28
[Psalm lal David]
Sie Pre In Suk Kasru
1 O LEUM GOD su langoeyu, nga pang nu sum.
Lohng tung luk!
Kom fin tia topukyu,
Nga ac fah welulos su tufokla nu infulan misa.
2 Lohngyu ke nga pang in suk kasru sum,
Ke nga asroeak pouk nu ke Tempul mutal sum.
3 Nikmet nununkeyu yurin mwet koluk,
Yurin mwet su oru ma koluk —
Mwet su kulang na likin pusraclos,
A insialos sessesla ke srunga.
4 Sang kai nu selos ke orekma koluk lalos,
Ke ma koluk elos orala.
Kaelos ke ma nukewa elos oru.
Sang nu selos topken orekma koluk lalos!Fwack 22:12
5 Elos tiana lohang nu ke ma LEUM GOD El oru
Ku nu ke orekma lun paol.
Ke ma inge El ac fah kaelos
Ac kunauselosla nwe tok.
6 Kaksakin LEUM GOD,
Tuh El lohng pusren kwafe luk.
7 LEUM GOD El karinginyu ac kasreyu;
Nga lulalfongi in El.
El kasreyu ac akenganyeyu;
Nga kaksakunul ke pusren on in engan.
8 LEUM GOD El karingin mwet lal;
El kasru ac molela tokosra su El sulela.
9 LEUM GOD, molela mwet lom,
Ac akinsewowoyalos su ma lom.
Kom in mwet shepherd lalos,
Ac karinganulos nwe tok ma pahtpat.