10
Sie Pre Ke Nununku Suwohs
1 O LEUM GOD, efu kom muta loesla?
Efu kom wikinkomla liki kut in pacl upa nu sesr?
2 Mwet koluk elos filang ac akkeokye mwet sukasrup;
Sruokolosi ke mwe kwasrip ma elos sifacna orala.
3 Mwet koluk elos filangkin lungse koluk lalos;
Mwet rapku elos fahk kas in selnga ac pilesru LEUM GOD.
4 Mwet koluk elos tia nunku ke LEUM GOD;
Ke inse fulat lalos elos nunku mu God El wangin sripa.
5 Mwet koluk elos eis wo ouiya in ma nukewa.
Elos tia ku in kalem ke nununku lun God;
Elos israsrinkusrai mwet lokoalok lalos.
6 Elos sifacna nunku insialos mu, “Kut fah tiana sun koluk ouiya;
Kut fah tiana muta in ongoiya.”
7 Sramsram lalos sessesla ke kas in selnga, kas kikiap, ac kas in aksangeng;
Elos sa in fahk kas koluk ma srungayuk.Rom 3:14
8 Elos wikwik in siti srisrik,
Ac soano in akmuseya mwet wangin mwata.
Elos kasriki mwet munas;
9 Elos wikwik in nien wikwik lalos oana lion uh.
Elos muta soano mwet sukasrup;
Elos sruokolosi ke mwe kwasrip lalos ac amakunulosla.
10 Mwet sulallal elos atuyang nu fin mwet munas
Ac toasriyalos toanelosi na elos itungyuki oan.
11 Mwet koluk elos sifacna nunku insialos, “God El pilesru ma inge!
El kaliya mutal ac El tia ku in liye!”
12 O LEUM GOD, sang kaiyuk nu sin mwet koluk ingan!
Esamulos su akkeokyeyuk!
13 Fuka tuh mwet koluk uh ku in pilesru God
Ac fahk insialos sifacna mu, “El ac fah tia kai kut”?
14 Tusruktu kom liye na. Kom akilen na ongoiya ac keok lun mwet,
Ac kom akola in kasru pacl e nukewa.
Mwet munas elos eisaloswot nu sum;
Kom kasrelos su enenu in pacl e nukewa.
15 Kunausla ku lun mwet koluk ac mwet sulallal;
Kaelos ke ma koluk elos oru
Nwe ke elos tia sifil oru.
16 LEUM GOD El tokosra nu tok ma pahtpat.
Elos su alu nu sin kutena god saya
Ac fah wanginla liki facl sin God.
17 O LEUM GOD, kom fah porongo pre lun mwet fakpap;
Kom fah akpulaikyalos.
18 Kom ac fah lohng tung lun mwet mwemelil ac mwet mukaimtal;
Nununku lom ac fah wo nu selos,
Tuh mwet faclu fah tia sifil aksangengyalos.