80
[Psalm lal Asaph]
Sie Pre In Sifilpa Tulokunak Sie Mutunfacl
1 Porongekut, O Shepherd lun Israel,
Lohng kut, kom su kol un sheep nutum;
Kom su muta lucng liki posohksok lun cherub.*cherub: liye ke Kalman Kutu Kas.Exo 25:22
2 Fahkkomyak nu sin sruf lal Ephraim, Benjamin, ac Manasseh.
Akkalemye ku lom nu sesr;
Fahsru ac molikutla!
3 Folokinkutme, O God!
Akkalemye pakoten lom nu sesr ac kut tufah moulla.
4 O LEUM GOD Kulana,
Putaka kom ac mulat ke pre lun mwet lom?
5 Kom ase asor oana mwe mongo nasr,
Ac sie cup lulap ke sroninmuta tuh kut in nim.
6 Kom oru tuh mutunfacl su raunikutla in mweun ke acn lasr,
Ac mwet lokoalok lasr elos akkolukye kut.
7 Folokinkutme, O God Kulana!
Akkalemye pakoten lom nu sesr, ac kut tufah moulla.
8 Kom use soko fain in grape Egypt me,
Kom lusla mutunfacl liki acn selos ac yukwiya fain soko inge in acn selos.
9 Kom sakunla acn se tuh elan yoki we
Ac okah kac kapla loal, ac fain soko ah orakelik nu in acn sac nufon.
10 Lulin fain soko ah luliya inging ah,
Ac lah kac uh luliya sak cedar lulap.
11 Lah kac ah lahelik som sun Meoa Mediterranean,
Oayapa fahla nwe ke sun Infacl Euphrates.
12 Efu ku kom kunausya kalkal ma oan raunela?
Oru mwet nukewa su fahsr aliki elos kinis fahko kac.
13 Pig inima elos longya
Ac kosro lemnak elos kang.
14 Sifilpa forma nu sesr, O God Kulana!
Ngeti inkusrao me nu facsr,
Fahsru ac molela mwet lom.
15 Fahsru ac molela fain grape soko su kom yukwiya inge;
Fain fusr soko su kapak arulana fokoko.
16 Mwet lokoalok lasr elos pakiya ac furreak,
Liyalos ke kasrkusrak lom, ac kunauselosla.
17 Sruokya ac karingin mwet su kom sulela inge,
Mutunfacl se su kom oru in arulana ku.
18 Kut ac fah tia sifil forla liki kom;
Karinganang moul lasr, ac kut ac fah kaksakin kom.
19 Folokinkutme, O LEUM GOD Kulana!
Akkalemye pakoten lom nu sesr, ac kut tufah moulla.