40
[Psalm lal David]
Soko On In Kaksak
1 Nga mongfisrasr in tupan kasru sin LEUM GOD,
Na El porongeyu ac lohng tung luk.
2 El ulyuyak liki sie lufin ongoiya,
Liki fohk furarrar ac fulful ma ac ku in tulakinyuwi.
El oakiya niuk fin sie eot wen
Ac moliyula.
3 El lutiyu in yuk soko on sasu,
Soko on in kaksakin God lasr.
Mwet puspis su liye ma inge elos ac fah esmakla,
Ac elos fah filiya lulalfongi lalos in LEUM GOD.
4 Insewowo elos su lulalfongi LEUM GOD,
Su tia forla nu ke ma sruloala
Ku welulos su alu nu ke god sutuu uh.
5 Kom oru ma puslana nu sesr, O LEUM GOD lasr;
Wangin sie oana kom!
Kom oru oakwuk wolana puspis nu sesr.
Nga koflana srumun nufon —
Arulana pusla!
6 Kom tia enenu mwe kisa ku mwe lung;
Kom tia siyuk ke ma orakrak in kisakinyuk fon fin loang lom,
Oayapa kom tia siyuk ke mwe kisa in eela ma koluk.
A kom ase insrek tuh nga in ku in lohng kom.40:6–8; Heb 10:5–7
7 Ke ma inge nga fahk, “Nga inge;
Mwe luti lom nu sik oasr in book in Ma Sap.
8 Nga arulana lungse in oru ma lungse lom, God luk!
Nga sruokya mwe luti lom insiuk.”
9 LEUM GOD, in walil lulap lun mwet lom
Nga fahkak pweng wo ke molela lom nu sesr.
Kom etu lah nga fah tiana tui in srumun ma inge.
10 Nga tia sruokya pweng ke molela nu sik sifacna;
In pacl nukewa nga sramsram ke oaru lom ac kasru lom.
In walil lun mwet lom nga tiana misla in srumun
Ke oaru lom ac lungse kawil lom.
11 LEUM GOD, nga etu lah kom fah tiana tui in pakoten nu sik.
Lungse ac oaru lom fah karinginyu in pacl e nukewa.
Sie Pre In Suk Kasru
(Psalm 70)
12 Mwe ongoiya puspis rauniyula —
Pus liki ma ku in oekyuk!
Ma koluk luk ukweyuwi nwe sunyu,
Ac nga tila ku in liye;
Ma inge pus liki aunsifuk,
Na wanginla pulaik luk.
13 Kasreyu, LEUM GOD, moliyula inge!
14 Lela tuh elos su srike in uniyuwi
Elos in arulana kutangyukla ac akfohsyeyukyak.
Lela tuh elos su engan ke mwe ongoiya nu sik
In ukohkyak elos ac akpusiselyeyuk.
15 Lela tuh elos su isrunyu
In arulana mangolngolla ke kutangyukla elos.
16 Lela tuh elos nukewa su suk kom
Elos in engan ac pwar.
Lela tuh elos su kaksakin molela lom
In fahk pacl nukewa, “LEUM GOD El fulatlana!”
17 O Leum, nga munas ac sukasrup,
Tusruktu kom tiana mulkinyula.
Kom God luk ac kom moliyula —
Sulaklak kasreyu!