1 Wen nutik, lohng kas in lalmwetmet luk ac porongo etauk luk. 2 Na ouiyen moul lom ac fah suwohs, ac kas lom ac fahkak lah oasr etu lom. 3 Ngoasron mutan kien siena mukul ac ku in emwem oana honey, ac oalul fwel oana oil in olive, 4 tusruktu ke safla pwar nukewa, mwe keok mukena pa ac tuku kac. 5 Mutan sac ac kolkomla nu in facl in misa. Inkanek ma el fahsr kac pa inkanek nu ke misa. 6 El kuhfla ac alfokfokla liki inkanek in moul, ac el tia akilen acn el fahsr we.

7 Lohngyu inge, wen nutik uh, ac tia mulkunla ma nga fahk nu suwos. 8 Fahsr liki mutan ouinge uh! Nimet kalukyang nu ke mutunoa sel. 9 Kom fin oru, na sunak ma tuh orek nu sum meet ac fah orek nu sin kutu na mwet, na kom ac fah fusr na misa inpoun mwet wangin pakomuta yoro. 10 Aok, mwetsac uh ac eisla mwe kasrup lom nukewa, ac ma kom kemkatu nu kac ac fah ma lun siena mwet. 11 Kom ac fah oan sasao fin mwe oan kiom. Ikom ac monum ac fah mongola, 12 ac kom fah fahk, “Efu ku nga koflana etala? Efu ku nga tuh srunga mwet in lutiyu? 13 Nga tuh tiana lohang nu sin mwet luti luk nukewa, ac tiana porongalos. 14 Ac inge nga akilenak lah akmwekinyeyuk nga sin mwet nukewa.”

15 Kom in pwaye nu sin mutan kiom sifacna, ac sang lungse lom nu sel mukena. 16 Tulik ma kom osweang nu sin kutena mutan saya uh, ac wangin sripa nu sum. 17 Lela tulik nutum uh in kapak ac kasrekom, a in tia muta kasru mwet saya. 18 Ke ma inge kom in engan sin mutan kiom, aok mutan fusr se na ma kom tuh payukyak se ah, 19 su tuh kato ac wo lumah oana soko deer mutan. Lela oaskuiyal in mwe akenganye kom. Lela elan kafiskomi ke lungse lal. 20 Wen nutik, efu ku kom in sang lungse lom nu sin siena mutan? Efu kom kaukya iniwen mutan kien siena mukul? 21 LEUM GOD El liye ma nukewa kom oru. Acn nukewa kom fahsr nu we, El liye kom. 22 Orekma koluk lun sie mwet koluk oana sie mwe kwasrip. El ac sremla ke sie nwek ke koluk lal sifacna. 23 El misa ke sripen el tia sifacna liyaung orekma lal. Lalfon lal pa kololla nu in kulyuk lal uh.