PSALM
Tukakinyen Book In PSALM
Book in Psalm el sie book in on ac book in pre in Bible uh. Orekla sin mwet puspis ke pulan pacl na loeloes. Mwet Israel elos orani on ac pre inge, ac orekmakin ke pacl in alu lalos. Tok elos sang tuh in oan in Ma Simusla natulos.
Sramsram ma oakiyuki ke luman on in alu inge orekla in lumah pus. Oasr on in kaksak ac alu nu sin God. Oasr pre in suk kasru, ku loango ac molela. Oasr pre in siyuk ke nunak munas. Oasr on in sang kulo nu sin God ke mwe akinsewowo ma El oru. Kutu pre inge siyuk tuh God Elan kalyei mwet lokoalok. Kutu kas inge ma sin kais sie mwet, ac kutu ma sin mutanfahl nufon se. Kutu Psalm inge fahkak ke nunak na pwaye ma oan insien sie mwet, ac kutu fahkak ke mwe enenu ac ma pulakinyuk sin mwet lun God nukewa.
Jesus el fahkak kas ke Psalm uh in mwe luti lal, ac mwet su simusla Wuleang Sasu elos orekmakin pac kas in Psalm ke ma elos simis. Tok, mwet Christian elos orekmakin pac kas ke Psalm ke pacl in alu lalos na oe ke pacl oakwuki Church.
Takla Lun Koanon Book Se Inge
Psalm 150 inge kitakatelik nu ke ip limekosr, ouinge:
Book se meet Psalm 1–41
Book akluo Psalm 42–72
Book aktolu Psalm 73–89
Book akakosr Psalm 90–106
Book aklimekosr Psalm 107–150
BOOK SE MEET
1
(Psalm 1—41)
Inkanek Luo
1 Insewowo mwet se su
Tia fufahsryesr in pwapa lun mwet koluk,
Ku ukwe inkanek lun mwet sutuu,
Ku muta inmasrlon mwet su aksruksrukye God.
2 A el engankin ma sap lun LEUM GOD,
Ac el nunku kac ke len ac fong.
3 El ac fah oana soko sak yoki sisken infacl,
Su isus fahko la in pacl la,
Ac sra kac tiana paola,
Ac ma nukewa el oru fah kapkapak.Jer 17:8
4 Mwet koluk elos tia ouinge,
A elos oana kulun wheat ma eng uh okla.
5 Ke ma inge mwet koluk elos ac fah tia tu in nununku*tia tu in nununku: kalmac pa “mwet koluk ac fah lisyukla ke pacl in nununku”.
Ku mwet sutuu in walil lun mwet suwoswos.
A inkanek lun mwet koluk fah wanginla.