36
[Psalm lal David, Mwet Kulansap lun LEUM GOD]
Ma Koluk Lun Mwet
1 Ma koluk uh tilyang nu insien sie mwet koluk ac kaskas nu sel.
El pilesru God ac tia sangeng sel.Rom 3:18
2 Ke sripen nunak fulat lal kacl sifacna
El nunku mu God El ac tia etu ke ma koluk lal ac akkolukyal kac.
3 Kaskas lal uh koluk ac sessesla ke kikiap;
El tia sifil oru ma lalmwetmet ac wo.
4 El akoo nunak kutasrik lal ke el oan fin mwe oan kial;
Wangin ma wo el oru,
Ac el tia fahsr liki ma koluk.
Wolana Lun God
5 LEUM GOD, lungse kawil lom sun kusrao;
Oaru lom sun pukungeng yen engyeng uh.
6 Suwoswos lom fulat oana soko eol;
Nununku lom loal oana acn loal meoa.
Kom karinganang mwet ac ma orakrak.
7 O God, fuka saokiyen lungse kawil lom!
Kut konauk nien wikla lasr ye lulin poum.
8 Kut mutkin mwe mongo puspis su kom ase nu sesr;
Kom ase ma wo puspis nu sesr, oana soror lun infacl uh.
9 Tuh kom pa mutaweyen moul nukewa,
Ac ke sripen kalem lom kut ku in liye kalem.
10 Tia fuleak in lungse elos su etekom
Ac in oru wo nu selos su suwohs insialos.
11 Nikmet lela tuh mwet inse fulat elos in lainyu
Ku mwet koluk in oru tuh nga in kaing.
12 Liye mwet koluk oan ingo —
Sisila elos nu ten, ac elos tia ku in sifil tukakek.