86
[Psalm lal David]
Sie Pre In Suk Kasru
1 Lipsreyu, O LEUM GOD, ac topukyu,
Tuh nga munas ac enenu.
2 Moliyula liki misa tuh nga inse pwaye nu sum,
Moliyula, tuh nga mwet kulansap lom ac nga lulalfongi kom.
3 Kom God luk, ke ma inge pakoten nu sik;
Nga pre nu sum ke len nufon.
4 Oru tuh mwet kulansap lom in engan, O Leum,
Tuh pre luk sowak nu yurum.
5 Kom arulana wo nu sesr ac kom nunak munas nu sesr,
Yoklana lungkulang lom nu selos nukewa su pre nu sum.
6 Porongo pre luk, O LEUM GOD,
Lohng ke nga tung in suk kasru sum.
7 Nga pang nu sum in pacl in ongoiya
Mweyen kom topuk pre luk.
8 O Leum, wangin sie god oana kom,
Wangin sie ku in oru orekma su kom oru.
9 Mutunfacl nukewa su kom orala
Ac fah tuku ac epasr nu sum,
Ac elos fah kaksakin fulat lom.Fwack 15:4
10 Kom kulana ac kom oru ma sakirik.
Kom mukena pa God.
11 Luti nu sik, O LEUM GOD, lah mea kom lungse nga in oru,
Ac nga ac fah akos kom ke insiuk nufon.
Luti nu sik in kulansupekom ke inse pwaye.
12 Nga fah kaksakin kom ke insiuk nufon, O LEUM GOD luk,
Ac nga fah fahkak ke fulat lom nwe tok.
13 Fuka lupan lungse kawil lom nu sik!
Kom moliyula liki lufin misa.
14 O God, mwet filang elos tuyak lainyu,
Ac sie un mwet sulallal kena uniyuwi —
Mwet su tia lohwot nu sum.
15 A kom, O Leum, kom sie God sessesla ke lungse ac pakoten;
Kom mongfisrasr, kulang ac pwaye pacl e nukewa.
16 Forma nu sik ac pakomutuk;
Ase ku lom nu sik ac moliyula,
Tuh nga kulansupwekom oana nina kiuk el tuh oru.
17 LEUM GOD, oru sie ma in akpwayeye wo lom nu sik
Tuh mwet su srungayu in liye ac mwekin kac,
Mweyen kom kasreyu ac akwoyeyu.