu elos aktuktuk in acn Marah. 9 Liki acn we elos som nu Elim ac aktuktuk we, mweyen oasr unon in kof singoul luo ac sak palm itngoul we.

10 Elos fahsr liki Elim ac aktuktuk apkuran nu ke Meoa Srusra. 11 Acn in aktuktuk se lalos toko pa yen mwesis lun Sin. 12 Na toko elos aktuktuk Dophkah, 13 ac toko in acn Alush, 14 ac toko in acn Rephidim, acn se ma wangin kof elos in nim we.

15 Elos mukuiyak liki acn Rephidim ac som aktuktuk in acn mwesis lun Sinai. 16 Elos som liki acn we nu in acn Kibroth Hattaavah. 17 Tok elos som ac aktuktuk in kais sie acn inge: Hazeroth, 18 Rithmah, 19 Rimmon Perez, 20 Libnah, 21 Rissah, 22 Kehelathah, 23 Eol Shepher, 24 Haradah, 25 Makheloth, 26 Tahath, 27 Terah, 28 Mithkah, 29 Hashmonah, 30 Moseroth, 31 Bene Jaakan, 32 Hor Haggidgad, 33 Jotbathah, 34 Abronah, 35 Ezion Geber, 36 acn mwesis lun Zin (pa ingan acn Kadesh), 37 ac Eol Hor, sisken na facl Edom.

38 Aaron mwet tol el fanyak nu fin mangon Eol Hor, oana ke LEUM GOD El sapkin nu sel, ac el misa we ke len se oemeet in malem se aklimekosr ke yac akangngaul tukun mwet Israel elos illa liki acn Egypt.Oek 20:22–28; Dut 10:6; 32:50 39 Aaron el yac siofok longoul tolu ke el misa Fineol Hor.

40 Tokosra lun Arad, su oan layen eir in acn Canaan, el lohngak lah mwet Israel apkuranme.Oek 21:1

41 Mwet Israel elos mukuiyak liki Eol Hor ac aktuktuk Zalmonah. 42 Na toko elos aktuktuk ke kais sie acn inge: Punon, 43 Oboth, 44 mahnum Abarim in acn Moab, 45 Dibon Gad, 46 Almon Diblathaim, 47 Fineol Abarim, apkuran nu Fineol Nebo, 48 ac in acn tupasrpasr Moab su oan layen kutulap in Infacl Jordan tulanang Jericho, 49 inmasrlon Beth Jeshimoth na nwe infahlfal Acacia in acn mwesis lun Moab.

50 In acn mwesis lun Moab sisken Infacl Jordan tulanang acn Jericho, LEUM GOD El kaskas nu sel Moses ac fahk, 51 “Kaskas nu sin mwet Israel, ac fahk nu selos: Pacl se kowos fahsr alukela Infacl Jordan ac utyak nu in facl Canaan, 52 kowos in lusak mwet nukewa we. Kunausla ma sruloala lalos nukewa — ma orekla ke eot ac ma orekla ke osra — wi acn in alu lalos nukewa. 53 Sruokya facl sac ac oakwuki we, mweyen nga sot acn we tuh in ma suwos. 54 Kitalik acn we ke fa, nu sin sruf ac sou lowos nukewa. Sang ipin acn ma yohk nu sin sruf ma yohk, ac ipin acn ma srik nu sin sruf ma srik.Oek 26:54–56 55 Kowos fin tia lusla mwet nukewa su muta we, na mwet lula uh ac fah arulana aklokoalokye kowos, oana kutkut in atronmotowos, ku oana sak ma oasr otoh kac inpupowos, na tok elos ac foroht lain kowos. 56 Kowos fin tia luselosla, na nga ac kunauskowosla oana ke nga akoo in kunauselosla.”