68
[Psalm lal David]
Soko On In Kutangla Lun Israel
1 God El tuyak ac akfahsryelik mwet lokoalok lal.
Elos su srungal elos kutangyukla ac kaingelik.
2 Oana ke kulasr uh ukukla, ouinge God El luselosla.
Oapana ke wax uh kofelik ke e uh,
Ouinge mwet koluk elos wanginla ye mutun God.
3 A mwet suwoswos elos insewowo ac engan ye mutal;
Elos insewowo ac sasa ke engan.
4 On nu sin God, yuk on in kaksak nu sel;
Kowos srukak pusren on ac akfulatye El su kasrusr fin pukunyeng uh!
Inel pa LEUM GOD— kowos in engan ye mutal!
5 God, su muta in Tempul mutal sel,
El nunku ke tulik mukaimtal, ac El karinganang katinmas.
6 El sang acn in muta lun mwet mukaimtal,
Ac el kolla mwet kapir nu ke sukosok ac engan,
A elos su lainul fah muta ke acn na turangangla.
7 O God, ke kom tuh kol mwet lom,
Ac fahsr sasla yen mwesis,
8 Faclu kusrusrsrusr, ac af kahkla inkusrao me
Ke sripen tuku lun God lun Sinai,*God lun Sinai: ke mwet Israel elos fahsr liki acn Egypt in som nu Canaan, God El fahkulak sifacna nu selos ke Fineol Sinai; liye Exo 19:16–25
Su God lun Israel.Exo 19:18
9 Kom oru tuh af matol in putat nu faclu
Ac aksroksrokyauk acn su munaslana.
10 Mwet lom elos orala acn in muta lalos ingo;
Ke pakoten lom, kom sang mwe kasru nu sin mwet sukasrup.
11 Leum El oru sap lal,
Ac mutan puspis elos usalik pweng se inge:
12 “Tokosra uh wi mwet mweun lalos elos kaingelik!”
Na mutan su mutana acn selos elos kitalik ma wap inge:
13 Luman wule uh ma afla ke silver,
Ac posohksok lalos saromrom ke gold nasnas.
(Efu ku kutu suwos muta in kalkal lun sheep uh ke len in mweun?)
14 Ke God Kulana El akfahsryelik tokosra uh Fineol Zalmon,
El oru tuh snow in putat we.
15 Fuka kuiyen Fineol Bashan,
Soko eol su pukanten tohktok fac!
16 Efu ku kowos ngetnget koluk liki tohktok fulat kowos muta we
Nu ke eol soko†eol soko: liye Psa 2:6 su God El sulela tuh Elan muta we?
LEUM GOD El ac fah muta we ma pahtpat!
17 Ke tausin chariot fokoko natul,
Leum El tuku Sinai me nu in acn mutal sel.
18 El utyak nu yen fulat
Ac us mwet sruoh puspis welul;
El eis mwe sang sin mwet su lainul.
LEUM GOD El ac fah muta ingo.
19 Kaksakin Leum,
Su us ma toasr lasr len na len;
El pa God su molikutla.
20 God lasr, El God su molela;
El pa LEUM GOD, Leum lasr,
Su loangekut liki misa.
21 Pwayena lah God El ac fah fukulya sifen mwet lokoalok lal,
Elos su suk na in mutana in ma koluk lalos.
22 Leum El fahk, “Nga ac fah folokonma mwet lokoalok lowos liki Bashan,
Nga fah folokunulosma liki acn loal meoa,
23 Tuh kowos fah fahsr in srah kaclos,
Ac kosro ngalngul nutuwos in lohi srah kaclos nwe kena elos muti.”
24 O God, mwet nukewa elos liye fahsr in kutangla lom,
Aok utyak lun God, Tokosra luk, nu in acn mutal sel.
25 Mwet on elos fahsr meet, ac mwet srital ke mwe on elos fahsr tok,
Ac mutan fusr elos fahsr infulwa ac srital ke tambourine natulos.
26 “Kaksakin God in walil lulap lun mwet lal.
Kaksakin LEUM GOD, kowos fwil natul Jacob!”
27 Benjamin, sruf se ma srik emeet, elan fahsr meet;
Toko, mwet kol lun Judah wi mwet lalos,
Na tufah mwet kol lun Zebulun ac Naphtali.
28 Akkalemye ku lom, O God;
Ku se su kom orekmakin kacsr
29 Liki Tempul lom in Jerusalem,
Yen tokosra uh elos use mwe lung nu sum we.
30 Kael Egypt, su oana kosro lemnak su muta inmasrlon loa uh;
Kai mutunfacl uh, su oana un cow mukul wi cow fusr,
Nwe ke na elos nukewa suwoli ac asot silver lalos nu sum.
Akfahsryeloselik su lungse orek mweun!
31 Mwet fulat aolyen facl Egypt fah tuku;
Ac mwet Ethiopia elos ac fah asroeak paolos in pre nu sin God.
32 On nu sin God, tokosrai lun faclu,
Onkin on in kaksak nu sin Leum,
33 Nu sel su kasrusr inkusrao —
Kusrao su oan oemeet me.
Porongo, el sala ke sie pusra ku.
34 Kowos fahkak ku lun God;
Tuh fulat lal oan fin Israel,
Ac ku lal oan inkusrao.
35 Arulana yohk mangoliyen God ke El ac illa liki acn mutal sel —
God lun Israel!
El sang ku wolana nu sin mwet lal.
Kaksakin God!
*68:8 God lun Sinai: ke mwet Israel elos fahsr liki acn Egypt in som nu Canaan, God El fahkulak sifacna nu selos ke Fineol Sinai; liye Exo 19:16–25