31
[Psalm lal David]
Sie Pre In Lulalfongi Ke God
1 Nga tuku nu yurum, LEUM GOD, in wikla yurum;
Tia lela in kutangyukla nga.
Kom sie God suwoswos;
Nga pre nu sum tuh kom in moliyula!
2 Lohngyu, ac moliyula inge!
Kom in eot ku luk, yen nga in wikla we,
Sie pot ku in loangeyu.
3 Kom nien wikla luk ac mwe loango luk;
Pwenyu ac kolyu in oana wulela lom.
4 Karinginyu liki mwe kwasrip akoeyukla nu sik;
Lisringyuyak liki mwe ongoiya.
5 Nga sifacna eisyuwot nu inpoum.
Kom fah moliyula, LEUM GOD,
Tuh kom sie God oaru.Lk 23:46
6 Kom srungalos su alu nu sin god kikiap,
A nga lulalfongi in kom.
7 Nga fah engan ac kaksak
Ke sripen lungse kawil lom.
Kom liye luman keok luk,
Ac kom etu mwe ongoiya nu sik.
8 Kom tia lela tuh mwet lokoalok luk in sruokyuwi;
Kom ase sukosok nu sik in fahsr nu yen nga lungse fahsr nu we.
9 LEUM GOD, pakomutuk,
Tuh nga muta in ongoiya;
Mutuk fafwak ke tung luk;
Nga arulana totola.
10 Nga foroti ke asor,
Ac tung luk akfototoyela moul luk.
Nga munasla ke sripen mwe akfohs puspis nu sik;
Finne sri keik uh munasla pac.
11 Mwet lokoalok luk nukewa, ac yokna mwet tulan luk,
Elos orek angonkas nu sik;
Elos su eteyu elos sangeng sik;
Ke elos liyeyu inkanek uh, elos kaing.
12 Mwet nukewa elos mulkinyula, oana nga in misa tari.
Nga oana sie ma sisila.
13 Nga lohng ke mwet lokoalok luk elos mahma;
Mwe aksangeng rauniyula.
Elos orek pwapa in lainyu,
Ac suk in uniyuwi.
14 Tusruktu lulalfongi luk uh oasr in kom, LEUM GOD;
Kom God luk.
15 Moul luk nufon oan inpoum;
Moliyula liki poun mwet lokoalok luk,
Liki elos su akkeokyeyu.
16 Ngetnget in kulang nu sin mwet kulansap lom;
Moliyula ke lungse kawil lom.
17 Nga pang nu sum, LEUM GOD,
Tia lela tuh nga in akmwekinyeyuk.
Lela tuh mwet koluk in akmwekinyeyuk;
Lela tuh elos in mislana som nu in facl sin mwet misa.
18 Kaliya oalin mwet kikiap —
Elos su filang ac inse fulat,
Su kaskas in akkolukye mwet suwoswos.
19 Fuka yokiyen ma wo su kom elosak
Nu selos su sunakin kom!
Mwet nukewa etu lupan wo kom,
Ac ouiyen karinginyuk ku lom nu selos su lulalfongi kom.
20 Kom okanulosla yurum
Liki pwapa koluk lun mwet;
Ac in sie acn misla kom okanulosla
Liki kas in akkoluk lun mwet lokoalok lalos.
21 Kaksakin LEUM GOD!
Fuka lupan woiya ke El akkalemye lungse lal nu sik,
Ke pacl mwet lokoalok luk rauniyula in mweuniyu!
22 Nga tuh sangeng ac nunku mu
El sisyula liki ye mutal.
Tusruktu El lohng pusren tung luk
Ke nga pang nu sel in kasreyu.
23 Lungse LEUM GOD, kowos mwet oaru lal nukewa,
Tuh LEUM GOD El karinganang mwet oaru,
A El arulana kaelos su filang.
24 Kowos in ku na, ac pulaik na,
Kowos nukewa su oasr finsrak lowos in LEUM GOD.